SAKARIYA 6 - Bibliyeeda Ghaydit

Giihiimnooda mutukwaji ang'wan

¹ Hean aang'weardi gicha ghaadaayi mutukwaji ang'wan bea ng'ucheeda, nea gwarina dang'adiga giijeega asiyeenya; ak giijeesu ea giijeega mideawa lagheanga oomng'i gil siguura shaaba.

² Mutukwajeanda madeeda goongiir faraasajeega areeri, nea mutukwajeandeaba iyeenya goongiir faraasajeega duwas,

³ deaba samwagu goongiir faraasajeega eashish, nea mutukwajeandeaba ang'wan, goongiir faraasajeega murjeew.

⁴ Hean geayeeshi malaykajeandida abaloolaniin, “Suh naaha gil ng'utamiideanyu?”

⁵ Ak ghwasha malaykajeandida ghuuteanyu ak gwayi, “Suh gwarina meadajeega asang'wan bea humng'eeda, nea gwaleabu madeeda NG'UTAMIIDA bea ng'eanyiisean.

⁶ Gawa mutukwajeandida angiir faraasajeega duwasiin, nea gagal wiilooda ng'eanyiida ghayeawa, nea faraasajeega eashish gaweay nea gwarakta, nea giika murjeewiin gaweay nea gagal wiilooda ng'eanyiida biyeara.”

⁷ Nea giika areeriin ghapka ak gagasa gwaneaweesa ng'eanyiida; ak geeyeesha, “Aweayeena aneaweesiina ng'eanyiida.” Hean gaweay gwaneaweesa ng'eanyiida.

⁸ Hean gaguurnean ak gwayi, “Ng'ula giika gal wiilooda ng'eanyiida ghayeawaan ninung' ghahawda gurooroodeanyu aba wiilooda ng'eanyiida ghayeawa.”

Geataw Yoshuwa gadiyeeda

⁹ Ak ghwahidu heedeanyu ng'asheanda NG'UTAMIIDA ak gwayi,

¹⁰ “Ang'waanya haleanjeeda fuga leabu giibaleakta was geaba Heldai ea Yedaya, ak guwi eaweecheanji gheeh Yosiya was orjeeda Sefaniya was gheeda ghayi weay damanda biikna Babeli.

¹¹ Nung' gagoonyi saawa lapiya ea dahaabu ak gisini shiipka ak giyiini uhuuda Yoshuwa, was orjeeda Yehosadaki was ashoohoocheanda haw;

¹² ak giyeeshi niny, gideaba ‘gwayi NG'UTAMIIDA bea lugweega, “Ng'ula, siida ridu gheawungaaschi was Damealeanda ak gwaheedu aba heeda mida, ak ea dea jea gwadeeksa NG'UTAMIIDA gheeda sibata ASEETA gil.

¹³ Niny gaygwadeeksa NG'UTAMIIDA gheeda sibata ASEETA, ak gayghwanyas giigheambiita, ak gaygoopteada ak goombaliischi. Ak gaygawa ashoohoocheanda hoorgeadaanyi, bea sugoocheanduumeeda, ak gaygagadiiy duwaawi nea gaba hoyyoo.”’

¹⁴ Ak shiipkiga gajiina jeeda gheeda sibata ASEETA, ghoah giipkeata geaba Heldai ea Dobiya, ea Yedaya ea Yosiya orjeeda Sefaniya.

¹⁵ “Nea gayghapka fuga leabu heesheagi ghwadeas gheeda sibata ASEETA bea NG'UTAMIIDA, ak gajanala gideaba goojeaknean heedeang'wa NG'UTAMIIDA bea lugweega; nea ng'asheesu gayghwahidu iyoamwaschi ng'asheega NG'UTAMIIDA was ASEETEANG'WA.”