RITEAYDA 29 - Bibliyeeda Ghaydit

Geatinda jea eabwat bea iinda Haruni ea orjoagaaschi ghoah ashoohoodiga

¹ “Nih gichea hinda saawa gil iijea aghaydiida saawa; ak gagadiyeesean ghoah ashoohoodiga. Geani heeyda duu ea mwanang' ea lagweendi iyeenya miyaas,

² ea mukaateeyda meamwatawiida, ea maandaseeda meamwatawiida sisna nagheeda ea mukaatajeega manang'i meamwatawiida sisna nagheeda. Gaysinana sean dearanga eashish miyaasiin bea ngaano.

³ Ak giyiini sean jeeda sooscheanjagi ak giyeani sean jeeda sooscheanda, ak giyeadu heeyda ea lagweendigiga asiyeenyean.

⁴ Ak giyeadu Haruni ea orjoagaaschi ghuuta maheemajeanda siroondooscheesa, ak giihuuni aba beega.

⁵ Ng'ata gigeanu hang'weaka, ak gishuubi Haruni shaati ea hang'da gulng'eanyi bea weasta mananda, ea weasta mananda, ea shageeda siikwealiisa daghata, ak gighiridi niny aba ghealooda weasta mananda, siyiin aba gearinda,

⁶ ak gishuubi ngoofajeanda uhuudaanyi, ng'ata gishuubi shiipcheandida ghaydidiin uhuuda ngoofajeanda.

⁷ Ak gigeanu nagheeda giimearda ak giidalealsi uhuudaanyi ak gimwaari niny.

⁸ Ng'ata giyeadu orjoagaaschi ak gishuubi hang'weaka saawa,

⁹ ak giradi mananuunatka nyaawa Haruni ea orjoagaaschi ak gishuubi iheenga nyaawa ngoofajeega, ak ashoohoocheanduumeeda gajea daanyaawa gil gidamanda muudeanooda, ak gajiina Haruni ea orjoagaaschi jeeda gadiyeeda.

¹⁰ “Ng'ata gajeani heeyda madeeda maheemajeanda siroondooscheesa. Ak gayghwayiin Haruni ea orjoagaaschi geatinga nyaawa uhuuda heeyda,

¹¹ ak gaynuusa heeyda aba madeeda NG'UTAMIIDA, aba ghuuta maheemajeanda siroondooscheesa,

¹² gaygeani foojeanji ng'ay bea heeyda ak giyiini uhuuda gujaka heeda wagiida aba mooneadaang'u, ak giihiisi foojeanda sea heeda wagiida.

¹³ Ak gaygeani ghashneeda sean dukuta gealeeda ea hiineega ea guwooyda ea sheetkweega ea nagheeda mida badayda nyaawa, gayghwarda sean aba heeda ghaydit.

¹⁴ Ama banyeega heeyda, ea muundaanyi ea fiyeagaaschi, gayghwarda aba beasta aba jarooda bea heedindi, aba gideaba haleanjeeda sisapa geadi aba riing'eeda gil.

¹⁵ “Ng'ata gaygeani lagweenjeanjagi ak ghwayiin Haruni ea orjoagaaschi geatinga nyaawa uhuuda lagweenda,

¹⁶ ak ginuusi lagweenda, ak gigeanu foojeandaanyi adalealsiina heeda wagiida nea gineaweesi murdajeega duwaawi.

¹⁷ Hean gilajaadi banyeega lagweenda gamaning'iidi, ak giihuuni hiineegaaschi ea geeshangaaschi ak giyiini hijagi nea nimwanang'iidi ea uhuudaanyi,

¹⁸ ak gighwardi lagweenda sean aba heeda wagiida, nih haleanjeeda sisabwa geadi bea NG'UTAMIIDA gil, was shearooda ng'andit, haleanjeeda sisabwa geadi bea ghadooweeda bea beasta bea NG'UTAMIIDA.

¹⁹ “Ak gigeanu lagweenda niirja ak ginung' ghwayiin Haruni ea orjoagaaschi geatinga nyaawa uhuuda lagweenda,

²⁰ ak gaynuusa lagweenda ak gaygeani foojeanji ng'ay ak giwaasi uhuuda iita Haruni bea geatinda dugwa, ea iheenga iidiga orjooga Haruni bea geatinda dugwa, ea iheenga mooringa nyaawa bea geatinda dugwa, ea mooringa nyaawa bea geeshanga bea geatinda dugwa, ak giidalealsi foojeanda heeda wagiida nea gineaweesi meadajeega sean.

²¹ Ng'ata gigeanu foojeanji ng'ay aba heeda wagiida, ea nagheeda giimeardeayda ak giidalealsi badayda Haruni ea hang'weakaaschi ea orjoagaaschi, ea badayda hang'weaka orjoagaaschi sea niny ak abeeda niny ea hang'weakaaschi gayghaghaydiit sea orjoagaaschi ea hang'weaka orjoagaaschi sea niny.

²² “Ak gaygeani gicha ghashneeda lagweenda, ea ghashneeda shoomng'eanda, ea ghashneeda dukuta gealeeda, ea hiineega ea guwooyda ea sheetkweega ea ghashneeda dukuta saawa, ea jeata geatinda dugwa (aba gideaba lagweenda gadiyeeda ghaydidi)

²³ ea mukaatajeanjagi bea dearanga ea banakcheanda mukaateeyda siyeasha nagheeda, ea mukaatajeanjagi was giika manang'iini mida jeeda sooscheanda mida jeeda mukaateeyda meamwatawiida mida madeeda NG'UTAMIIDEAN,

²⁴ ak gajiina haleanjeeni seaniin geatinga Haruni ea geatinga orjoagaaschi ak geatoas gawuurji haleanjeeda sisabwa geadi bea heeleeda aba madeeda NG'UTAMIIDA:

²⁵ Ng'ata gigeandi haleanjeedida aba geatinga nyaawa ak gighwardi aba heeda wagiida aba uhuuda haleanjeeda sisabwa geadi bea ghadooweeda sighwarda, gawuurji shearooda ng'andit aba madeeda NG'UTAMIIDA, nih haleanjeeda sisabwa geadi bea ghadooweeda bea beasta bea NG'UTAMIIDA.

