RITEAYDA 34 - Bibliyeeda Ghaydit

Lagheanga baragi sing'waar deaba iyeenya

¹ Ghwalamda NG'UTAMIIDA ak gwayeesha Musa, “Sina laghean iyeenya baragi uurji giika bea madeedean, ak gaydang'oorsa badaydeaba lagheang'su ng'asheega uurji giiga bea lagheanga madeeda ghayi inyarjeawayiin.

² Woosa hidaat sakteayda, ak gidiyeani hini uhuuda giijeeda Sinayi sakteayda, ak ginyasanaan uhuuda giijeeda.

³ Adiidu gidiyeani nea giideani sih, ak ea adeadeaksi sih badayda giijeeda, ghana nooga ghana dugwa siihaaghwa aba geeshta giijeeda.”

⁴ Hean gwasin Musa lagheanga baragi iyeenya uurji giika ghayi bea mwadiin, ak gabean ghang'eat nea gudea sakteayda duw gil ak gwadiyeada gawa uhuuda giijeeda Sinayi, gawuurji gidarukusiinda NG'UTAMIIDA niny, nea ghwaada geadi lagheanga baragi iyeenya.

⁵ Ng'ata ghwararang'aana NG'UTAMIIDA jeedeaba shamooghoodida ak ghamiinaada aba murdeeda Musa aba hoowa, ak gwarukuta gheawunga NG'UTAMIIDA.

⁶ Ghang'ata NG'UTAMIIDA aba madeadaanyi, ak gwarukwiida nea gwayi, “NG'UTAMIIDA, NG'UTAMIIDA, ASEETA mideawa baydeayda haw ea alooheeda, nyarastaanyi maygabean ghwanyareas, mideawa baydeayda haw ea bariinyeega,

⁷ dea bayiida fih sagalamnyooji sagalama, nea gwasamsa munyinda ea giidiinyeanyeeka ea riing'eeda, ak ea maygwayiitiisa siida munyinda ghwanung' gawuurji gili mandeawana giidiinyeanda, ak giidiinyeanyeeka ghweaniga nyaawa gayghwayiin badahuuka diibiga ea gea diibiga nyaawa ghang'eada jeateaba samwagu ea ghoah jeateaba ang'wan.”

⁸ Hean gabuy Musa uhuudaanyi aba geeshangiga ak ghaghadoawan.

⁹ Ak gwayi, “Iinaanyaschi dagheerjeanduumeeda aba madeadaang'u, Ea NG'UTAMIIDA, geamuscheey NG'UTAMIIDA, una bugusteanya, aba gideaba fiisu eahang'oonyi iheeni, ak gisamsi munyindeanya ea riing'eegaasa, ak ginung' eehearaneeyi.”

Geebiikta eesin neajeeda

¹⁰ Ak gwayeesha, “Ng'ula, geasinyi neajeeda. Aba madeeda fugaagu sean, gaydasin ng'asheega deamdeameadi dea ghayi miyeesin aba badayda ng'eanyiisean ghana aba jeeda eemoojiga, ak fuga sean indi bugusta gayghwadaah gadiyeeda NG'UTAMIIDA, aba gideaba gaygaba muuwda gichea dasimaneey.

¹¹ “Ng'ula ng'asheanji earukuneey ghamneawean. Ng'ula, gaydahoan dearuuta aba madeadaang'u fuga Amori, ea Ganaani, Hiti, ea Berisi, ea Hafiti ea Yebusi.

¹² Shageada geaw, adiidu gisini neajeeda sea fugeaba ng'eanyiita iweesiin, adagawuurji ghuduumbwaada aba jeedeang'wa.

¹³ Gaynyarjeaweada heeda wagiida nyaawa, nea gihirjeaweadi daranajeega nyaawa, nea gilaksi ng'eanyi geediga sigadoowani bea aseecheeka siguura Asherimu

¹⁴ (ak ea maybwada aseeta nuut, aba gideaba NG'UTAMIIDA was gheawungaaschi shidoodeaba ghaang' niny ASEETA shit ghaang' gil),

¹⁵ adiidu gisini neajeeda sea fugeaba ng'eanyiita, ak gaweay gwasin hiseadayeanduumeeda sea aseecheeka nyaawa, nea ghoadaw aseecheeka nyaawa lukghumeeda ak gaguurneey akaleala aba jeenyaawa ak giyaagi hamita siitaw aseecheeka,

¹⁶ ak gayghaghi orjoagaagu haweega nyaawa, ak gaweay haweega nyaawa gwahiseada sea aseecheeka nyaawa, ak gayghwanung' gaweay orjoagaagu gwahiseada sea aseecheeka nyaawa.

