YEREMIYA 12 - Bibliyeeda Ghaydit

Yeremiya goonyeari NG'UTAMIIDA ng'asheega

¹ Ea NG'UTAMIIDA, ang'iing'i guwoosi doabiiwaat, Earapeadi eaniikseeyiin; Gaydabassa ng'asheegeasu madeadaang'u. Ghwasaan anda naweeda fuga munyas ghwanyagaada? Ghwasaan anda fuga sean gwaneadi gaba seayu?

² Ang'iing'i gihisti saawa, ak ghang'ut ng'eanyi hawunga; Hean gwaheetu ea gwaji haghweega; Inyeesa aba ghuusiga nyaawa guwoosi neeki Nea aba jeesinga gurooruunatka nyaawa guwoosi sheagi.

³ Ak ang'iing'i, Ea NG'UTAMIIDA, ginalaan, ak ea nidaayaan, ak ea nisimi fughareedeanyu daah ea gagalu headaang'u. Awoasta gisilga siyaat heeda siida jeeng'shachi, Ak gisaji ghoamuughu eaweeda jea eenuusa.

⁴ Ng'eanyiida gaygagiisan ea ghoah eeju Ea ghwasis nyeega sean bea madameega? Aba munyinda fuga abiita jeeda, Diyeanga jarooda ea dariidaka humng'eeda niisha, Aba gideaba gwayi buuneeda, “May ghwadaah muudeanoodeanya.”

⁵ Gwayi NG'UTAMIIDA “Inyas ea nigaleadawi headiga aba beata, ak ghoadaraamnyi abeeda gajamuustaan galeadawana faraasajeega? Ama inyas giibeadi aba ng'eanyiida bwara abeeda gaygawuurjiin iiski jeeda dareapcheeda Yordani?

⁶ Ak eara orjooga giyeang'wa ea ghaheang'wa, nibada gea munyas aba badaydaang'u goojuur aba badaydaang'u adiidu gumwasi saawa earapeadi baloola gea miyaasiin aba badaydaang'u.”

Giiseaneega NG'UTAMIIDA aba badayda fugaaschi

⁷ “Neajakti gheanyu, Naanung'waadi fugeasu; Naayiinyi siideanyu aabwariinyi geatinga weajoodigaaschi.

⁸ Fugeasu aaloachi niyam geat niwuurji ng'adiida mida dareabeeta, Nigatgat ghuuta goomuumsean; Ak ea naasichi.

⁹ Fugeasu aaloachi niwuurji dariidaka ak rabearjeeka meadajeega sean? Nea niny gwaneaweesa dariidaka siyeaga? Una, ak giimughuushi diyeanga sean bea jarooda; Ak giyeadu ghapka ghoajeada.

¹⁰ Jeagiischoodigeasu nidatas madamnyeandeanyu bea sabiibu; Niileapleapsa ng'eanyi heeda was deanyu Nea madamnyeandeanyu miy ea ninung' ghoaw dareapcheeda manda gil.

¹¹ Ninung' ghoah raghoonyeanda ak ea niiyeawusean. Ng'eanyiida sean sinung' ghoah roonghooda, Nea manda siisi nyooh gwaduuba.

¹² Fuga ghas fih niding'da iheenga heayeeniga manda gil mida dareapcheeda; Aba gideaba ng'uta NG'UTAMIIDA nihuuyda fih ghang'eada meatkweenagi bea ng'eanyiida ea gagul muudeanoodeaba niirja; Manda siida bea seayu.

¹³ Gwahista ngaano ak ghwalach halaghweenga, Gagadiiy aba uurda ak ea mwanyasa gil. Ak hean aba nyarasta ng'waan bea NG'UTAMIIDA, booga jea ghwalach gaygaba baspaseega.”

Neajeega NG'UTAMIIDA aba heeda giischeewda Israeli

¹⁴ Gwayi NG'UTAMIIDA aba badayda giischeewdeanyu munyas ghwasat ng'eaha hearaniischooda aadawji fuga Israeli gwahearan: “Ng'ula, gaydearuuteawa jeeda ng'eanyiida nyaawa, ak eara fuga Yuda gaydearuuteawa jeeda nyaawa.

¹⁵ Iinearuuteawi saawa jeedida, abeeda gaydabwayda ak gaygaba nih eadeelsi headaanyi bea hearaniischooda ea ng'eanyiidaanyi.

¹⁶ Aba ng'ata, inyas gaygwajeeng'u ak ghwaat geeshta fugeasu, nea ghwaak habeawooda aba gheawungeasu, ‘Aba gidabiideata NG'UTAMIIDA’, gawuurji gida ghayi siinaalda fugeasu aksiinda habeawooda Baali, abeeda gajeenung' ghwasaang'ayiit aba bugusta fugeasu.

¹⁷ Ama inyas gwanda eemeeda maygooleeysean iit, abeeda gaydahoan gwarita, ak ghaabwarji goosha, ng'asheanji gwarugu NG'UTAMIIDA.”