SAKARIYA 14 - Bibliyeeda Ghaydit

Yerusalemu ea eemoojiga

¹ Asi ng'ula, eaweeda NG'UTAMIIDA ghwaan, nea haleanjeeda sigeandeawa heedeang'wa gajealajaada aba jeedeang'wa.

² Ak gaydabwadageat eemoojiga sean ghapka gang'uchi Yerusalemu. Ak geang'waay mujiini, nea geang'waanyaada fuga mida gealga. Nea geabwaanyaada gadeemga, ak gealach bugusta fuga mujiini nibiyeenya eepaleak. Nea boosteanga fuga mujiini ea mwajeasachi.

³ Hean abeeda gayghwahidu NG'UTAMIIDA ak gang'uchi sea eemeeni. Gawuurji gidaghayi ng'ucheata eaweedida.

⁴ Eaweedida abeeda geeshangaaschi gayghamiinaada aba uhuuda giijeeda saytuunajeega. Mida madeeda Yerusalemu bea meatkweeda ghayeawa, ak giijeeda saytuunajeega gayghabwaasha bugusta nibiyeenya. Ghang'eada heeda ghayeawa ea gagul heeda biyeara, ak gaygwanda hoowa moangoachiyda haw muuchi. Ak meatkweenagi bea giijeeda gayghang'eat gagal wiilooda ng'eanyiida ghayeawa, nea meatkweeda niirja gagal wiilooda ng'eanyiida biyeara.

⁵ Ak agooga gajasalda nea ghoayaachi naweeda moangoachiyda giijeegeasu. Aba gideaba moangoachiydida bea giijeegean gayghwadarda ea ghwahita Aseli. Ak gajasaldeayda gidaghayi oosaldeaydi aba damanda sawooda ng'eanyiida, bea damanda Usiya was sugoocheanda Yuda. Ak gayghwahidu NG'UTAMIIDA was ASEETEANYU, gayghwahidu nea goodeana fuga ghaydidi sean.

⁶ Nea eaweecheanji ea maygwanda jeameeda nea maygwanda gooroogeeda ghana dung'usta.

⁷ Eaweedida maygwanda misaneeda, gaygwadagu galeagasean, eara aba eawa. (Nih ghwanal NG'UTAMIIDA nea gabwa geaw.) Maygwanda askwearda ak ea maygwanda eaweeda, aba gideaba damandeaba shing'ada gaygwanda weeshinda.

⁸ Eaweedida gaygwarina beega mideawa eaweega Yerusalemu. Mwaatkwa gaygagal basooda mida heeda ghayeawa, nea mwaatkwa gagal basooda mida heeda biyeara. Ak beesu gaygagulda geayda ea muweeda.

⁹ Ak gayghoah NG'UTAMIIDA sugoocheanda aba badayda ng'eanyiisean; nea eaweedida NG'UTAMIIDA gajea agi nea eara gheawungaaschi gajea agi.

¹⁰ Ng'eanyiisean gajeayam ea gawuurji mooheeda ng'eada ng'eanyiida Geba ea ghwahita Rimoni mida wiilooda ng'eanyiida biyeareewa Yerusalemu. Ak Yerusalemu gajeetiing'u ghang'eada ghuuta dooshta Benjamini ea ghwahita dooshta madeeda. Ea ghwahita dooshta sinung' ghaghwan geaw, ak gawa ea ghwahita gheeda sideeksa uhuumba nuut bea Hanaeli, ea ghwahita heeda simuriisa difaayi bea sugoocheanda.

¹¹ Ak gaygoobiida buuneeda jeeda, nea maygudugwanda habeawooda, ak Yerusalemu gaygoobiida nea gaba hoyyoo.

¹² Nea fuga jea gang'uchi sea fuga Yerusalemu gayghwalas NG'UTAMIIDA sean aba dawni. Ak gajeenung' ghwadatas sasanuuka nyaawa iimiinaada aba geeshanga nyaawa. Ak eara gheanyanga nyaawa gayghwadatasa aba jeeda iheenga nyaawa, nea eara ng'ushapkeaka nyaawa gayghwadatasa aba jeesinga ghuusiga nyaawa.

¹³ Ak eaweedida gayghang'ut saawa muuwda haw leabu heeda NG'UTAMIIDA. Nea gaba nih ang'waay geatinda giischeewoocheandaanyi, ak gaygaba nih gatgat geatindaanyi googeal giischeewoocheandaanyi.

¹⁴ Eara fuga Yuda gaygang'uchi sea Yerusalemu. Ak meanang'oocheanduumeeda eemoojiga sean neaweesa gajeawaam dahaabu. Ea lapiya ea hang'weaka saang'a.

¹⁵ Ak geeyooni bea dawniin gaygoobisa eara faraasajeega ea nghadiga, ea ngamiyajeega, ea digeeniga, ea diyeanga sean mida jeeda museasooda.

¹⁶ Nea siida wassean ghuh bea eemoojiga sean, hidu gang'uchi sea Yerusalemu, gayghwascheang'da gilakweayda ghabwat sugoocheanda was NG'UTAMIIDA bea lugweega, nea ghoang'waay ghweelmoojiga Udahabeaschajeega.

¹⁷ Ak giliwas sih aba badayda ng'eanyiida, iimwascheang'da gawa Yerusalemu ghabwat sugoocheanda, was NG'UTAMIIDA bea lugweega, abeeda ea mayghwanyas roopta aba ng'eang'da nyaawa.

¹⁸ Nea eara fuga ng'eanyiida Misri inyas ea mwascheang'da ghana ea mwapka abeeda gaygoobisa geeyooda dawni, jea ghwalasa NG'UTAMIIDA eemoojiga maweayi ghoang'waay ghweelmeeda udahabeaschajeega.

¹⁹ Nih abeeda gayghoah lasooda Misri ea lasooda eemoojiga sean mwascheang'da gaweay ghoang'waay ghweelmeeda udahabeaschajeega.

²⁰ Ak eaweedida, beembeeyga faraasi gajeeng'oorsa ng'asheesu, “Ea ghaydit aba heeda NG'UTAMIIDA.” Nea haleanjeeda mida jeeda gheeda NG'UTAMIIDA, gaygawuurji gweerajeega mida heeda wagiida.

²¹ Ak gilinyoo ea dahuuda gil aba Yerusalemu ea aba Yuda gajeaghaydit aba heeda NG'UTAMIIDA bea lugweega. Nea fugiga adayda lukghumeedean gayghapka gageanda dabitida ak geawaala banyeega. Ak eaweedida ea maygwanda siida ageakshi aba jeeda gheeda NG'UTAMIIDA bea lugweega.