YEREMIYA 18 - Bibliyeeda Ghaydit

Yeremiya aba gheeda siida sina dahuundiga

¹ Ng'asheanda NG'UTAMIIDA hidu heeda Yeremiya ak geeyeesha:

² “Ng'eada ak guweesi gheeda siida sina dahuundiga, ak abeeda gaydarukuneey ng'asheega jea rukwiida.”

³ Ng'ata geawi gheeda siida sina dahuundiga, ak ghaahiti nea gagadiiy aba heeda sina dahuundigaaschi.

⁴ Nea inyeesa iidatasa dahuuda sin aba sheang'weeda aba geatingaaschi, inyeesa gabiikta gwasin nuut aba gidadaakta siida sina dahuundiga gideaba ghwadoabiiw.

⁵ Ng'ata ghwahidu heedeanyu ng'asheanda NG'UTAMIIDA ak gwayi:

⁶ Gwayi NG'UTAMIIDA, “Ea gheeh Israeli, aniini mwaamuusi dahindaneegwa gida sin siisi sina dahuundigeani? Ng'ula giduurji sheang'weeda aba geatinga siida sina dahuundiga, eara agooga gidoowuurjeewi goondi jeeda baneaguukeasu, Ea gheeh Israeli.

⁷ Aba damanda wassean Iinyo dabalool aba badayda eamwa ghana sugoocheanduumeeda gideaba gaydaloata, ak geanyarji ng'ata geahuydi goosha,

⁸ ama inyas ghwayam geat ak ghwanung'waada munyasnacheeka eemeeda eargu, abeeda gaydaduukuuna aba badayda gida ghayi eagasayi dasima saawa.

⁹ Aba damanda wassean iyeabalooli aba badayda eamwa ghana sugoocheanduumeanagi gideaba gaydadeas nea ghaanung' gwaheedu.

¹⁰ Nea inyas gwasin munyinda aba madeedeanyu, nea mooleeysiina ghuuteanyu, abeeda gaydaduukuuna sinooda ng'asheega miyaasiin ghayi jea dasisa saawa.

¹¹ Ng'ata gwayi, fuga Yahudi ea gea abiita Yerusalemu: ‘Gwayi NG'UTAMIIDA, Ng'ula ghaang'waaniichi munyinda aba badahuukeagwa nea ghaadapchi munyinda aba badahuukeagwa. Daba siisi yamwa geaw naweadinga munyas, ak goobiikti ooweeshiida naweadingeagwa ea sinaweegeagwa.’

¹² “Ng'ata gwayi saawa, ‘Nih gida marachi gil! Aseasa gajeayaada naweadingaasa, nea gaygaba siisi sin aba ghwarjeeda gurooroadaanyi.’

Buuneeda ghaheawa NG'UTAMIIDA

¹³ “Hean gwayi NG'UTAMIIDA: Abwaarda aba bugusta eemoojiga, ghwang'wa ea niyiiy ng'eaha ng'asheanda uurji nih? Huda miyeasat bea Israeli nisin ng'asheanda muy.

¹⁴ Heapi gapkeanda Lebaloni ghoamu gwajeamsa badahuuka lagheanga Siriyoni? Nea beega giijeagaaschi garbapi leabu dea sheagi ea niraay gagulda?

¹⁵ Ak fugeasu ea mudu ghoapkaadan, inyeesa gagwardeaysa hideeda ng'andit aseecheeka ng'uyeega; ak geanung' gwaruusa geat aba naweadinga nyaawa ea aba naweadinga nyaawa ghayi bea garayi, inyeesa ghwala heeda manda naweeda, nea ghwanung'waada naweeda bwara,

¹⁶ nea ninung' ghoah ng'eanyiida nyaawa gichea goobeeli fih, gichea eemachiida galeagasean gilinyoo ghwala hoowa gayghahamng'eanyi nea goodiindiil uhuudaanyi.

¹⁷ Gaydaadaarda saawa aba madeeda weajoodiga nyaawa gawuurji jeameeda leabu gayeew. Maygudu deahiimsa gheamamdeanyu, gaydeafuursa badayda eaweeda giishealda nyaawa.”

Gisigasa eaghasta Yeremiya

¹⁸ Ng'ata gwayi saawa, “Apkaani, eaghasa Yeremiya, aba gideaba majearamasa ashoohoocheanda jea ghoanaaleasa digheanyeeka, ea girgweaguutka aba heeda fuga bareahi iheeni, ghana ng'asheanda jea gwaleabu heeda sibaneeda. Apkaani, eahaakta aba ng'asheega ghuutaanyi, nea adiidu geeshageachi ng'asheagaaschi.”

¹⁹ Ea NG'UTAMIIDA, aleeysean iita, ak giyiinyi gideamuscheeyi.

²⁰ Heapi ng'asheega munyas geamu eashaaha gea miyaas? Aba huumwa nighurghur shoomanda jea gwadaganean. Apkaada gidaamiinaadaydi aba madeadaang'u ak gearukuneey gea miyaasiin aba badahuuka nyaawa, daang'aamwa nyarastaang'u heeda nyaawa.

²¹ Asi geamuscheey nung'waada diibiga nyaawa gwasawan jalooda; nung'waada gahuuyda ng'uta, nea gadeemga nyaawa ginung' gwanya jeat nea ghoah masinung'weega. Nea siyeenatka nyaawa ginung' gahuuyda geeyooda muy, ak gheareemanga nyaawa gagasa eehuuyda aba ng'uta aba ng'ucheeda.

²² Gideabali geayiiy shookcheanda aba jeeda gealga nyaawa, damanda inung' gwasham mareaghooga! Aba gideaba nighurghur shoomanda jea ghwaagan ak gawiilsa naweedeanyu ghaseeda jea ghaghasan.

²³ Ea NG'UTAMIIDA, ang'iing'i ginali girgweaguutka nyaawa bea nuusteanyu. Adiidu gisamsi giidiinyeanyeeka nyaawa, ak ea adiidu giihuuni riing'eega nyaawa aba madeadaang'u. Gagasa eehuuyda aba madeadaang'u; Huuyda goosha aba nyarastaang'u.