SAKARIYA 12 - Bibliyeeda Ghaydit

Giighuuyda Yerusalemu

¹ Nih giijasta leabu heeda NG'UTAMIIDA gil, aba badayda fuga Israeli. Gwayi NG'UTAMIIDA bwat humng'eeda, ghayi bwat sindeeta ng'eanyiida, nea ghoadaw siida guroorooda.

² “Ng'ula Yerusalemu gaydanung' gawuurji gikoombeeyda difaayi aba heeda eemoojiga sean neaweesa meadajeega sean, ak iing'eesa lugooda Yerusalemu, abeeda eara mujiineeda Yuda gajeeng'eesa.

³ Ak eaweecheanji Yerusalemu gaydanung' ghoah lagheaneeda durumwana aba badayda eemoojiga sean, nea fuga jea ghwasar lagheaneani gayghang'ut gidang'aniip muuchi, ak gayghabwat geat eemooji sean bea badayda ng'eanyiida aba badaydaanyi.

⁴ Eaweedida, gwayi NG'UTAMIIDA, gaydang'uda muuwda gilinyoo ea faraasi gil, nea ghaanung' gang'ul geeska siida mwanmwan. Nea aba badayda gheeh Yuda gaydajaat gheanyangeasu, ak gaydanung' gang'oowiidi gilinyoo ea faraasi gil bea buuneeda.

⁵ Ak gaygwayi fuga hees bea Yuda aba jeesinga nyaawa. ‘Fuga Yerusalemu ninyas uurda aba heeda NG'UTAMIIDA bea lugweega was ASEETA nyaawa.’

⁶ “Eaweecheanji gaydanung' gawuurji fuga hees bea Yuda dahuuda mida beasta mida bugusta ghweenga. Nea gawuurji duughuucheanda beasta mida bugusta badatka. Ak gayghwanung' goosha fuga eemoojiga sean neaweesa meadajeega sean, bea meatkweeda geatinda dugwa ea meatkweeda geatinda ghaadaam. Ama ng'ata ng'asheesu abeeda fuga Yerusalemu gaygoobiida ng'eanyiida nyaawa was Yerusalemu.

⁷ “Ak gayghanyi daadaw fuga Yuda jooriischooda. Aba gideaba giigheambiita gheeh Dawdi ea giigheambiita fuga Yerusalemu adaghaghaambiit ea ghang'al dea Yuda.

⁸ Ak eaweedida gayghwayiin NG'UTAMIIDA igeambooda iheenga fuga mida Yerusalemu. Nea dea ng'arng'ari aba bugusta nyaawa, gaygawuurji Dawdi eaweecheanji, nea gheeh Dawdi eaweecheanji gaygawuurji ASEETA. Nea gawuurji malaykajeanda NG'UTAMIIDA aba madeanyaawa. Abeeda eaweecheanji gaydanung' goosha eemoojiga sean, jea ghapka gang'uchi sea fuga Yerusalemu.

⁹ Ak eaweecheanji gaydanung' goosha eemoojiga jea ghapka gang'uchi sea fuga Yerusalemu.

¹⁰ “Gaydaadaw fuga gheeh Dawdi, ea fuga mida Yerusalemu guroorooda dagheerjeanduumeeda ea dea mooshta ASEETA. Ak saawa inyeesa ghwadaah deaghayi bwar abeeda gaygoonyahuushi aba badayda jeaptaanyi ghus, ak gajeadaah sawanadeeda aba badaydaanyi. Gawuurji siida daah sawanadeeda aba badayda duweacheadaanyi.

¹¹ Eaweecheanji abeeda gaygwanda giinyahuushooda haw aba Yerusalemu. Gawuurji giinyahuushooda ghayi bea Hadad-rimoni aba mooheeda Megido.

¹² Ak gaygoonyahuushi ng'eanyiida; gaba gheawi anyahuushi nea gabwageat. Gheeh Dawdi nea gabwageat, gadeemga nyaawa nea gabwageat. Gheeh Natani nea gabwageat, gadeemga nyaawa nea gabwageat.

¹³ Gheeh Lawi nea gabwageaw, gadeemga nyaawa nea gabwageaw. Gheeh Shimeyi nea gabwageaw gadeemga nyaawa nea gabwageaw.

¹⁴ Gealga sean abit, nea gaba geat nea gadeemga nyaawa earaga gabwageat.