SEFANIYA 2 - Bibliyeeda Ghaydit

Musooda duukuunooda

¹ Apkaani hijagi ak ghoabwachi geat, Ea eemeeda manda mureeda,

² heeda miyeeheananeey, awuurjeewana looyda siileal, heeda mii ghwahina nyarasta ng'waan bea NG'UTAMIIDA, heeda mii ghwahina eaweeda nyarasta NG'UTAMIIDA.

³ Agasa NG'UTAMIIDA, agoogeeni seaniin ooyeadayi geat ng'eanyi aba badayda ng'eanyiidean, agoogeeni oang'waanyi diigheandeani; agasa doobiiwnata, agasa eatoodeaba geat bea ng'eanyi; gwadeaba eafunyeagwa eaweeda nyarasta NG'UTAMIIDA.

Misaneeda eemoojiga neaweesa Israeli

⁴ Aba gideaba Gasa gajeenung'waneey heeda, ak Ashkeloni gayghang'unyi salgheang'da; fuga Ashdodi gajeahoan nea askweari, ak Ekroni gajealoata.

⁵ Dashageada fuga mida ghuuta basooda, eemeeda Gereti! Ng'asheanda NG'UTAMIIDA gwanda badaydeang'wa, Ea Ganaani, was ng'eanyiida fuga Filisti; gaydanung' ashealana ea ea maygwanda siida jea ghoabit.

⁶ Ak ng'eanyiida ghuuta basooda gajea heeda haghweeda gil, mida ghoorajeega jeagiischoodiga ea muhealeeda hawanda nooga.

⁷ Nea ng'eanyiini bea ghuuta basoodean gayghoah ng'eanyiida gheaptanga fuga gheeh Yuda, gayghoahaaghwa hawanda nyaawa aba hoowa, nea shing'ada gaygwalla gealga Ashkeloni aba gideaba NG'UTAMIIDA was ASEETA nyaawa gaygabareasa ak ghoaghuumda fuga nyaawa mida ghealooniga.

⁸ “Aniini naayiinyi giing'weaka fuga Moabu, ea machiideayda fuga Amoni, aba gideaba siing'eawi fugeasu ak ghaghuut geat aba badayda moonghooda nyaawa.

⁹ Asi, gideabideati,” nih ginyah NG'UTAMIIDA bea lugweega, was ASEETA Israeli, “Moabu gaygawuurji Sodoma, ak fuga Amoni gaygawuurji Gomora, ng'eanyiida jea gwarina seenga ea shoomeanga balang'da, was heeda maygwarina gil damanda manda muudeanooda. Ak fugeasu was gheaptanga gayghoang'waay saawa, ak fugeasu bea eemoojiga was gheaptanga gaygwahearan saawa.”

¹⁰ Ng'asheesu gayghwanyas aba badayda ghwarjeeda nyaawa, aba gideaba gafool nea goodiing'u geat aba heeda fuga NG'UTAMIIDA bea lugweega.

¹¹ NG'UTAMIIDA gaygwandeawa gharbeeda aba badayda nyaawa; ak gayghabwar aseecheeka sean bea badayda ng'eanyiida aba geejeeda, nea gaba nih hiysa geaw niny aba heeda mida, aba ng'eanyiissean bea eemoojiga.

¹² Eara agooga, Ea fuga Gushi, gajeabwareagwa aba ng'uta.

¹³ Ak gayghamiinda geatindaanyi googeal wiilooda ng'eanyiida ghayeawa, ak ghwanung' goosha fuga Ashuru; nea ghwanung' ghwanyas Ninawi salgheang'da, nea gawuurji heeda ghajaam eeshtearajeanda.

¹⁴ Ak gaygwalil hawanda diyeanga aba jeeda, ea diyeanga sean mida dareabeeta; murgheata ea umwaliida gaygwalil aba iheenga daranajeagaaschi; udahiihiida gayghwanya ghuuta aba seawadeeda, nea udaghuuh ghwanya ghuuta aba mughoonyeanda gidaghuuta; aba gideaba gubooyeanda sideekiida sigeanda.

¹⁵ Nih mujiineeda hoosaneat gil apteada nea gaba seayu, ak gwayi nea gabwageaw, “Aniini geandi ak ea manda nuut.” Ak ghwaktaneeyiin salgheang'da, ea heeda roocha diyeanga jarooda! Giliwas sih ng'ata gaygwajuuga aba geatindaanyi.