SAKARIYA 1 - Bibliyeeda Ghaydit

Ng'utamiida gaguursa fugaaschi gabiigu headaanyi

¹ Aba sheedeaba sis bea gweaydeaba iyeenya waseewa Dariyo sugoocheanda, ghwahidu ng'asheanda NG'UTAMIIDA heeda Sakariya, was orjeeda Berekiya orjeeda Ido; ak gwayeesha,

² “NG'UTAMIIDA ninyareas muuchi aba badayda ghweanigeagwa.

³ Asi rukusiina saawa, gideaba gwayi NG'UTAMIIDA bea lugweega: Abiikni heedeanyu, aba girugu NG'UTAMIIDA bea lugweega, ak gaydabiigu heedeang'wa, gwarugu NG'UTAMIIDA bea lugweega.

⁴ Adoowuurjeewi ghweanigeagwa ghayi rukusa sibanga giijasteanyu nea gwayeesha, ‘Gwayi NG'UTAMIIDA bea lugweega, Anung'waada naweadingeagwa munyas, ea gadiyoojigeagwa munyas.’ Ak ea mayiing'shi nea mooleeysean iit gwarugu NG'UTAMIIDA.

⁵ Heapi ghweanigeagwa gwanda yeenu? Heapi sibanga gaygoobiida damanda manda muudeanooda?

⁶ Ak ng'asheegeasu ea huumeanyeekeasu, earukusi fugeasu bea gadiyeeda was sibanga, heapi miigwasa aba heeda ghweanigeagwa? Ak gwaduukuuna nea gwayi, Eara gwasinda gidagasiida NG'UTAMIIDA bea lugweega aba sinaweega naweadingaasa, hean ghoah gidasimaneasa.”

Faraasajeega siihiimsa sibaneeda

⁷ Eaweedeaba diktam ea aang'waan bea sheedeaba damwanagi nea sheeda siguura Shebati gil, nea gweaydeaba iyeenya gil bea sugoocheanduumeeda Dariyo ghwahidu ng'asheanda NG'UTAMIIDA heeda Sakariya orjeeda Berekiya, orjeeda Ido, was sibaneeda, ak gwayeesha,

⁸ “Ghaadaayi eawa siida mida badayda Faraasajeanda areara, ak ghamiinaada aba dang'adiga geediga was mihadaasi mida jeeda burgadeeda, ak murdeadaanyi gwanda Faraasajeega suuk areeri ea gea murjeew ea gea eashish.

⁹ Hean geayeenyi, ‘Suh naaha gil Ea Ng'utamiideanyu?’ Ng'ata gwayeeshiinean malaykajeandida abaloolaniin ‘gaydaahiimneey gidawas.’

¹⁰ Ng'ata ghwalamda siidida miinaada aba dang'adga geediga manang'i was mihadaasiin ak gwayeesha, ‘suh gea ajeagu NG'UTAMIIDA gil gwaneaweesa ng'eanyiida?’

¹¹ Ak ghwasha ghuuta malaykajeandida bea NG'UTAMIIDA miinaada aba dang'adiga geediga manang'i was mihadaasiin ak gwayeesha, ‘Geeneaweesi ng'eanyiida ak ging'ulayi ng'eanyiisean ghwasiinda.’

¹² Ghwalamda malaykajeandida bea NG'UTAMIIDEAN ak gwayeesha, ‘Ea NG'UTAMIIDA bea lugweega, gayheawana ea ghoah eeju bwayda Yerusalemu ea mujiinajeega Yuda ghayi inyareeksi gweanyeew laadam ea damanamughuush?’

¹³ Hean ghwasha NG'UTAMIIDA aba ng'asheega miyaasiin majeekcheewi rukusa malaykajeanda abalool niny.

¹⁴ Hean gwayeeshiinean malaykajeandida abaloolaniin, ‘Ajuura nea giyeeni gwayi NG'UTAMIIDA bea lugweega, aniini ghaalaji ghuuta muuchi badayda Yerusalemu ea badayda Sayuni.

¹⁵ Ak aniini geanyareeksi muuchi eemoojiga abiitpiit nea maduupa gil aba gideaba ghaanyareaschi gilimwanang' saawa aba gheadi nuwaas ghoahaat sawanadeeda.

¹⁶ Ak aba seareeni gwayi NG'UTAMIIDA, Gaydabiiksa Yerusalemu aba baydeayda haw, ak gajeedeeksa gheenyu jeadaanyi gwarugu NG'UTAMIIDA bea lugweega ak ghealooniga jea eeteena gajeesiik badayda Yerusalemu.

¹⁷ Asi oochuura gicha, aba gidarugu NG'UTAMIIDA bea lugweega: Mujiinajeegeasu gaygabiikta gamnyeeni muuchi, ak gaygabiikta NG'UTAMIIDA gicha ghwanung' ghahawda Sayuni ak gabiikta gicha ghwaloat Yerusalemu.’”

Giihiimnooda gujaka

¹⁸ Hean geagatgachi gheanyangeasu ama ng'ata ghaadaayi gujaw ang'wan.

¹⁹ Ak ghaanyaashchi malaykajeandida abaloolaniin, “Suh naaha gil?” Ak ghwasha ghuuteanyu nea gwayi, “Suh gujaka ahiimu gideaba gayghwadarda fuga Yuda gil, ea fuga Israeli ea Yerusalemu.”

²⁰ Ng'ata ghoahiimnaan NG'UTAMIIDA fih ang'wan adeang'shachi.

²¹ Ak geayeeshi, “Suh ghapka gwasin naaha?” Ak ghwasha ghuuteanyu nea gwayi, “Suh gujaka adaarda fuga Yuda gil, nea manda eara siida jea gagatkat uhuudaanyi ak ghamneawa ghapka ghang'uda muuwda nea ghwalasta gujaka eemoojiga gatgat gujaka nyaawa aba badayda ng'eanyiida Yuda, nea ghoadaarda.”