SAKARIYA 5 - Bibliyeeda Ghaydit

Giihiimnooda gitaabooda neay aba humng'eeda

¹ Hean geagatgachi gheanyangeasu gicha, ak ghaadaayi gitaabooda neay aba humng'eeda.

² Ak gwayeeshiinean, “Gidaahi naaha?” Hean ghaashaayi ghuutaanyi nea geayeeshi, “Ghaadaayi gitaabooda neay aba humng'eeda; nea geawundaanyi ea geatin diktam gil, ak murdajeagaaschi ea geatin damanamughuush gil.”

³ Hean gwayeeshiinean, “Nih mooshteayda rita gawa ng'eanyiisean gil, aba gideaba gilinyoo gwajagwadiischi gajeegeanda eang'aamwa badayda ng'eanyiida, meatkweeda niirja, nea dea ak habeawooda earada gajeegeanda eekeal meatkweeda niirja.

⁴ Gwayi NG'UTAMIIDA bea lugweega gaydeajeakta mooshteawi gawa jeeda gheeda siida jagwadiisachi ea jeeda gheeda siida aga habeawooda ng'uyeega aba gheawungeasu, ak gaygoobiida bugusteaba gheanyi, ea ghwanung' goosha sea darearjeakaaschi ea lagheangaaschi.”

Gatmooda siihiimu mida jeeda sooscheanda

⁵ Ng'ata ghwahidu malaykajeandida abaloolaniin ak gwayeeshiinean, “Gatgada gheanyangaagu ak gidaahi gichea gwardu.”

⁶ Geayeeshi, “Naaha gil?” Ak gwayi, “Nih sooscheanda ridu gil.” Ak gwayi, “Nih riing'eeda nyaawa gil aba badayda ng'eanyiisean.”

⁷ Ng'ula sooscheanda gwandeawa ganyamda sisna ghoolghoolga, iidu nea geepis sooscheandida gwanda jeeda gatmooda.

⁸ Ak gwayeesha malaykajeanda, “Gatmooni ghoahiimu ng'asheega munyas.” Ak gwajaksa gatmooda jeeda sooscheanda ak gwadukuta ghuuta sooscheanda aba ghoolghoolga.

⁹ Iidu nea geagatgachi gheanyangeasu hean ghaadaayi gadeem iyeenya nea gwardu, nea gagalu heedeanyu, nea gweana jeameeda ng'waan meang'eega nyaawa, gawuurji gea udoombalaliida ak geegeanda sooscheandida ea eahita bugusta humng'eeda.

¹⁰ Ak geayeeshi malaykajeandida abaloolaniin, “Gajeayaat eenu sooscheanda?”

¹¹ Ak gwayeeshiinean, “Gajeayaat ng'eanyiida Shinari ak geedeeksa gheeda, ama siihiit sinooda gheeda abeeda gajeetiiw aba hoowa.”