Yakkobo 1 - Bibliyeeda Ghaydit

¹ Yakobo, was soomjeanda ASEETA ea dea Ng'utamiida was Yesu Gristo. Heeda eemoojiga atamaniyeenya dardaawaat: Seayu.

Masaweega ea weaghuumeeda

² Anung' ghoah haleanjeeda sean hooseaneega, fuga eaduupcheewi, aba iisisimsimeegwa aba gilakil,

³ nea ghoanali gideaba simooda masaweegeagwa gaygwanyakneegwa milikghteayda.

⁴ Nea alooheeda gagasa gweadu gadiyeeda majeek nea goowooschi, hidaat nea mwashoadeeweegwa gil.

⁵ Asi siida wassean mida jeedeang'wa iisuunyeewa weaghuumeeda, ea damwaash ASEETA, adawi buuneesean haleanjeeda aba inyeanda jeeda, nea maygwareekusa ak gajeataw.

⁶ Ak gagasa gamus aba masaweega, nea mamwachmwaja gil, aba gideaba siida machmajiischi gawuurji laweachkweeda basooda aat jeameeda nea geeyuuk.

^7-8 Nea siida machmajiischi, nea mabwagi nea moapta ng'eanyi aba jeeda naweadingaaschi sean, adaghwarar gideaba gayghwanyas gil aba heeda Ng'utamiida.

Barbaranda ea baruureega

⁹ Anung'waada orjeeda giyeanya mwanang' ghaghwar geaw aba jeeda hooseaneagaaschi,

¹⁰ nea meanang'oocheanda ea siihiing'u, aba gideaba gawuurji deakghweeda seenga gayghang'ata.

¹¹ Aba gideaba aseeta iissa goorearu nea gweadu beasta, ak ghoaghajaam seenga; ak ghoabit deakghweadaanyi, ak goosha alooheeda. Gwasunu eara meanang'oocheanda gayghaghajaamiit aba naweadingaaschi.

Simsimda ea galaweega

¹² Ng'wanaweagaaschi siida riyeang'da iisimsim, aba gideaba iing'ata nea nijoar simsimda gayghwanyas shiipka eaweega mamuudeana ghayi bay gwaheeleesa ASEETA fugiga bwariiy ninyiin.

¹³ Asi adagwayi siida iisisimsim, “Aniini gwasimsiman ASEETA”; aba gideaba ASEETA moamu gwasimsim gidamuy ak eara niny ea maygwasimsim siida;

¹⁴ hean giliwas sih iissa geesimsim damanda sigassa nea geaghurghur aba gidida gasean.

¹⁵ Hean gidida gasa siidean iigweayiit gweadu riing'eeda; ama iidu nea nirir riing'eedida gweadu miyeeda.

¹⁶ Adeereenganeegwa, fuga eaduupcheewi aabwariinyi.

¹⁷ Gilinyoo eahaakta miy ea gilinyoo eatayda hidaat gwaleabu heetiyeada, ak ghwararang'aana heeda Bwaabwa weeshinda nea headaanyi ea manda yamoodeaba geaw ghana jirooneeda yamiteaba geaw.

¹⁸ Aba gidabwariiyda niny gwajiileasa aseasa aba ng'asheanda huumwa ak geewuurjeewi haghweega madeeda aba jeeda haleanjeadaanyi ghayi sin.

Iing'da ea sinooda

¹⁹ Hean nea ghoanali ng'asheesu, fuga eaduupcheewi aabwariinyi. Asi daba siisi wassean lamajeesa iing'da ng'asheanda, nea goojiileesa baloolda, ak ea mii asas nyaras,

²⁰ aba gideaba nyarasta siida maygwasin doobiiwnata ASEETA.

²¹ Asi oosheagiidana geat ririnnyeanda ea gasooda hawunda muy ak ghoang'waanyi aba garbabanda ng'asheandida, ammu gwaleabu gurooruunatkeagwean.

²² Nea gagasa ahuwa fuga sina ng'asheanda, adoobeacheewi iing'da ak ghwahit, nea gooreenganayi geat.

²³ Nea siida iibeachi iing'da ng'asheanda ak ghwahit, nea ghanyea masina, siisi abeeda gawuurji siida ng'ula gheamamdaanyi aba jeeda giyo;

²⁴ aba gideaba gang'ula geaw amang'ata gawa heechea gawa ama deagheata ea niroosa giduurji.

²⁵ Nea siida ng'ula deaweedeeda hidaat, jea gweadu giibaldeaba geaw, ak ghwashng'u, adaghoah siida iing'shi ramasoot gagasa ea siida sina gadiyeeda gil, siisi aba sinoadaanyi bea gadiyeeda.

²⁶ Siida iiyeesha geaw gideaba gwandeawa diini, nea mwarada ng'ushaptaanyi, nea gwareengani gurooroadaanyi, diineedeaba siisi marachi gil.

²⁷ Diineeda miy manda ririnnyeanda aba madeeda ASEETA was Ghweandean nih gil: bareasiinda bananga gil ea masiinung'weega aba jeeda sawanaduutka nyaawa, nea gifuri geaw aba ng'asheega munyas bea muunda ng'eanyiida.