SAKARIYA 7 - Bibliyeeda Ghaydit

Iita giiluuldeaydeaba geaw

¹ Hean gweaydeaba ang'wan bea sugoocheanduumeeda Dariyo, ghwahidu ng'asheanda NG'UTAMIIDA heeda Sakariya eaweedeaba ang'wan bea sheedeaba shageash siguura Gisilefu.

² Abeeda fuga ng'eanyiida Beteli abeeda niijeakta Sharesa ea Regem-meleki ea fuga nyaawa, gideaba gamus alooheeda NG'UTAMIIDA.

³ Ak geanyaash ashoohoodiga gheeda NG'UTAMIIDA bea lugweega ea sibanga, nea gwayeesha, “Heapi gamiisean gideaba gaydeayeawda nea gealuuldi geaw sheedeaba muut gawuurji gidaghayi easindi gweanyeekiga ng'ataan?”

⁴ Hean ghwahidu heedeanyu ng'asheanda NG'UTAMIIDA bea lugweega ak gwayi,

⁵ “Rukusiina buuneesean bea ng'eanyiida ea ashoohoodiga, gideaba damanda ghayi ooluuldeawi geat nea gooyeawdi nea sheedeaba muut gil, ea sheedeaba ispwa, aba gweanyeeksu alaadam ea damanispwaan, abeeda gooluuldi geat aba badaydeanyu?

⁶ Nea damanda ooyeagiischeewi nea gooleeshi, heapi mooyeagischeeni aba badahuukeagwa, nea mooleesheeni aba badahuukeagwa?

⁷ Heapi! Suh mii ng'asheega rugu NG'UTAMIIDA aba ghuuta sibangeaba garayi damanda ghayi abiideewa Yerusalemu buuneeda nea ghwanyagaada nea abeeda geeneaweesa mujiinajeagaaschi, nea abeeda ng'eanyiida Negebu ea Shefela goobiida buuneeda?”

Nyoota mureeda gwaji giibaleakta

⁸ Hean ghwahidu ng'asheanda NG'UTAMIIDA heeda Sakariya ak gwayi,

⁹ “Gwayi NG'UTAMIIDA bea lugweega, Asina girgweageeda huumwa, ak ea daba siisi samsa nea ghabwayda orjeeda ghaamwat;

¹⁰ adoareachi masinung'weanda haleanjeadaanyi ghana bananeeda, ghana rabascheanda, ghana siida bwarbwar ghana siida wassean mida jeedeang'wa adagooteemsheesa ng'asheega munyas aba badayda orjeeda ghaamwat aba gurooroadaanyi.”

¹¹ Nea fiisu ghaheawa gooleeysiit ak goofuursa badahuuka nyaawa nea gwadukuta iidiga nyaawa ea mayiing'shi.

¹² Ghoahang'waay gurooruunatka nyaawa ea gawuurji lagheaneeda gideaba adaghwayiiy deaweeda ea ng'asheega NG'UTAMIIDA bea lugweega, ghayi ajeakteawa gurooroadaanyi aba ghuuta sibanga madeeda. Asi gayghwahidu nyarasta haw bea NG'UTAMIIDA bea lugweega.

¹³ “Geaguursi ak ea mayiing'shi, asi gaygaguuru saawa ak ea maydealeeysiit”, gwarugu NG'UTAMIIDA bea lugweega.

¹⁴ “Ak gaydaadaarda saawa aba jeameeda ng'waan gaweay jeeda eemoojiga sean mwanala. Ak ng'eanyiida nung'usa heeda saawa gayghang'ut salgheang'da, nea manda siida neay aba jeedeaba ng'eanyiini, ghana dea biigu aba gideaba ng'eanyiida ghayi miy geanung' ghang'ut salgheang'da.”