SAKARIYA 8 - Bibliyeeda Ghaydit

Gaygabiikta Ng'utamiida gayghoadaw ghawooda fuga Yerusalemu

¹ Hean ghwahidu heedeanyu ng'asheanda NG'UTAMIIDA bea lugweega ak gwayi,

² “Gwayi NG'UTAMIIDA bea lugweega, aniini ghaalaji ghuut badayda Sayuni ak ghaalaji ghuut muuchi, ak ghaalaji ghuut aba nyarasta haw.

³ Gwayi NG'UTAMIIDA gaydabiikta Sayuni, ak gaydeabiida bugusta Yerusalemu, nea Yerusalemu gajeeguura mujiineeda huumeanda, nea giijeeda NG'UTAMIIDA bea lugweega geeguura giijeeda ghaydit.

⁴ Ak gwayi NG'UTAMIIDA bea lugweega; Gweargwa woosi ea gadeemga woosi gaygabiikta gicha goobiitpiit aba naweadinga Yerusalemu, nea gaba siisi mideawa bileangida aba geatinda aba gideaba niwaasiit muuchi.

⁵ Nea naweadinga mujiini gayghwanyiit orjooga ea haweega nea ghang'was aba naweadinga.

⁶ Gwayi NG'UTAMIIDA bea lugweega, ng'asheanji eara hang'waay aba madeeda boosteangeaba fiisu bea askwearjoojisuun, heapi! Gayghoah ng'asheanda hang'waay aba madeedeanyu? Gwarugu NG'UTAMIIDA bea lugweega.

⁷ Gwayi NG'UTAMIIDA bea lugweega, Ng'ula gaydalealu fugeasu, ghang'eada ng'eanyiida ghayeawa ea ghwahita ng'eanyiida biyeara;

⁸ ak gaydeadu saawa goobiida bugusta Yerusalemu, ak gayghoah fugeasu nea ghaahuuyi ASEETA nyaawa, aba huumwa ea doobiiwnata.”

⁹ Gwayi NG'UTAMIIDA bea lugweega, “Oomajeegiida geatingeagwa, agoogeeni askwearjoojisu eayiinyi ng'asheesu nea gwarukuneegwa sibangean, ghayi mida eaweeda siyiina sindeeta gheeda NG'UTAMIIDA bea lugweega nea abeeda gajeadeas gheeda sibata ASEETA.

¹⁰ Aba gideaba heeda mii ghwahina damandida, manda gidageatinda siitaw siida ghana gidageatinda siitaw diyeayda, ak ea manda hoyyoo aba dea weah ghana dea hidu aba weajoocheanda, ak geasiksi gaba ng'uchi sea siisi mideawa.

¹¹ Ak ghamneawa ea maydahinda boosteang'su bea fiisuun, gidaghayi eahindi giika bea mwadiin gwarugu NG'UTAMIIDA bea lugweega.

¹² Aba gideaba gaydabiikta deadu hoyyoo jeeda ng'eanyiida ak gayghwaroabwanda gideaba galeagasean, ak gaygwaji ng'eanyiida booga nea gwaji sabiibu muuchi ak gaydaadaw fuga abit bea eemeeni haleanjeeni seaniin ghoah gea nyaawa.

¹³ Ak gaygawuurji gili ghayi simwaashtaneegwa aba bugusta eemoojiga, Ea fuga gheeh Yuda ea fuga gheeh Israeli, ak nih ea gichea dalealdeaydaneegwa gil ak gajoowoosa fuga nyas ghawooda. Adoabeali, oomajeega geatingeagwa.”

¹⁴ Gwarugu NG'UTAMIIDA bea lugweega gideaba, “geagasayi dasimaneegwa gidamuy, aba damanda ghayi anyareasan ghweanigeagwa, ak ea mii ghwayamwa fughareedeanyu gwarugu NG'UTAMIIDA bea lugweega,

¹⁵ hean ak geagasayi askwearjoojisu gicha dasima ng'asheega miyaasiin fuga Yerusalemu ea fuga gheeh Yuda, ak ea adoabeali.

¹⁶ Suh gichea asina gil, daba siisi abaloola nuut ng'asheega huumwa, asina girgweageeda huumwa, was girgweageeda mideawa hoyyoo aba ghuusiga dooshingeagwa.

¹⁷ Asi siida adagooteemsheesa ng'asheega munyas aba jeeda gurooroadaanyi aba badayda siinuut, ak ea adoabwariinyi agita habeawooda ng'uyeega, aba gideaba suh seaniin gea aasichi gil, gwarugu NG'UTAMIIDA bea lugweega.”

¹⁸ Ak ghwahidu gicha heedeanyu ng'asheanda NG'UTAMIIDA bea lugweega ak gwayi,

¹⁹ “Gwayi NG'UTAMIIDA bea lugweega: Giiluuldeaydeaba geat bea sheedeaba ang'wan ea sheedeaba muut, ea sheedeaba ispwa, ea sheedeaba damanamughuush, gayghoah hooseaneega ea ng'weelooda, nea ghoah ghweelmeeda haw aba fuga gheeh Yuda, asi abwariinya doobiiwnata ea hoyyoo.

²⁰ “Asi gwayi NG'UTAMIIDA bea lugweega, Gayghwahidu damanda jea ghwahina fuga jea gwaleabu mujiinajeega saang'a jea ghapka Yerusalemu;

²¹ ak gaygwayeesha fiispa mujiinajeanjagi gea mujiinajeega suurja, ‘Asi eeweaya heechea eeweaya nea gealamwaji eabwada NG'UTAMIIDA Hoauur nea geegasayi NG'UTAMIIDA bea lugweega ak eara aniini gaydawa.’

²² Fuga saang'a ea eemoojiga mideawa uurjeenga, gayghapka gagasa NG'UTAMIIDA bea lugweega aba Yerusalemu, nea geabwat NG'UTAMIIDA nea geegasa ghawoadaanyi.

²³ Gwayi NG'UTAMIIDA bea lugweega, aba damandida fih damanamughuush bea gilinyoo ea iita eemoojiga gil gayghoang'waay weeleeda hang'da fuga Yahudi nea gwayi, ‘Gajeeteayeena sea agooga, aba gideaba ASEETA gwanda heedeang'wa.’”