RITEAYDA 32 - Bibliyeeda Ghaydit

Giduurji heeyda sisna dahaabu

¹ Iidu nea ghwadaah buuneeda gideaba Musa nishing'da ghwararang'aan aba uhuuda giijeeda, hean ghabwat geat buuneeda ak geeweesa Haruni, ak geeyeesha niny, “Ng'eada, sinneasa aseecheeka, jea gaweay madeedeanya, aba gideaba Musaheeda ghayi aruunaneasa aba ng'eanyiida Misri, meanali gida niibussa niny.”

² Ghwalamda Haruni ak gwayeesha saawa, “Ageani seangheayoojiga dahaabu mida iidiga gadeemgeagwa, ea orjoogeagwa, ea haweegeagwa, ak gooyeanean.”

³ Hean gageanu buuneesean seangheayoojiga dahaabu mida iidiga nyaawa ak geeyeassa Haruni.

⁴ Ng'ata gageanda Haruni dahaabu aba geatinga nyaawa, ak gwasin gili uurji meayda jea eebada, ak gwayeesha, “Suh aseecheekeagwa, Ea Israeli, ghayi aruunaneegwa ng'eanyiida Misri!”

⁵ Hean daah Haruni ng'asheanji ghwadeas heeda wagiida aba madeadaanyi ak gwarukusa Haruni buuneeda nea gwayeesha, “Numuji ghweelmeeda NG'UTAMIIDA gil.”

⁶ Ak geang'eatng'eat nea gudea sakteayda gil, ak geatayda haleanjeeda sisabwa geadi bea ghadooweeda sighwarda, nea geeyeada haleanjeeda sisabwa geadi bea hoyyoo, ak goobitpit buuneeda ak gweagiischi nea geeleeshi, ama ng'ata geang'eat eang'was.

⁷ Ghwalamda NG'UTAMIIDA ak gwayeesha Musa, “Rarang'aada una heeda fugaagu ghayi iiruuni ng'eanyiida Misri, aba gideaba niidiiy ak ghaheawanaan,

⁸ nibean ghwayam geat aba naweeda ghayi earukusi saawa, nisissa geat gili uurji meayda, ak geabwat, nea geataw lukghumeeda nea geeyi, ‘Nih aseecheekaagu gil Ea Israeli, ghayi aruunaneeyi ng'eanyiida Misri!’”

⁹ Ak gwayeesha NG'UTAMIIDA Musa, “Naadaayi fiisu, ng'ula fuga hang'oonyi iheeni gil,

¹⁰ biissa nung'waada nyarasteanyu ghwayeada badahuuka nyaawa, ak gaydanung' goosha saawa, ak gaydanung' huwa eemeeda haw.”

¹¹ Hean gamearmearani Musa NG'UTAMIIDA was ASEATAANYI nea gwayeesha, “Ea NG'UTAMIIDA, ghwasaan anda nyarastaang'u ghwayeat aba badayda fugaagu, ghayi iiruuni ng'eanyiida Misri aba giimuustaang'u haw ea geatinda mideawa uurda?

¹² Inyas ginung' goosha, gaygwayi fuga Misri, ‘Gooruuta gwasima ng'asheanda muy ak gwanuus saawa aba uhuuda giijeeda, ak ghwanung', goosha ghang'amwa badayda ng'eanyiida’? Eaniyean yamwa nyarastaang'u ng'waan ak ginung'waadi ng'asheanji muyiin aba badayda fugaagu.

¹³ Apkaada Abrahamu, Isaka, ea Israeli, was fugaagu bea gadiyeeda, ghayi iyeaksi habeawooda nea giyeeshi saawa, ‘Gaydanung' ghwasaang'ayiit jeateang'wa ea gwadeena miinga humng'eeda, ak ng'eanyiini seaniin ghayi earguun gaydaadaw jeacheengaagu, ak gaygwahearan damanda manda muudeanooda.’”

¹⁴ Ak ghwayam NG'UTAMIIDA gidida muyiin gwachi jea gwasima fugaaschiin.

¹⁵ Hean ghwayam geaw Musa ak ghwararang'aana uhuuda giijeeda nea gwandeawa laghean iyeenya baragi aba geatingaaschi, lagheanga sing'waar meadajeega sean, meatkweenagi ea meatkweeda niirja eara ada sing'waar.

¹⁶ Ak lagheangiga baragiin ea gadiyeeda ASEETA, ak ng'ooruutka ea ng'oorda ASEETA, sing'oorsa badayda lagheanga.

