RUTI 1 - Bibliyeeda Ghaydit

Elimeleki ea fugeaba gheanyi gabalaksa Moabu

¹ Nea aba damanda ambaliischeewa fuga laja girgweaguutka abeeda gwanda jeeda ng'eanyiida geejeeda, ak siyagi bea Betlehemeeda Yuda gawa ghamway ng'eanyiida Moabu, niny ea gatmoadaanyi ea orjoagaaschi asiyeenya.

² Gheawungeaba siidida geeguura Elimeleki nea gheawunga gatmoadaanyi geeguura Naomi, ak gheawunga orjoagaaschi asiyeenya geeguura Maloni ea Gilioni; saawa gaba eemeeda Furati bea Betlehemeeda Yuda. Gaweay jeeda ng'eanyiida Moabu ak goobiida hoowa.

³ Hean ghami Elimelekiheeda was siyeeda Naomi, hean geepuussa orjoagaaschi asiyeenya.

⁴ Hean gageena haweega eemeeda Moabu; gheawungeaba agi geeguura Orba ak gheawungeaba niirja geeguura Ruti.

⁵ Goobiida hoowa gweanyeew damanamughuush; ak gameewa Maloni ea Gilioni, hean gatmoodida gameewa orjoagaaschi asiyeenya ea siyeadaanyi.

Naomi ea Ruti gabiikta Betlehemu

⁶ Hean ghang'eat gaweewa ng'eanyiida Moabu niny ea gadeemga orjoagaaschi, aba gideaba ghwayiiy gideaba NG'UTAMIIDA nibareasa fugaaschi aba Moabu ak ghoadaw hamita.

⁷ Hean ghang'eat gwariteawa heeda eawoojisu abiita, niny ea gadeemga orjoagaaschi asiyeenya, ak ghwaat naweeda gabiikta ng'eanyiida Yuda.

⁸ Ng'ata gwayeesha Naomi gadeemga orjoagaaschi asiyeenya, “Aweayeena, daba siisi biikta heeda ghaamwat. Gagasa gagooneegwa alooheeda NG'UTAMIIDA, gawuurji gidoosimi fiisu nimeewean ea aniini.

⁹ Gagasa gagooneegwa NG'UTAMIIDA gheamamda miy jea anyasa gealga, ak gaba siisi nyas gheeda siyeadaanyi!” Hean ghwadeapta, ak ghwajaat ghuusiga nyaawa ak gooyeawda.

¹⁰ Ama ng'ata gwayeesha saawa niny, “Manda, gajeebiikta sea ang'iing'i heeda fugaagu.”

¹¹ Hean gwayeesha Naomi, “Abiikta haweegeasu googasayi eeteayeena aba naaha? Iyoong'ulayi geandeawi aba jih diibiga orjooga jea ghoah siyeenndigeagwa?

¹² Abiikta haweegeasu, ayaada naweedeang'wa, aba gideaba naawaasiichi mudu gwanda siichea ghagheanan. Aba inyas geayeenyi geandeawi masaweega, ghana danyas siyeeda eaweani ak geajiili baleanda,

¹³ gajeamuusa eamuukghuna ea gwaheetu? Gajeamuusa afura geat ea meegheaneegwa? Manda, haweegeasu, aba gideaba ahang'waay aba heedeanyu aba gideaba ninung'wanaan heeda NG'UTAMIIDA.”

¹⁴ Hean goorareang'u shooka ak gooyeawda gicha; hean ghwadeapta Orba ghamasiyeadaanyi, nea ghwaat Ruti geeshtaanyi.

¹⁵ Ak gwayeesha, “Ng'ula, gatmooda orjeeda ghamasiyeadaang'u nibiikta heeda fugaaschi ea heeda aseecheekaaschi; biikta aada geeshta gatmooda orjeeda ghamasiyeadaang'u.”

¹⁶ Ng'ata gwayeesha Ruti, “adiidu gimuschean danung'waneey heeda, dabiikta ea meeteayeeni; aba gideaba heeda uwi eara aniini gaydawa, nea eara heeda jea abiidana gaydeabiida; fugaagu gayghoah geasu, ak eara ASEATAANG'U gayghoah ASEETEANYU;

¹⁷ heechea meewsiina gaydameewsa, ak abeeda gajeebung'sean hiji. Gagasa gwasinnean NG'UTAMIIDA ng'asheanji ak ghwaraanya muuchi, iyaheelanean miyeeda sea ang'iing'i.”

¹⁸ Hean daah Naomi gideaba gamanyiisa giideayeedaanyi, hean ghwanung'waada giibalooldaanyi.

¹⁹ Hean gaweay iyeenyeeda nyaawa ea ghwahita Betlehemu. Ng'ata nea nihita Betlehemu, hean ghahamng'eanyi fuga sean mida jeeda mujiini damanda nyas iita nyaawa; ak hean gwayi gadeemga, “Nih mii Naomihi?”

²⁰ Ng'ata gwayeesha saawa, “Adooguureewean Naomi, aguureeweani Mara, aba gideaba ASEETA hoauur nisimanean ng'asheega ng'weani.

²¹ Hean ghaabeawi hiji nea geawooschi baruur, ak goodeelneani NG'UTAMIIDA nea meandeawani gil. Ghwasaan inyas googuureewean Naomi nea NG'UTAMIIDA ea niyamsean geaw nea ASEETA hoauur ea nisawanan?”

²² Hean gabiikta Naomi sea Ruti gatmooda orjeedaanyi was gatmooda eemeeda fuga Moabu, abeeda biikna ng'eanyiida Moabu. Ak ghwahita Betlehemu damanda giing'eeta lajita ngaano.