YEREMIYA 10 - Bibliyeeda Ghaydit

Badita sanaamu ea badita ASEETA

¹ Oaleaydiit ng'asheanda rukuneegwa NG'UTAMIIDA, Ea fuga gheeh Israeli.

² Gwayi NG'UTAMIIDA; “Adiidu ghoanalji geat naweadinga eemoojiga suuk, nea adiidu ghahameegwa ng'eanyi aba gwadeagwajeega humng'eeda, Aba gideaba eemoojiga inyeesa ghahamng'eanyi aba gwadeagwajeesu,

³ aba gideaba searoojiga eemoojiga gaba ng'uyeega gil; Inyeesa geelakna geeta dareabeeta, ak geesina joomooda aba geatinga siida geariir.

⁴ Ak gwajipsa buuneeda suulga sisna lapiya ea dahaabu; Ak gagulsa musumaarajeega aba yundu bwak ea mudu gwaduumduum.

⁵ Nea sanaamajeega nyaawa gawuurji gisifura dariidaka aba jeeda madamnyeanda njooriida, Aba gideaba moamu ghwanya ghuusiga nyaawa, Saawa geaghus easar aba gideaba moamu beata. Adiidu giiwali, aba gideaba moamu gwasin gea munyas, Nea eara gea miyaasiin ea moamu gwasin.”

⁶ Manda siida uurjeeweeyi Ea NG'UTAMIIDA; Ang'iing'i guwoosi haw, nea gheawungaagu gwandeawa uurda.

⁷ Heapi mayghoawalnyi ng'eaha, Ea sugoocheanda eemoojiga? Nih gidahaguuwnyi gil, Aba jeeda fuga sean bareahi iheeni bea eemoojiga ea aba heeda gheambalmoojiga nyaawa sean manda dea jea eegalaneey.

⁸ Saawa ea dasheahi nea gwanya fughareani inyas geanal aba sanaamajeega sisna geediga.

⁹ Inyeesa gweana lapiyeeda siitayi ng'eanyiida Darshishi ea dahaabu ng'eanyiida Ufasi. Haleanjeeni geesina geatinga fuga geariiri ea geatinga fuga adeanyi dahaabu; ak geekwealsa hang'weaka oomng'i ea gea woar manyaari sisna aba geatinga fuga geariirji.

¹⁰ Ak NG'UTAMIIDA ea ASEETA huumwa, niny ASEETA mideawa eaweega gil nea ea sugoocheanda manda muudeanooda gil. Aba nyarastaanyi inyeesa gwasim ng'eanyiida nea eemoojiga ea mayghoamu ghoamuughu nyarastaanyi.

¹¹ Ak abeeda giyeeshi, “Aseecheeka ghayi mwadaba humng'eeda ea ng'eanyiida gaygoosha aba badayda ng'eanyiida ea hing'eadayda humng'eeda.”

Duumda giigheambiita ASEETA

¹² Geaghus dea sin ng'eanyiida aba uurdaanyi, bwat ng'eanyiida aba weaghuumeadaanyi, Nea aba fughareadaanyi ghwanung' goowiida humng'eeda.

¹³ Iissa iinyaa ghuutaanyi gwaduumduum beega mida humng'eeda, ak ghwanung' ghang'eat dung'usta aba muudeanooda ng'eanyiida ak ghwanung' ghwahidu dadamandeeda roopta, nea ghwanung' gwariteawa jeedeaba gheanyi jeameeda.

¹⁴ Gilinyoo ea siida gil aadasha nea gwanya fughareeda; nea siida geariir adeanyi dahaabu gayghoabwaasbwaasi sanaamajeagaaschi; aba gideaba sanaamajeagaaschi gaba ng'uya, nea jeesinga nyaawa ea manda eaweega.

¹⁵ Nea ea mandeawana sheayeeda, duguuga budeayda gil, nea damanda jea eayaaga ghoorjooda gaygoosha sean.

¹⁶ Nea fuga gheeh Yakobo ea mawuurji haleanjeeni, aba gideaba niny dea sin haleanji seaniini, nea Israeli ea dooshtaanyi jea gwahearaniischeewa; nea gheawungaaschi ea NG'UTAMIIDA bea lugweega gil.

Biiknooda fuga siipaleak

¹⁷ Oamughuusha haleanjeedeang'wa agoogeeda oopiiti jeeda ghaseeda!

¹⁸ Gwayi NG'UTAMIIDA, “Ng'ula, gaydahisa jarooda aba damani fuga bea ng'eanyiida ak gaydajaksa sawanadeeda Jea ghwaduup ea gwasawana.”

¹⁹ Deashageadi aba gideaba sisawanan sawanadeedeanyu aahaw muuchi; ak geayeenyi, “Aba huumwa nih sawanadeeda, ak hean Gaydamilikghteaysa.”

²⁰ Maheemajeandeanyu sinyarja nea eara mareamarajeagaaschi sean ea sing'acheawi; ak eara diibigeasu ea ning'amwa heedeanyu hean mudu gwanda hiji; nea mudu gwanda siichea goongoor maheemajeandeanyu ak ghoabwarghaan hang'weakeasu.

²¹ Jeagiischoodiga ea dasheahi aba gideaba moobearsiina ng'asheega NG'UTAMIIDA; hean aba ng'asheanji ea mwanyasa nyageadayda, nea hawanyoojiga gisilga nyaawa ea nidarda.

²² Oaleaydiit, nyeashta! Ng'ula ghwahidu– giijasta haw nea gwaleabu wiilooda ng'eanyiida ghayeawa jea ghwanung' ghoah mujiinajeega Yuda raghoonyeanda, ghoah shoomeanga fureayoonga.

²³ Ghaanali, Ea NG'UTAMIIDA, siida marachi gil eaweagaaschi, mii siida gil jea ghoamu ghoadoabiiw naweadingaaschi.

²⁴ Miina gheanyangeasu, Ea NG'UTAMIIDA, aba doobiiwnata; nea mii aba nyarastaang'u gil ea meeshealani.

²⁵ Ageala nyarastaang'u heeda eemoojiga mwanalnyi, ea heeda fuga maguuriisiina gheawungaagu; aba gideaba nibwar jeacheenga Yakobo, ak ghwanung' ghoah eemeega gealga nyaawa.