SARMEEDA SULEMANI 1 - Bibliyeeda Ghaydit

Duumda madeeda

¹ Duumda miy bea Sulemani ng'al suurja.

Gatmooda

² Samwa gheateanyu aba ghuutaang'u! Aba gideaba bariinyeagaagu ghang'alda ea ghwanaawa difaayi.

³ Nagheadaang'u siyeeriida ea ng'andit shearooda, gheawungaagu gawuurji nagheeda siitalealu, ak ghoah gidabwariiydaneey gadeemga.

⁴ Aadaan, ak geeweayi nea geahali geat; ak guwoosi sugoocheanda ak giyaachaan jeeda ghooriidaang'u. Gajeeng'weela aniini ea ang'iing'i nea geabea hooseaneega aba badaydaang'u. Gajeerukwiida bariinyeagaagu ea ghang'al difaayi, ak ghoadoabiiw gidasibwariiydaneey.

⁵ Aniini ghaawaschi duw muuchi, ak ghaawaschi miy, ea haweega Yerusalemu ak geawuurjeewi maheemajeega Gederi nea geawuurjeewi hang'weaka beashooda bea Sulemani.

⁶ Adoosawiisean aba gideaba ghaawaschi duw muuchi, aba gideaba nighwardanaan daknooda. Ninyareeksean orjooga iyya Ak geanung' doaw furiischoocheanda madameega sabiibu, nea madamnyeandeanyu ea meafuri.

⁷ Goonean iita, ang'iing'eeda aabwariinyi aba gurooroodeanyu, noagaagu gajahaaghwana yeenu askweari gaygwalla yeenu. Ghwasaan anda geawuurjeewi siida neay mwadaagha aba murdeeda nooga fugaagu iduupcheewi.

Ng'eedeeda

⁸ Iiminali, ea ang'iing'eeda iwoosi miy aba jeeda gadeemga, Una aada geeshta nooga ak giihaaghwi dayeega noagaagu, aba murdeeda maheemajeega jeagiischoodiga.

⁹ Ng'wasaneedeanyu aabwariinyi geagalaneey faraasajeega mutukwajeega Farao.

¹⁰ Madeang'akaagu aamiyaas aba surumga gheataang'u aamiy aba surumga sisna lagheanga haw sheaya.

¹¹ Gajeesineey surumga sisna dahaabu, nea gifungajeagaaschi geesina lagheanga sisina lapiya.

Gatmooda

¹² Damanda mideewa sugoocheanda badayda hoorgeadaanyi gahawu shearooda ng'andit bea nagheedeanyu.

¹³ Ng'wasaneedeanyu gawuurji shageeda mida geediga ng'andidi aba daghateanyu.

¹⁴ Ng'wasaneedeanyu aabwariinyi gawuurji deakghweeda dareabeeta aba guumda sabiibajeega mida Engedi.

Ng'eedeeda

¹⁵ Ng'ula, guwoosi miy; ng'wasaneedeanyu aabwariinyi, ng'ula, guwoosi miy; gheanyangaagu gawuurji gea ghariibajeanda.

Gatmooda

¹⁶ Ng'ula, guwoosi miy, ng'wasaneedeanyu aabwariinyi; aba huumwa ghabwariinyeey, bulaliideanya badayda nyeega nyawiiri.

¹⁷ Daranajeega gheedeanya gubooyeeka gil, ak ng'udanga ea geeta siguura beroshi gil.