²⁶ “Ak gigeanu giyooda lagweenda bea iinda Haruni gadiyeeda ak giteasi gawuurji haleanjeeda sisabwa geadi bea heeleeda, aba madeeda NG'UTAMIIDA, ak gayghoah daang'u.

²⁷ Ak gajamiini giyooda was haleanjeeda sisabwa geadi ea jeata miisa ashoohoodiga, was dea siheeleesa, sisabwa geadi bea lagweenda iinda gadiyeeda, ghang'eada Haruni ea orjoagaaschi.

²⁸ Gaygaba Haruni ea orjoagaaschi gawuurji daghwarda miisa leabu heeda fuga Israeli, bea ashoohoodiga sabwa geadi fuga Israeli was haleanjeeda sisapa geadi bea hoyyoo, suh haleanjeeda sisabwa geadi bea NG'UTAMIIDA.

²⁹ “Hang'weaksu ghaydidi bea Haruniin iidu gayghoadaw orjoagaaschi ghoah daanyaawa, ak gajeamwaara saawa iisiitaw gadiyeeda saawa.

³⁰ Orjeeda jea ghoah ashoohoocheanda aba headaanyi gaygooshuup hang'weaksu eawooji ispwa, iihidu jeeda maheemajeanda siroondooscheesa gagadiiy aba heeda ghaydit.

³¹ “Ak gigeanu lagweenda jea eayiina gadiyeeda, ak giiwaali banyeagaaschi aba heeda ghaydit,

³² ak gayghwaak Haruni ea orjoagaaschi banyeega lagweenda ea mukaateedida mida jeeda sooscheanda; mida ghuuta maheemajeanda siroondooscheesa.

³³ Ak saawa gayghwaak haleanjeeda sisna giiduupcheeda bea iinda gadiyeedean ak geamiidu saawa, nea rabascheanda ea adaghwaak aba gideaba ea ghaydit.

³⁴ Ak gilinyoo ea biyeeyda gil bea iinda gadiyeeda ghana mukaate, iisilach ea ghoah sakteayda gayghwarda gheaptanga aba beasta, majeayaak aba gideaba ea ghaydit.

³⁵ “Nih gichea hinda Haruni gil ea orjoagaaschi, nung' gaweeda ng'asheega sean earukuneey gajiina saawa jeeda gadiyeeda eawooji ispwa,

³⁶ inyas gajadayda heeyda gawuurji haleanjeeda sisapa geadi aba riing'eeda bea giiduupcheeda. Ak gajadayda gicha haleanjeeda sisapa geadi bea heeda wagiida, inyas gisini giiduupcheadaanyi, ak gimwaari ghaghaydiit.

³⁷ Gaysina giiduupcheeda eawooji ispwa aba heeda wagiida, ak gajamiini, ak gayghaghaydiit heeda wagiida muuchi, ak gilinyoo ghwasat heeda wagiida gayghaghaydiit.

Haleanjeeda sisapa geadi galeagasean bea ghadooweeda

³⁸ “Asi haleanjeeda jea adayiida aba heeda wagiida suh: dayi iyeenya bea gisilga bea gwanyagi gaysiniidunu galeagasean.

³⁹ Dayeenda gisilleanda akaleala gaynuusa sakteayda, ak niirja ginuusi shing'ada,

⁴⁰ gajadayda lagweenda madeeda sea gweeraji samwagu bea dearanga miyaas, siikuuyi nagheeda heasaat bayoagagi ea gidasilach ang'wan ea difaayi ea gidasilach ang'wan suh haleanjeeda ghadooweeda bea leeshooda.

⁴¹ Nea lagweenda niirja gaynuusa shing'ada, ak gajadayda sea booga sisabwa geadi bea ghadooweeda ea gea giiduupcheeda, gawuurji diita bea shing'adaan, was haleanjeeda sisabwa geadi bea ghadooweeda bea leeshooda, bea shearooda ng'andit suh haleanjeeda sisabwa geadi bea beasta gil bea NG'UTAMIIDA.

⁴² Gaysiniidunu haleanjeeda sisabwa geadi bea ghadooweeda sighwarda, ghang'eada seaygoojigaagu bea gidaghuuta maheemajeanda siroondooscheesa aba madeeda NG'UTAMIIDA, was heeda jea eeroonyeesiina sea ang'iing'i, ak gaydeabaloolnyi aba hoowa.

⁴³ Aba hoowa gaydaroonyi sea fuga Israeli, ak gayghaghaydiit aba giigheambiiteanyu,

⁴⁴ gaydaamiidu maheemajeanda siroondooscheesa, ea heeda wagiida, ea Haruni ea orjoagaaschi gaydaamiidu, ghoah ashoohoodiga ak gagadiyeesean.

⁴⁵ Ak gaydeabiida bugusta fuga Israeli, ak gaydoaw ASEETA nyaawa.

⁴⁶ Ak gayghwanal gideaba geawooschi NG'UTAMIIDA was ASEETA nyaawa, ghayi earuuni saawa ng'eanyiida Misri ak geabiidi bugusta nyaawa, aniini geawooschi NG'UTAMIIDA was ASEETA nyaawa.