RITEAYDA 39 - Bibliyeeda Ghaydit

Sinooda hang'weaka ashoohoodiga

¹ Ea dea gasa gwatuudu ea dea oomu ea dea areara, ak geesin hang'weaka sinap muuchi, bea gadiyeeda heeda ghaydit, ak geesin hang'weaka ghaydidi bea Haruni, gawuurji gidarukusiinda NG'UTAMIIDA Musa.

² Ak gwasin weasta daghata bea dahaabu, bea oormeeda gasa gwatuudu ea dea oomu ea dea areara ea hang'da bumbuni miy.

³ Hean geegul dahaabu ea gamaning'iidi muuchi, ak geesin gea oormeeda gasa gwatuudu, ea gea oomng'i ea gea areeri, ea gea bumbuni miyaasiin nea gwasin gearnoocheanda huumwa.

⁴ Ak geesin weasta gheata, ak geekula geat weeloojigaaschi assiyeenya.

⁵ Hean geesin ghealooda mananda sin gearnoocheanda ak geenapsa badayda weastida bea daghatean ak geerasa mananda nea ghealoodida gaba dahaabu, ea dea oormeeda gasa gwatuudu ea dea oomu ea dea areara, ea dea bumbuni miy gawuurji gidaghayi rukusiinda NG'UTAMIIDA Musa.

⁶ Ak geesin lagheanga oormeeda beari ak geayiin jeeda ghulghuloojiga dahaabu, ak geang'waarda gidasing'ooriida giirooraneeda aba gichea eang'oarda gheawunga orjooga Israeli.

⁷ Ng'ata ghwayiin badaydeaba weastida bea daghatean ghoah lagheanga giipkeata orjooga Israeli, gawuurji gidarukusiinda NG'UTAMIIDA Musa.

Sinooda shageeda daghata

⁸ Hean gwasin shageeda daghata, sin gearnoocheanda nea gawuurji gidasisinda weasta daghata, bea dahaabu, ea oormeeda gasa gwatuudu ea dea oomu ea dea areara, ea dea bumbuni miy.

⁹ Ak gooyang'deay geawunda ea murdajeega shageedida bea daghatean geesin nea geegilip nibiyeenya, geawundaanyi ea murdajeagaaschi gabeachi gheata geatinda ak geegilip.

¹⁰ Hean geanung' ghwaroap geat ghealooni ang'wan bea lagheanga ghealoanagi ea dughwaang' nea ghawaar booreega, ea gea areeri nih ghealooda madeeda gil,

¹¹ ghealoodeaba iyeenya gwanda dea nyawiish, ea dea meajea oomu ea dea meeng'meeng'i,

¹² ghealoodeaba samwagu nuut gameaji ea dughwaang', nuut ea ng'ooreadi, nuut ea oomu,

¹³ ak ghealoodeaba samwagu, gwanda dea waar booshcheanda, ea dea bwaash, ea dea mur ak dahaabu geayiin jeesinga dabita nea geanung' gwajip geat.

¹⁴ Lagheanga ea damaniyeenya jea eeng'oorsa gheawunga orjooga Israeli, ak gawuurji giirooranga, ak gaba nih sing'oorsa gheawungaaschi bea eemooji atamaniyeenya.

¹⁵ Hean geesissa shageedida bea daghatean surumnyeanda uurji ghealooda bea dahaabooda miyaas,

¹⁶ ak geesin haleanji iyeenya bea dahaabu sijip, ea gharin iyeenya bea dahaabu, ak geenapsa ghunoojisu asiyeenyean weeleedeaba shageedida bea daghatean,

¹⁷ ak geayiin surumgiga asiyeenya bea dahaabuun jeeda ghunoojigiga asiyeenya bea weeleeda shageeda daghatean.

¹⁸ Nea ghuusigeaba surumsu asiyeenyean geayiin jeemba haleanji iyeenya ak geayiin mwadi bea hamarjeeda duukusa weasta daghatean.

¹⁹ Hean geesin gharin iyeenya bea dahaabu; ak geayiin ghuusigiga asiyeenya bea shageeda daghatean, bea weeleedeaba jih bea weastida bea daghatean.

²⁰ Ak geesin gharin iyeenya bea dahaabu, ak geayiin madeeda heeda hing'eadayda weageaka asiyeenya bea daghata sirasa gheatean, neekeewa gifungajeagaaschi mida badayda ghealooda weasta daghata sisin muuchiin.

²¹ Ak gearat eemajeek shageedida aba ghunoojigaaschi ea aba ghunoojiga weasta daghata ea aba ghealooda oormeeda gasa gwatuudu, ak goobiida badayda ghealooda weasta daghata ghayi sinap muuchi, ak ea maheeli shageeda daghata ea weasta daghata gawuurji gidarukusiinda NG'UTAMIIDA Musa.