¹⁷ “Adisissi geaw aseecheeka dahaabu.

¹⁸ “Gayghamwada ghweelmeeda mukaateeyda meamwaatawiida. Gajaga mukaateeyda meamwatawiida eawooji ispwa, gawuurji gidearukuteaydi nea geenda geashu damanda ghayi oorini Misri.

¹⁹ Duweachajeega sean geasu gil, gea was heewgaagu sean bea dugwa ea nooga was duweachajeega.

²⁰ Duweacheeda digeeda gajatinana dayeenda gisilleanda, ghana iimajatina abeeda gayhirja gheata. Ak duweachajeega orjoagaagu gajatina. Ak ea manda siida jea ghwahidu madeedeanyu nea gweadu geatinga ghajaam.

²¹ “Gaygadiyeena eawooji lah, ak eaweedeaba ispwa gayfuufa, damanda barooda ea damanda lajooda booga gayfuufa.

²² Ak gayghamwada ghweelmoojiga wiikajeega, bea haghweega madeeda bea lajita ngaano, ea ghweelmeeda giimughuushta haleanjeeda muudeanooda gweayda.

²³ Aba jeeda gweayda headigaagu gaygaweay niba samwagu madeeda NG'UTAMIIDA was ASEETA, was ASEETA Israeli.

²⁴ Aba gideaba gaydahoan dearuuta eemoojiga aba madeadaang'u, nea geaheedu moonghoadaang'u; ak ea manda siida jea gagasa ng'eanyiidaang'u, inyas gischeang'di una madeeda NG'UTAMIIDA was ASEATAANG'U niba samwagu aba jeeda gweayda.

²⁵ “Adisabi geadi foojeanda lukghumeedeanyu sea mukaateeyda simwatawiit, ghana lukghumeeda ghweelmeeda Basaaka adagoobiida heeda ea ghoah sakteayda.

²⁶ Haleanjeeda madeeda was haghweega madeeda bea ng'eanyiidaang'u gajeani jeeda gheeda NG'UTAMIIDA was ASEATAANG'U. Adiiwaali dayeenda mbooyda duu gwareer ghaamwat.”

²⁷ Ghwalamda NG'UTAMIIDA ak gwayeesha Musa, “Ng'oara ng'asheesu, aba gideaba aniini neasinyi neajeeda sea ang'iing'i sea fuga Israeli aba badaydeaba ng'asheesu.”

²⁸ Ak goobiida hoowa sea NG'UTAMIIDA eawooji haradam askweari ea eawa, nea mwaaga mukaate nea mwali beega. Ak gang'oorsa badaydeaba lagheangiga baragiin ng'asheega neajeeda, was digheanyeeka atamanamughuush.

Musa ghwararang'aada aba uhuuda giijeeda Sinayi

²⁹ Iidu nea ghwararang'aan Musa aba uhuuda Giijeeda Sinayi, nea gwandeawa aba geatingaaschi lagheanga baragi asiyeenya sing'waar bea muuwuunooda damanda rarang'aana Musa uhuuda giijeeda abeeda mwanala gideaba mughoowooda gheamamdaanyi niyamwa gaweeshiit aba gideaba nibalool sea ASEETA.

³⁰ Ak ghwadaah Haruni sea fuga sean bea Israeli Musa ging'ulayi niyamwa mughoowooda gheamamdaanyi ea gaweeshiit, ak geabeal ak ea mudeeneekiissa niny.

³¹ Hean gaguursa Musa saawa, ea Haruni ea fuga hees sean bea fuga bwat geat gabiigu headaanyi, ak gabalool Musa sea saawa.

³² Ng'ata ghapka fuga sean bea Israeli gwaneekiissa, ak ghoadaw saawa digheanyeeka sean abaloola NG'UTAMIIDA niny aba uhuuda Giijeeda Sinayi.

³³ Hean ahiit Musa baloolda sea saawa, gageanu gwarasa weasta gheamamdaanyi,

³⁴ nea inyeesa Musa iiweah madeeda NG'UTAMIIDA gabalool sea niny gageanda weastida, ea eaghus gwarita jarooda, ak iirita jarooda, gwarukusa fuga Israeli ng'asheega sirukusa,

³⁵ ghwadaah fuga Israeli gheamamda Musa, nea muunda gheamamda Musa ea niweeshiit, ak gageanu Musa gwarasa weasta gheamamdaanyi gicha, ea eaghus gawa gea gabalool sea niny.