¹⁷ Hean nea ghwayiiy Yoshuwa nyeashta buuneeda nea goojuur, ghwalamda ak gwayeesha Musa, “Gwanda nyeashta ng'ucheeda aba jeeda museasooda.”

¹⁸ Ghwalamda ak gwayeesha, “Nih mii nyeashta fuga jooriischi aba ng'ucheeda gil, nea mii nyeashta fuga sijoar aba ng'ucheeda gil, aniini ghaayiinyi nyeashta fuga sarman.”

¹⁹ Hean neekiisa museasooda ghwadaah gidida uurji meaydean ea duumda, ghwanyareas Musa, ak gwahista lagheangiga baragiin aba geatingaaschi ak gwanyarjeawi aba geeshta giijeeda.

²⁰ Ng'ata gageanu gidida uurji meayda sisiniin ak ghaghwarda aba beasta, ak ghang'aal ea ghoah birjeanda, ak goodalealsa badayda beega, ak ghwanung' ghwali fuga Israeli.

²¹ Ghwalamda Musa ak gwayeesha Haruni, “Fiisu gwasimaneey naaha ea eani riing'eeda haw deenu badahuuka nyaawa?”

²² Ghwalamda Haruni ak gwayeesha, “Adaghwanyareas siideanyu haw, ang'iing'i ginali gideaba buuneeda niibita jeeda ng'asheega munyas.

²³ Aba gideaba gwayeeshiinean, ‘Sinneasa aseecheeka jea goosheedeawaneasa, aba gideaba Musa siida ghayi aruunaneasa ng'eanyiida Misri meanali gidanibussa niny.’

²⁴ Ak geayeeshi saawa, ‘Gilinyoo gwandeawa dahaabu deaheaknean’; hean ak geajaksi jeeda beasta, ak gwardu meawi.”

²⁵ Hean daah Musa gideaba buuneeda nischoarda (aba gideaba Haruni ghwanung'waada saawa ghwaschoarda, ak ghoah shikooda aba bugusta weajoodiga).

²⁶ Ng'ata ghamiinaada Musa aba ghuuta museasooda, ak gwayeesha, “Siida wassean mida meatkweeda NG'UTAMIIDA dahina heedeanyu.” Hean gabassa geat orjooga fuga Lawi headaanyi.

²⁷ Ak gwayeesha saawa, “Gwayi NG'UTAMIIDA was ASEETA Israeli, ‘Daba siisi rassa leeleemda manandaanyi, ak gawa nea ghabwat ghuuta museasooda, ak gaba nih nuus orjeeda ghaamwat, ea nih nuus siituupchi, ea nih nuus giischeewoocheandaanyi.’”

²⁸ Hean gwasinda orjooga Lawi gidarukusiinda Musa, ak eaweedida geabwar fih sagalamnyooji samwagu.

²⁹ Ghwalamda Musa ak gwayeesha, “Eanean oombiida geat aba gadiyeeda NG'UTAMIIDA, aba gideaba mii ahirbabana aba siida nuus orjeedaanyi ea orjeeda ghaamwat, ak gagooneegwa ghawooda eaweecheanji.”

³⁰ Sakteayda gwayeesha Musa buuneeda, “Noosinyi riing'eeda haw. Ak ghamneawa gaydascheang'da dawa heeda NG'UTAMIIDA, ak gaydasin giiduupcheeda aba riing'eedeang'wa.”

³¹ Hean gabiikta Musa heeda NG'UTAMIIDA ak gwayeesha, “Uu, fiisu nisin riing'eeda haw aba gideaba gwasissa geat aseecheeka dahaabu.

³² Asi samsiina riing'eeda nyaawa ak iimaysamsiina geamuscheey geanda gheawungeasu ghayi ing'waari aba jeeda gitaaboadaang'u.”

³³ Ghwalamda NG'UTAMIIDA ak gwayeesha Musa, “Siida was sean sinnean riing'eeda gaydageanda gheawungaaschi aba jeeda gitaaboodeanyu.

³⁴ Asi una asheedeawana buuneeda ea ghwahita heeda ghayi earukuneey, ng'ula, gaygoosheedeaweey malaykajeandeanyu. Eaweeda jea dahina deargweaksa, gaydeargweaksa aba badayda riing'eeda nyaawa.”

³⁵ Ak ghwalas NG'UTAMIIDA buuneeda aba geeyooda, aba meaydida sisin ghayi sin Haruniin.