SAKARIYA 11 - Bibliyeeda Ghaydit

Giibeedeayda fuga mideawa uurjeenga

¹ Ea fuga Lebanoni ajaada ghuusiga gealgeagwa; aba gideaba gayghwahidu beasta ghwaak gubooyeekeagwa.

² Anyahuusheena geediga siguura sonobaari, aba gideaba niibeada gubooyeekeagwa, ak ea niisha geediga miyaas, anyahuusheena agooga saboojiga Bashani, aba gideaba niibeada dimda mideawa uurda.

³ Ooleeysiiniit ghuuta ng'anyeeka, aba gideaba nidatasa giigheambiita nyaawa, Ooleeysiiniit ghuuta ng'adiida aba gideaba sinung' goosha dimda Yordani.

Heeluut iyeenya bea Jeagiischoodiga

⁴ Gwayi NG'UTAMIIDA was ASEETEANYU, “ahaaghwana gisilga jea eenuuseada,

⁵ fugiga shaah gisilgean gwanuuseada, ak gaweay nea meabwara, ak gwahinda geat gili mandeawana giidiinyeanda, ak gwayi fugiga shaaydaan, ‘Eakghaambiida NG'UTAMIIDA, aba gideaba neabaruurji’; ak eara jeagiischoodiga ea mabwayda saawa.

⁶ Aba gideaba aniini maydabwayda gicha fiisu bea ng'eanyiidean, nih gwarugu NG'UTAMIIDA, ak ging'ulayi gaygaba nih aayiinyi geatindeaba nuut, ea geatinga sugoocheanda, ak gaweay jeedeaba ng'eanyiini ak ea maydaweat aba geatinga nyaawa.”

⁷ Hean ghaahuuyi jeagiischoocheanda gisilga jea eenuuseada, was gisilga munyas manda uurjeenga. Ak ghaanyaschi bayi iyeenya, ak dea madeeda geaguuri dagheerjeanduumeeda, nea deaba iyeenya geaguuri guuyeeda, ak ghaahaaghwi gisilga.

⁸ Ak ghaabwarji jeagiischoodi samwagu aba jeemba sheanagi, aba gideaba neaburji aba badahuuka nyaawa, ak eara saawa ea nibur aba badaydeanyu.

⁹ Hean geayeeshi, “Mutawoos jeagiischoocheandeang'wa, dea gasa ghami dami, dea jea eabwar geabwar, ak gea abit daba siisi ak banyeespa nuut.”

¹⁰ Ng'ata geageanu bileangidida iteanyu siguura dagheerjeanduumeedean, ak geahirji ghoah iyeenya aba gideaba gaydageanda neajeedeanyu ghayi easinyi aba badayda buuneesean.

¹¹ Ng'ata geenuus neajeeda eaweedida. Nea fugiga shaah nea ghwashaayda gisilgean gang'ulean, ak ghwanal gideaba NG'UTAMIIDA gabaloola jeeda ng'asheega easinyi.

¹² Ng'ata geayeeshi saawa, “Iyoadaayi gideaba ghwadoabiiw aba heedeang'wa, googoonyi gidageatindeanyu, amoadaayi mwadoabiiwa abeeda ghoanung'waadi.” Ak geegu shiliingaji diktam ea damanamughuush ghoah gidageatindeayu

¹³ hean gwayeeshiinean NG'UTAMIIDA, “iina jeeda shiliingajeegiga atiktam ea damanamughuushiin”–ak geajaksi jeeda shageeda siitiiwiisa lapiya bea gheeda NG'UTAMIIDA.

¹⁴ Ama ng'ata geahirji bugusta bileangideanyu diita bea iyeenya siguura guuyeedean, ak ghwadatas guuyeeda Yuda ea Israeli.

¹⁵ Hean ghwalamda NG'UTAMIIDA ak gwayeeshiinean, “Huwa gicha jeagiischoocheanda marachi gil.

¹⁶ Aba gideaba ng'ula gaydeambiit jeagiischoocheanda aba jeedeaba ng'eanyiini dea mayghoahaaghwa gea rooda nea maygawa gagasa gea darda nea maygwarooba gea giishachi, nea mayghoahaaghwa dea majeek, ak gayghwaak banyeegeaba giika riisheadiin, nea ghabwaashaada budilga nyaawa.

¹⁷ Dashageada jeagiischoocheanda muy nung'wa heeda gisilga. Gidabal geenyarja gheang'daanyi bea geatinda dugwa Ak geatindaanyi gajea nighajaamiit muuchi, nea gheang'daanyi bea geatinda dugwa gajea ning'oawiit.”