SARMEEDA SULEMANI 5 - Bibliyeeda Ghaydit

Ng'eedeeda

¹ Geawi jeeda boostaaneedeanyu, ng'wasaneedeanyu, ea huda eanyearayi, geaptu geedigeasu ng'andidi, ghaayaaji bearga maleedeanyu ea maleedeanyu, ghaaleayi difaayeedeanyu ea eanoogeasu. Ayeagiischeena, ea fugeasu eaduupcheewi, ak gooleeshi aleaha muuchi fugeasu aabwariinyi.

Gadeemga Duumdeaba ang'wan Gatmooda

² Aniini gealili nea gurooroodeanyu ghoang'wearu. Aleaydiit ng'wasaneedeanyu aabwariinyi gagulgul gidaghuuta. “Jaada gidaghuuta huda giyeanya ng'wasaneedeanyu aabwariinyi, ghariibajeandeanyu, ng'wasaneedeanyu doabiiwaat, aba gideaba uhuudeanyu nibwar rahooda, buudeegeasu ea nibwar shishihandeedeaba eawa.”

Ng'eedeeda Gatmooda

³ Naafwakti hang'deanyu gaydeashuuptaan? Neahuunyi geeshteanyu gaydang'utaan ririnnyeanda?

⁴ Ng'wasaneedeanyu aabwariinyi iinea ghwayiin geatindaanyi gidaghuuta, hean gahoosan gurooroodeanyu muuchi.

⁵ Hean ghaang'eachi dajeasa gidaghuuta ng'wasaneedeanyu aabwariinyi, ak gwadukuta geatingeasu geediga ng'andidi, nea ghoabitbina mooringeasu geediga ng'andidi, damanda aajaadi gidaghuuta.

⁶ Ak geajeasi ng'wasaneedeanyu aabwariinyi, nea ghana ng'wasaneedeanyu aabwariinyi ea niyam geaw ak gawa. Damanda baloola, ghwanung' gang'weela gurooroodeanyu. Geagasayi niny ak ea mwaanyasi, geaguursi niny ak ea manyeara.

⁷ Ghwadaahan furiischoodiga neay aba mujiini, ak ghabwaran ea gwasawanan, ak ghoareadan eaghwadeanyu furiischoodiga mujiini.

⁸ Geamuscheegwa ea haweega Yerusalemu, iyoadaayi ng'wasaneedeanyu aabwariinyi, goorukusi niny gideaba ghaahiili aba bariinyeega.

Gadeemga

⁹ Neada siisi itaang'u ibwariinyiin ghang'al suurja sibwariiy, ang'iing'eeda iwoosi miy aba jeeda gadeemga, Neada siisi itaang'u ibwariinyiin ghang'al suurja sibwariiy eara ang'iing'i gaysapsaptuneasa?

Gatmooda

¹⁰ Ng'wasaneedeanyu aabwariinyi ea eesh ak gwandeawa uurda, nea geawal gheang'da aba jeeda fih sagalamnyooji damanamughuush.

¹¹ Uhuudaanyi gawuurji dahaabu siguura dahaabu, buudeagaaschi naysooriida ak ea duwas ghawaar udaghuuh.

¹² Gheanyangaaschi gawuurji ghariibajeega, mida ghuuta eenda mida beega, nea geehuunda eanooga, ak geepteada aba badayda eenda nyiit.

¹³ Madeang'akaaschi gawuurji deakghweeda geeta siguura rihaani, uurji boostaaneeda nyiit shearooda ng'andit. Nyawuutkaaschi gawuurji deakghweeda, abitpina ghuuta dayeega geediga ng'andidi.

¹⁴ Geatingaaschi gwaneaweesa mulmulanga dahaabu, saseadaanyi gawuurji gujaweeda beeshta, siyeash aba oormeeda meajea oomu.

¹⁵ Geeshangaaschi gawuurji daranajeega eashish siyiin uhuuda sindeeta dahaabu siguura dahaabu. Ratoadaanyi gawuurji Lebanoni, ak ea majeekcheewi gawuurji geediga gubooyeeka.

¹⁶ Ghuutaanyi ghwanyiit ng'asheega miyaas, aba huumwa aamiy muuchi. Nih ng'wasaneedeanyu aabwariinyi, ak nih ea ng'wasaneedeanyu eaduupcheewi, Ea haweega Israeli.