YEREMIYA 1 - Bibliyeeda Ghaydit

Yeremiya

¹ Ng'asheega Yeremiya, was orjeeda Hilkiya bea jeeda ashoohoodiga ghayi mida Anatoti was ng'eanyiida Benjamini,

² hean ghwahidu headaanyi ng'asheanda NG'UTAMIIDA aba damanda Yosiya was orjeeda Amoni nea abeeda niny ea sugoocheanda Yuda gil aba gweaydeaba damasamwagu bea gheambalmeadaanyi.

³ Ak ghwahidu ng'asheanda ASEETA gicha damanda Yehoyakimu was orjeeda Yosiya was sugoocheanda Yuda, bwak ea gagul muudeanooda gweaydeaba damwanagi bea Sedekiya orjeeda Yosiya, was sugoocheanda Yuda, bwak ea gagul sheedeaba muut bea giibaleakta fuga Yerusalemu gaweay ghealooniga.

Guursiinda Yeremiya

⁴ Hean ghwahidu heedeanyu ng'asheanda NG'UTAMIIDA ak gwayi,

⁵ “Gheata miidasinyi aba jeeda geamadu goola danalnyi, nea gheata miyeejiilnyi ea goola daaghaydiinyi; nea ea naaloacheey was sibaneeda eemoojiga.”

⁶ Ng'ata geayeenyi, “Ea NG'UTAMIIDA was ASEETA, Ng'ula aniini mwammuusi baloolda, aba gideaba gutawoos mwanang'.”

⁷ Ng'ata gwayeeshiinean NG'UTAMIIDA, “Adiidu giyeeni ‘aniini geawooschi mwanang'’; aba gideaba gajuna heeda fuga ajeaktaneey, ak gayrukuta gilinyoo darukuneey.

⁸ Asi adiidu gibeali, aba gideaba geendeayi nea gaydaweanyi, gwarugu NG'UTAMIIDA.”

⁹ Ng'ata gooheagu geatindaanyi NG'UTAMIIDA ak ghawaap ghuuteanyu; ak gwayi NG'UTAMIIDA, “Ng'ula naayiinyi ng'asheegeasu ghuutaang'u.

¹⁰ Asi ghamneawa naayiinyeeyi iheenga eemoojiga ea gheambalmoojiga, ak gayloata nea gibarsi ng'eanyi, ak gaydatasa ak gijakti ng'ata gaydeasa nea gihisti.”

Giirgweat iyeenya

¹¹ Ng'ata ghawunu heedeanyu ng'asheanda NG'UTAMIIDA, ak gwayi, “Gidaahi naaha Yeremiya?” Ng'ata geayeeshi, “Ghaadaayi damealeanda ghuyeanda.”

¹² Hean gwayeeshiinean NG'UTAMIIDA, “Gididaahi ghwadoabiiw, aba gideaba geafurji dadaah gichea gaweeda ng'asheandeanyu.”

¹³ Ng'ata ghwaan ng'asheanda NG'UTAMIIDA heedeanyu deaba iyeenya, ak gwayi, “Gidaahi naaha?” Hean geayeeshi, “Ghaadaayi dahuuda lalach nea gwanda wiilooda ng'eanyiida ghayeawa nea niing'arooga nea googealnean ghuuta.”

¹⁴ Ng'ata gwayi NG'UTAMIIDA, “Gaygwaleabu munyinda wiilooda ng'eanyiida ghayeawa ak gaygoobisa fuga sean mida jeeda ng'eanyiida.

¹⁵ Ak gwayi NG'UTAMIIDA, gaydaguursa eemoojiga sean bea gheambalmoojiga bea wiilooda ng'eanyiida ghayeawa; ak gayghapka ak gaba nih miinda gheambalmeadaanyi aba gidaghuudajeega Yerusalemu, ea ghamardaanyi sean neaweesa, ea mujiinajeega sean bea Yuda.

¹⁶ Ak gaydeargweaksa fugeasu aba gideaba nisin riing'eeda nea ea nijaktaneani, ak gagwardeaysa haleanjeeda ng'andidi aseecheeka suuk, ak ghaghadoawan gadiyoojiga geatinga nyaawa.

¹⁷ Ak ang'iing'i giradi leabadayeeka geakaagu, ak ging'eadi ak girukusi saawa ng'asheega sean earukuneey. Adiidu gibeali aba madeeda nyaawa, adiidu ghaanung' giyooniida aba madeeda nyaawa.

¹⁸ Asi ng'ula ghamneawa gajuurjeewana mujiinajeega sineaweesa hilooga, ea daranajeega gharinga, ea ghamarda gharinga, jea ghoadeal ng'eanyiida sean, ea sugoodiga sean bea Yuda, ea fuga nyaawa hees, ea ashoohoodiga nyaawa ea fuga sean bea ng'eanyiida.

¹⁹ Ak gaygang'ucheeweeyi; nea ea mayghoamu ghwajoarnyi, aba gideaba geendeayi sea ang'iing'i nea gaydaweanyi, ng'asheanji gearugu aniini NG'UTAMIIDA.”