Sinooda hang'weaka suuk bea Ashoohoocheanduumeeda

²² Ng'ata ghwanap hang'da gul ng'eanyi ak ghwayiin sean oormeeda gasa gwatuudu,

²³ ak seawadeeda mida bugusta hang'da gul ng'eanyiini gawuurji seawadeeda mida hang'da gharinga ak geeneaweesa weasta seawadeedida aba gideaba adaghabwaasha.

²⁴ Ak weeleeda hang'da gul ng'eanyi geenapsa duguuga uurji haghweega geeta siguura goomamanga, bea oormeeda gasa gwatuudu ea dea oomu, ea dea areara, ea dea siireat miy.

²⁵ Hean geesin gureayeeka aba dahaabooda miyaas, ak geayiin gureayeeka bugusta duguugiga uurji haghweega geeta siguura goomamangean meadajeega sean bea goomamanga,

²⁶ gureayeeka ea goomamanga, gureayeeka ea goomamanga nea geeneaweesa weeleeda sean bea hang'da gul ng'eanyi bea gadiyeeda gawuurji gidarukusiinda NG'UTAMIIDA Musa.

²⁷ Ak geesin eara gootajeega miyaasiin sinap, bea Haruni ea orjoagaaschi,

²⁸ ea weasta miy sirasa uhuuda ea luumbayjeeka miyaas, ea gaptuulajeega miyaasiin sinap muuchi,

²⁹ ea ghealooda mananda miy siireada gulbeeda oormeeda gasa gwatuudu, ea dea oomu ea dea areara, sin gearnoocheanda gawuurji gidarukusiinda NG'UTAMIIDA Musa.

³⁰ Ak geesin gidamiy bea luumbayda ghaydit bea dahaabooda miyaas, ak geeng'oorsa badaydaanyi ng'ooruutka, sing'waardunu, “Ea ghaydit aba heeda NG'UTAMIIDA.”

³¹ Ak geerasa shiipcheandida bea oormeeda gasa gwatuuduun madeeda weastida bea uhuudean, gawuurji gidarukusiinda NG'UTAMIIDA Musa.

Giihiita gadiyeeda

³² Hean goosha gadiyoojiga sean bea maheemajeanda was maheemajeanda siroondooscheesa, ak fuga Israeli gwasinda sean gidarukusiinda NG'UTAMIIDA Musa, ak ea gidasisinda gil.

³³ Ak geeyeadu maheemajeanda heeda Musa, maheemajeanda ea dabitaanyi sean, gifungajeagaaschi, beehajeagaaschi, guhuunatkaaschi, daranajeagaaschi, ea hoorgajeagaaschi,

³⁴ ea gisidukuteawa gidaghuuta was eagweega lagweendiga ea gea ghwarayga, ea hang'da beashooda,

³⁵ ea sandakwajeanda muuwuunooda ea geedigaaschi, ea hoorgeeda baydeayda,

³⁶ measa sea haleanjeadaanyi sean ea mukaateeyda giihiimnooda,

³⁷ ea heeda siyiina gheaboonyaneeda, bea dahaabooda miyaasiin ea gheaboonyangaaschi sea hoorgeeda gheaboonyanga ea haleanjeadaanyi sean, ea nagheeda jea eayeat;

³⁸ heeda wagiida bea dahaabu ea nagheeda giimearda ea geeta siing'andiita, ea hang'da beashooda bea gidaghuuta maheemajeanda,

³⁹ heeda wagiida bea lagheanga oomng'i, ea gharinyeandaanyi oomu mideawa seawuutka, ea geedigaaschi, ea haleanjeadaanyi sean, ea harakta ea hoorgajeagaaschi,

⁴⁰ ea hang'weaka sighasta bea seamooda ea daranajeagaaschi, ea hoorgajeagaaschi ea hang'da beashooda bea gidaghuuta seamooda, ea ghealoonigaaschi ea guhuunatkaaschi, ea haleanjeadaanyi sean bea gadiyeeda maheemajeanda, bea maheemajeanda siroondooscheesa,

⁴¹ aba huuydeanda hang'weaka sigadiyeata bea gadiyeeda heeda ghaydit, hang'weaka ghaydit bea Haruneeda was ashoohoocheanda, ea hang'weaka orjoagaaschi bea gadiyeeda ashoohoodiga.

⁴² Aba ng'asheega sean rukusa NG'UTAMIIDA Musa, hean gwasin fuga Israeli gadiyoojiga sean.

⁴³ Ak ghwadaah Musa gadiyoojiga sean, ng'ula, sisin gawuurji gidarukuteayda NG'UTAMIIDA, ak ea nihit, Ak ghoadaw Musa saawa ghawooda.