SARMEEDA SULEMANI 7 - Bibliyeeda Ghaydit

Ng'eedeeda

¹ Ang'iing'i guwoosi huda miy muuchi, aamiyaastaan geeshangaagu iimida geeka. Gisisinda gibeesuukaagu gawuurji, gilisin gearnoocheanda.

² Gheapooshtaang'u gawuurji ghadeeda boalboalanaat, mida difaayeeda siikuuyi. Jeadaang'u gawuurji raghwata ngaano, sineaweesa deakghweeda

³ Gidingaagu asiyeenya gawuurji dayi iyeenya was saleahooga bea mayeanda.

⁴ Gheataang'u gawuurji madalooda sideasa gujaka, gheanyangaagu gawuurji dabaschoojiga Heshboni, mida ghuuta Bet-rabi. Sareadaang'u gawuurji madalooda Lebanoni deaschi Dameski.

⁵ Shiipka uhuudaang'u gawuurji Garmeli, nea buudeega uhuudaang'u ea oomu, ghwanung' gahoosan sugoocheanda.

⁶ Ng'ula gidamiyinda, ea gidinyaanda bariinyeega aba bugusta miyeenooda

⁷ Geawundaang'u gawuurji miileanda, ak gidingaagu gawuurji haghweega miileanda.

⁸ Geayeenyi gaydading'da miileanda, ak geaptu haghweagaaschi. Gidingaagu gaygawuurji dayeega sabiibu, shearoadaang'u gawuurji rabeakghcheanda.

⁹ Ghuutaang'u gawuurji difaayeeda heeseadi. Asi difaayi gaygagulda gagal heeda ng'wasaneedeanyu aabwariinyi. Nea ghoabitbina ghuusiga gea mida ruweanga.

Gatmooda

¹⁰ Aniini geabea ng'wasaneedeanyu aabwariinyi, ak bariinyeagaaschi gwanda badaydeanyu.

¹¹ Beeni ng'wasaneedeanyu aabwariinyi, eeweaya jeeda madameega ak geepiidi jeeda gharang'weaka.

¹² Eebean eeweaya nea gudea sakteayda gil jeeda madameega sabiibu, ak geadaayi sabiibu ea niftu ghana ea niiruudu deakghweeda, ghana goomamaanga ea gaba deakghweeda; abeeda aba hoowa gaydaahiimneey bariinyeegeasu.

¹³ Gahawu shearooda sakghwiilo aba ghuusiga gealgaasa, nea gaba haghweega miyaasiin sean gea woosi ea gea eeshish, gaguuy mbeeyoosean, ak geadiiwji aba badaydaang'u ea ng'wasaneedeanyu aabwariinyi.