RITEAYDA 31 - Bibliyeeda Ghaydit

Gearnooda maheemajeanda mida madeeda NG'UTAMIIDA

¹ Gwayeesha NG'UTAMIIDA Musa,

² “Ng'ula, neaguursi Besaleli aba gheawungaaschi orjeeda Uri, ak orjeeda Huri, bea eemeeda Yuda:

³ ak ea naanyiichi niny Guroorooda ASEETA, ak ghwanyas weaghuumeeda, ea giimuusta ea fughareeda ea gearinda haleanjeeda sean,

⁴ ak ghoamu gadiyeeda gearnoocheanduumeeda bea sinooda dahaabu ea lapiya ea lagheanga oomng'i

⁵ ak ghoamu gabeara lagheanga, ak gwasisin, nea ghang'oar geeta gwasissa suulga, nea gwasin gadiyoojiga sean bea gearnoocheanduumeeda.

⁶ Ak ging'ulayi, naaloachi niny sea Oholiyabu, orjeeda Ahisamaki, bea eemeeda Dani, ak ghaadawji weaghuumeeda gurooruunatka fuga sean mideawa weaghuumeeda, ak ghoamu gwasin sean gea earukuneey:

⁷ maheemajeanda siroondooscheesa, ea sandakwajeanda muuwuunooda, ea hoorgeeda baydeayda mida uhuudaanyi, ea dabita sean bea maheemajeanda,

⁸ ea measa ea dabitaanyi, ea heeda miy siyiina gheaboonyaneeda ea dabitaanyi sean, ea heeda wagiida sighwariideaysa haleanjeeda siing'andiita,

⁹ nea heeda wagiida bea haleanjeeda sisabwa geadi bea ghadooweeda sighwarda ea dabitaanyi sean, ea harakta ea hoorgeadaanyi;

¹⁰ ea hang'weaka miyaasiin bea gadiyeeda ea hang'weaka ghaydidi bea Haruni was ashoohoocheanda ea hang'weaka orjoagaaschi, jea gagadiyeata aba ashoohoocheanduumeeda,

¹¹ ea nagheeda giimearda ea geeta ng'andit bea heeda ghaydit. Ak gaygwasinda saawa haleanjeeni seaniin gidearukteaydi.”

Sabaato eaweeda fuufta

¹² Ghwalamda NG'UTAMIIDA ak gwayeesha Musa,

¹³ “Eeshiina fuga Israeli, ‘Gajeang'waanya sabaatohajeegeasu, aba gideaba nih gwadeagooda gil aba dageascheedeanyu ea deang'wa ea seaygoojigeagwa, ak ghoanali gideaba aniini geawooschi NG'UTAMIIDA, amiituuneegwa.

¹⁴ Gajeang'waanya sabaato aba gideaba ea ghaydit aba heedeang'wa, siida was sean jea ghang'uda ririnnyeanda gajeenuus, ak eara siida gadiiyi eaweecheanji, gurooroadaanyi gajeasaja jeeda fugaaschi.

¹⁵ Gajagadiyeena eawooji lah, ak eaweedeaba ispwa ea sabaatoheeda fuufta gil, ghaydit bea NG'UTAMIIDA, ak siida wassean gadiiyi eaweeda sabaato gajeenuus.

¹⁶ Aba badaydeaba nih fuga Israeli gayghoang'waay sabaato, nea gang'ula sabaato ea ghoah seaygoojiga nyaawa, nih neajeeda manda muudeanooda.

¹⁷ Ak gayghoah gwadeagooda manda muudeanooda, aba dageascheedeanyu sea fuga Israeli aba jeemba eawooji lah NG'UTAMIIDA ghabwat humng'eeda ea ng'eanyiida, ak eaweedeaba ispwa ghwanung'waada gadiyeeda ak gafuuf.’”

¹⁸ Hean damanda ahiida baloolda sea niny, aba uhuuda Giijeeda Sinayi, ghoadaw Musa laghean iyeenya baragi bea muuwuunooda, lagheanga ng'oar ASEETA aba mooneeda.