YEREMIYA 15 - Bibliyeeda Ghaydit

Sawanadeeda fuga Yuda

¹ Ng'ata gwayeeshiinean NG'UTAMIIDA “Ghamneawa eara ghamiinaada Musa ea Samweli aba madeedeanyu ak gamusiischeesa fiisu, aba huumwa gurooroodeanyu may gwayamsa geawi fiisu. Ang'aamwana madeedeanyu, ak ginung'waadi gaweay!

² Aba inyas gaygwayeeshiineey, ‘Gajaweayeena eenu?’ Hean gajeeshiina, ‘Gwayi NG'UTAMIIDA: “Gea sing'oorsa geeyooda, gaygahuuyda geeyooda, Nea gea sing'oorsa ng'uta, gaygahuuyda ng'uta; aba gea sing'oorsa geejeeda, gaygahuuyda geejeeda, nea gea sing'oorsa giing'ooyda, gayghoah giing'oonyanga.”’

³ “Aniini naaloachi haleanji ng'at ang'wan jea gwasawan saawa, ng'asheanji gwarugu NG'UTAMIIDA: ng'uta jea gahuuyda, gudajeega jea gaganyeadi, dariidaka humng'eeda ea diyeanga jarooda jea ghwaak ea gahuuyda.

⁴ Ak gaydanung' ghoah gichea eawal aba jeeda gheambalmeeda sean bea ng'eanyiida aba ng'asheanda ghayi sin Manase was orjeeda Hesekiya aba Yerusalemu damanda waseewa sugoocheanda.

⁵ “Ea Yerusalemu, ghamneawa gayghabwaydaneey ng'eaha, ghana gaygwahearan ng'eaha aba badaydaang'u? Gayghwayam ng'eaha geaw ak ghoabwaarda ng'asheegeagwa?

⁶ Gwayi NG'UTAMIIDA, agooga noaheawanaan, Ak goobiikti bwadaw; Ak ghamneawa ea neagatkachi geatindeanyu dahasheegwa;– Aba gideaba neaburji aba baydeaydeang'wa.

⁷ Naalalakti aba gida silalakiideawa booga Aba jeeda gidaghuudajeega sean bea ng'eanyiida; Neahuteawayi saawa, ak ea neahuuydi goosha fugeasu.

⁸ Naanung' ghwasaang'ayiit mooneeda masinung'weega nyaawa, ea gaburdeawa iseaskweanda jeeda basooda ak ea neajaksi heeda gadeemga mideawa diibiga was orjooga nyariida askweari; ak hean geajeagu sawanadeeda ea beelda jea gwasham saawa.

⁹ Gatmooda jih diibi ispwa mudu gwarachi gil; nea ea goosha Giisiimeandaanyi ak ASEATAANYI gamikta nea gudea askweari; ak geapwaaspwaas nea geanung' gwanyik, Nea gea siipuut gaydanung' gahuuyda weajoodiga nyaawa, aba ng'uta, ng'asheanji gwarugu NG'UTAMIIDA.”

Yeremiya gooniiksa NG'UTAMIIDA

¹⁰ Eamuy deanyu, ea iyya, aba gideaba nijiilnean, aniini geawooschi siida ng'ooweata ea sheang'nyeeda aba ng'eanyiida sean, aniini miidealeaksa siida nea miidaalaach gil aba hichpa siida nuut, ak ea nimoashtanaan sean.

¹¹ Nung'waada ghabeadunu, Ea NG'UTAMIIDA, Iimiidagadiyeeseeyi aba miyeasnacheeka nyaawa nea mii damoashnyi aba badayda weajoodiga damanda mideewa jeeda sawanadeeda ea hashooda!

¹² Gwanda siichea ghoamu gwahirja gharinyeanda leabu wiilooda ng'eanyiida ghayeawa, ghana gharinyeanda oomu?

¹³ “Haleanjeedeang'wa ea gheaseedeang'wa gaydanung' ghoah easanga, nea manda sheayeeda, aba riing'eegeagwa sean oosinyi aba badayda ng'eanyoojigeagwa sean.

¹⁴ Ak gaydanung' agadiyeesiina weajoodigeagwa aba ng'eanyiida moanali, aba gideaba nyarasteanyu niyeata beasta jea ghwayeat damanda manda muudeanooda.”

¹⁵ Ea NG'UTAMIIDA, ang'iing'i ginaljaan; apkaadan ak giwuni heedeanyu, ak giwaldi mureandooda aba badayda fuga sawanan. Aba baydeaydaang'u adijaktanean; nea ginali gideaba inyeesa geeng'eawean aba badaydaang'u.

¹⁶ Hean ghapka ng'asheagaagu, hean ghaayaaji, Hean ghwanung' dang'weela ng'asheagaagu Ea hooseaneega aba gurooroodeanyu; Aba gideaba geeguureeweani aba gheawungaagu, Ea NG'UTAMIIDA, was ASEETA bea lugweega.

¹⁷ Aniini miideapteada sea fuga mida jeeda miyeenooda, nea ea mii dahoosan sea saawa; geapteadi nea geabea geaw, aba gideaba gwanda geatindaang'u uhuudeanyu, aba gideaba ninyiidan nyarastaang'u.

¹⁸ Ghwasaan sawanaduutkeasu anda mwahawda? nea deaneaduutkeasu ghaheawa ghahaap nea mamwasa giiheapta? ghamneawa aba heedeanyu gajuurjeewana eenda bea ng'uya, ghana beega weesa jeamda?

¹⁹ Ng'ata gwayi NG'UTAMIIDA: “Inyas gaybiikni, gaydeadeelneey giibinda uurji dea ghayi bea mwadi, Ak abeeda gaygagadiyeesean. Inyas gayrukuni ng'asheega huumeanda, nea mii gea budeayda gil, Abeeda gayhuuwa siida ghuuteanyu. Gayghapka saawa headaang'u Nea ang'iing'i ea majuna heeda nyaawa.

²⁰ Nea aba madeedeaba fiisu gaydanung' huwa hilgweanda geaw bea gharinga; hean gaygang'ucheeweeyi, ak ea mayghwajoarnyi aba gideaba geendeayi sea ang'iing'i, gaydalealneey ak ghaaweacheeyi, ng'asheanji gearugu NG'UTAMIIDA.

²¹ “Gaydaweanyi aba geatinga fuga gwaneadi; ak gealealnaneey geatinga fuga munyas.”