YEREMIYA 16 - Bibliyeeda Ghaydit

Gidagasa NG'UTAMIIDA aba eaweega Yeremiya

¹ Ng'ata ghwahidu heedeanyu ng'asheanda NG'UTAMIIDA, ak gwayi,

² “Ang'iing'i maygeesheena, nea ea maynyasa diibiga haweega ea gea orjooga aba hiji.

³ Aba gideaba gwayi NG'UTAMIIDA aba badayda orjooga ea haweega sijiilsa hiji, ea aba badayda ghweaniga ea gheamadiga jiilu saawa aba jeedeaba ng'eanyiini.

⁴ Ng'ula gaygahuuyda geeyooda muy. Nea ea manda fuga jea gooyeawda aba badahuuka nyaawa, ak hean eara fuga jea gabuy ea maygwanda; saawa gaygawuurji fiyeega dugwa mida mooheeda. Ak gaygahuuyda ng'uta ea geejeeda, nea muscheeka nyaawa gayghoah daghwarda dariidaka ea diyeanga jarooda.

⁵ “Hean gwayi NG'UTAMIIDA; adiidu guwi jeeda gheeda meewa ghana una heeda fuga gutu heareega, ghana giisana; aba gideaba naang'aami hoyyooydeanyu heedeaba fiisu, gwarugu NG'UTAMIIDA, bariinyeegeasu bea huumwa ea baydeaydeanyu.

⁶ Nea gaygooshealsa hiji fuga hees ea gea manang'i; ak ea majeebuy, nea manda siichea gagutu heareega aba badahuuka nyaawa, ghana gwareekushi, ghana ghwalajaada geaw aba badahuuka nyaawa.

⁷ Nea ea maygwanda siichea ghoadawa daghwarda, jea gageanda salagheang'da siida meewa fuga gheanyaawa nea ea maygwanda siichea ghoadaw gichea ghwali jea gageanda salagheang'da aba badayda miyeeda ghwaan ea ghaamwat.

⁸ Adiidu gooweayi jeeda gealga mida ghweelmeeda ak goondeayi sea saawa, ak gooyeagiischi nea gooleeyshi.

⁹ Aba gideaba gwayi NG'UTAMIIDA bea lugweega, was ASEETA fuga Israeli: Ng'ula gaydaang'aamwa hiji bea madeedeang'wean ea madeeda eawoojigeagwean giijuureanda rearga ea hooseaneega, ea nyeashta orjeeda geeshi ea sibeeda.

¹⁰ “Inyas gayrukusiina fiisu ng'asheesu seaniin, ak gwayeeshiineey, ‘Ghwasaan NG'UTAMIIDA anda gwarugu ng'asheega munyas aba badaydeanya? Aseasa siitiinyi naaha? Aseasa sisinyi ana riing'a aba badayda NG'UTAMIIDA was ASEETEANYA?’

¹¹ Ak gajeeshiina saawa: Gwayi NG'UTAMIIDA, ‘Aba gideaba ghweanigeagwa ghayi ghaheawanaan, ak ghwaat geeshanga aseecheeka suuk ak ghabwat nea gagadiiyeesa, hean ea nijaktaneani nea ea mudu ghoang'waay huumeanyeekeasu,

¹² ak ghamneawa aba gideaba noosinyi gea naawa gea ghweanigeagwa, ng'ula aba gidoodeeneawi, gaba siisi duup giidiinyeandaanyi, nea ghaheawa gooleeysean iita;

¹³ asi ng'ula gaydaang'aamwaneegwa hiji ak ghaayaadeagwa ng'eanyiida moanali agooga sea ghweanigeagwa, ak aba hoowa gajabwada sanaamajeega eawa ea askweari, nea maydabwaydaneegwa.’

Biiknooda sileabu giibaleakta

¹⁴ Ak gwayi NG'UTAMIIDA, “Asi ng'ula gayghapka eemoojiga jea ea maygudu eeyi, ‘Aba gidabiideata NG'UTAMIIDA ghayi aruuna fuga Israeli ng'eanyiida Misri,’

¹⁵ ng'ata, ‘Aba gidabiideata NG'UTAMIIDA ghayi aruuna fuga Israeli ng'eanyiida mida wiilooda ng'eanyiida ghayeawa, ea jeeda ng'eanyiida ghayi Hosa niny saawa.’ Aba gideaba gaydeadeelu jeeda ng'eanyiida nyaawa ghayi aadawji ghweaniga nyaawa.

Lasooda jea ghwahidu

¹⁶ Asi gwayi NG'UTAMIIDA, “Ng'ula gaydeajeagu fuga saang'a daga ghweayeega ghapka ghoang'waay fiisu; aba ng'ata gaydeajeagu fuga bara shageata ak gaygahoona saawa aba uhuuda gilinyoo ea giija gil ea uhuuda gilinyoo ea heaya, ea jeemba gilinyoo gwaleamba lagheanga.

¹⁷ Aba gideaba gheanyangeasu gang'ula naweadinga nyaawa, nea manda gichea ghafunyanaani, nea eara ramaseanyeeka nyaawa ea dahaachi aba gheanyangeasu.

¹⁸ Ak gaydawalda niba iyeenya ramaseanyeeka ea riing'eega nyaawa, aba gideaba ning'uda ririnnyeanda ng'eanyiideanyu aba muscheeka sanaamajeega nyaawa munyas, ak ea niinyiit hearaniischoodeanyu aba munyasnacheeka nyaawa.”

Yeremiya ghamwaash ASEETA aba masaweega

¹⁹ Ea NG'UTAMIIDA, ang'iing'i guwoosi uurdeanyu ea hilgweandeanyu, heechea damng'awsa damanda sawanadeeda, gayghapka headaang'u eemoojiga sean gayghapka meadajeega sean bea ng'eanyiida ak gaygwayi: “Ghweanigaasa mahearana eara gil geaghus ng'uyeega, haleanjeeda mwadaagha marachi gil.

²⁰ Heapi siida ghoamu gwasissa geaw aseecheeka? Suh mayghoah aseecheeka!”

²¹ “Asi, ng'ula, gaydanung' ghwanal giteena uurdeanyu ea giimuusteanyu, ak gayghwanal gideaba gheawungeasu NG'UTAMIIDA gil.”