RUTI 4 - Bibliyeeda Ghaydit

Boasi ghaghi Ruti

¹ Ng'ata ghang'eat Boasi ak gawa ghuuta dooshta ak goopteada; ak ging'ulayi, buweacheanda neeki, ghayi rugu Boasi nea ghang'ata. Hean gwayeesha Boasi, “Gooni hiji, siida eaduupcheewi; apteada aba hiji”; hean gagoot ak goopteada.

² Ng'ata gageanu gwearu damanamughuush bea mujiini, ak gwayeesha, “Oopiitpiida aba hiji”; hean goobiitpiit.

³ Hean gwayeesha buweacheanda neeki, “Naomiheeda biikna ng'eanyiida Moabu, ghwashaayda weasi mwanang' bea ng'eanyiida bea siida siduupcheewi was Elimeleki.

⁴ Geateemshi ak ghaadaayi gideaba ghang'wana gearukuneey gideaba, Shaaha aba madeedeaba fiisu abiitpiit aba hijiin, ea madeedeaba gwearsu bea fugeasuun. Inyas gaylealni, abeeda gilealu; ama inyas gayraanya, girgu danal, aba gideaba manda sih nuut jea gwalealu, geaghus ang'iing'i, ama ing'ati ang'iing'i siichea ghwaduupneey ea aniini gil.” Hean gwayeesha, “Gaydalealu.”

⁵ Ng'ata gwayeesha Boasi, “Eaweeda ishaahi madamnyeanda aba geatinga Naomi, nala gideaba gishaahi Ruti was gatmooda eemeeda Moabu, was masinung'weanda nimi siyeadaanyi, ghoah gichea eeguusha gheawunga siida nimi aba hearaniischoadaanyi.”

⁶ Hean gwayeesha buweacheanda neeki, “Aniini maydaamu dalealu nea gabwageaw, adiidu ghaadataschi hearaniischoodeanyu. Geanda ang'iing'i heedeanyu atina, aba gideaba maydaamu deatin.”

⁷ Nih naweeda ghayi sina fuga Israeli aba garayi was iita lealnooda ea damanda siyamutooscheewa haleanjeeda: eemajeek ng'asheanji, inyeesa ghafwakta siyagi geekaaschi ak ghoadaw niirja, hean nih gidasiimajeekta ng'asheega gil aba Israeli.

⁸ Hean gheata eesha buweacheanda neeki Boasi, “Shaaha ang'iing'i,” ghafwakta geekaaschi.

⁹ Ng'ata gwayeesha Boasi gweargwa ea buuneesean, “Agooga goowooschi mushoodiga askweareani gideaba naashaayi aba geatinda Naomi haleanjeeda sean bea Elimeleki ea gilinyoo gaba Jiliyoni ea Mahaloni.

¹⁰ Nea eara Ruti was gatmooda eemeeda Moabu, was masinung'weanda Mahaloni, ea naashaayi ghoah gatmoodeanyu, eeguusha gheawunga siida nimi aba hearaniischoadaanyi, adiidu goosha gheawunga siida nimi aba jeeda buweadeega ea aba ghuusiga gealga fugaaschi; agooga goowooschi mushoodiga askweareani.”

¹¹ Hean buuneeda sean mida ghuuta dooshta, ea gweargwa gwayi, “Geewooschi mushoodiga. Gagasa NG'UTAMIIDA ghwanung' gatmooni jea ghwahidu gheang'uun, gawuurji Raheli ea Leya, ghayi deas gheeh Israeli. Gagasa baruura aba Efrata ak gagasa eanalnyi aba Betlehemu;

¹² nea gagasa gawuurji gheang'u gheeh Beresi, ak gwajiilsheesa Damari Yuda, aba diibiga jea gagoonyi NG'UTAMIIDA aba badaydeaba gatmooni mwanang'iin.”

Boasi ea jeacheangaaschi

¹³ Hean gageanda Boasi Ruti ak ghoah gatmoadaanyi; ak gawa heeda, ak ghoadaw NG'UTAMIIDA gweayuumeeda, ak gwaji baleanda.

¹⁴ Ng'ata gwayeesha gadeemga Naomi, “Gagasa eebadiischeesa NG'UTAMIIDA, mwanung'waneey heeda askweareani nea mindeawani buweacheanda neeki; gheawungaaschi gagasa eanal aba jeeda ng'eanyiida Israeli!

¹⁵ Niny gayghoah aba headaang'u siida jea goodeelneey eaweagaagu nea goomajeeknyi aba jeeda gwearguumeadaang'u; aba gideaba gatmooda orjeedang'u bwariinyi, ibwariinyi ea ghwanaawa orjooga ispwa, jiilu.”

¹⁶ Gageanu Naomi baleanda ak ghwayiin daghataanyi, ak ghoah siichea ghoarear.

¹⁷ Hean gang'asa gadeemga mida giischeewda gheawunga, nea gwayi, “Naomi niji baleanda.” Gaguura gheawungaaschi Obedi; was ghweanda Yese, was ghweanda Dawdi.

¹⁸ Asi suh jeacheenga Beresi gil: Beresi ghweanda Hesroni,

¹⁹ Hesroni gwaji Ramu, ak Ramu gwaji Aminadaabu,

²⁰ Aminadaabu gwaji Nahashoni, ak Nahashoni gaba Salmoni,

²¹ Salmoni gwaji Boasi, ak Boasi gwaji Obedi,

²² Obedi gwaji Yese, ak Yese gwaji Dawdi.