RITEAYDA 28 - Bibliyeeda Ghaydit

Hang'weaka ashoohoodiga

¹ “Asi eani Haruni was orjeeda geamadu, sea orjoagaaschi ea niny, aba jeeda fuga Israeli, gagadiyeesean ghoah ashoohoodiga Haruni gil ea orjooga Haruni, was Nadabu ea Abihu, ea Eleasari ea Itamari.

² Ak gaysisiina orjeeda geamadu was Haruni hang'weaka ghaydidi, gheambiideadi miyaas.

³ Ak gajabaloola fuga sean ammu biissa daadaw guroorooda weaghuumeeda ak gwasissa Haruni hang'weaka ak geembiit niny gwasin gadiyeeda ashoohoocheanduumeeda.

⁴ Hang'weaka jea eesin suh: Shageeda daghata, hang'da mwanang' bea mananda, hang'da gul ng'eanyi, ea gooteeda gadiyeeda bea suulga, ea weasta sineaweesa uhuuda, ea ghealooda mananda, ak gajeesissa Haruni was orjeeda geamadu ea orjoagaaschi hang'weaka ghaydidi, ak gagadiyeesean ghoah ashoohoodiga.

⁵ “Ak gayghoang'waay dahaabu, ea hang'da oormeeda gasa gwatuudu ea deagasa ghwahareariit ea dea areara, ea hang'weaka bumbuni miyaas.

⁶ Ak gajeesissa weasta mananda mideawa dahaabu, bea oormeeda gasa gwatuudu, ea deagasa ghwahareariit ea dea areara, ea hang'weaka bumbuni miyaas, sin gearnoocheanda huumwa.

⁷ Weastida mwanang' bea manandean gajeesissa ghealooni iyeenya jea eerassa hamarjoojiga.

⁸ Ak gajeayiin badayda weastida sinap muuchi aba gearindean, ak gwaradiischeewa, eara ada gajeesina gisisina hang'weaka suurja, gajeesna dahaabu, ea gea meaji ea duwas ea gea murjeew ea gea meaji ea murjeew, ea hang'weaka bumbuni miyaas.

⁹ Ak gaygeani laghean iyeenya beari, ak ging'oorsi badahuuka nyaawa gheawunga orjooga Israeli,

¹⁰ gheawun lah ng'oorsiina badayda lagheaneanagi, ak ging'oorsi gheawunga suurja lah badayda lagheaneeda niirja, nea ginung' gaweeda gidasijiilda.

¹¹ Gawuurji siida sina ghunoojiga ak gang'oora, eara agooga gajang'oorsiina lagheanga asiyeenya gheawunga orjooga Israeli; ak gajakwealsiina dahaabu nea ginung' gwajip geat.

¹² Ak gajiina lagheangiga asiyeenyean badaydeaba weastida bea manandean, ak gaysina ghoah lagheanga jea eepkeadi bea orjooga Israeli, ak gheawunga nyaawa gaygwasareena Haruni hamarjoojigaaschi asiyeenya aba madeeda NG'UTAMIIDA ghoah giipkeata.

¹³ Sina hang'da sinabwa gulbeeda dahaabu,

¹⁴ ea surumnyooji iyeenya bea dahaabooda miyaas, ak gaysina gawuurji ghealooniga ak giyiini ghealooda surumga heeda hang'weakiga sinabwa gulbeeda dahaabuun.

Shageeda siyeata daghata

¹⁵ “Ak gisini shageeda siyeata daghata bea digheanyeeka ASEETA sisna gearinda, gaysinda gidisindi weasta mananda sisna dahaabu, guuyi oormeeda gasa gwatuudu ea dea gasa ghwahareariit ea dea areara, ea hang'weaka bumbuni miyaas, nih gichea sinda.

¹⁶ Gaygooyang'deay nea gwadeenyi meatkwajeega sean, ak gajeamughut niba iyeenya geawundaanyi gaygaba baneakta ak eara murdajeega gaygaba baneakta.

¹⁷ Ak ginung' ghwaroapgeat ghealooni ang'wan bea lagheanga. Ghealooda madeeda gaygaba lagheanga oomng'i ea booreega, ea gea nyawiiri.

¹⁸ Ghealoodeaba iyeenya gameaji ea nyawiiri ea gea gasa gwatuudu ea gea murjeew,

¹⁹ ghealoodeaba samwagu lagheanga gasa gwahareeriidi ea gea oomng'i guuyi gea areeri ea gea areeri,

²⁰ ghealoodeaba ang'wan gaygaba lagheanga nyawiiri ea gea areeri ea gea gasa gwanyawiiriidi, ak lagheang'su gajeeneaweesa dahaabu.

²¹ Ak lagheangiga gajea damaniyeenya gwadeena gheawunga orjooga Israeli, ak gayng'oorsiina gilinyoo ea lagheaneeda gil gheawunga gawuurji giirooraneeda aba eemoojiga atamaniyeenya.

²² Sina surumga shageeda siikwealiisa daghata, uurji ghealooda, bea dahaabooda miyaas,

²³ ak gisini gharin iyeenya bea dahaabu bea shageeda siikwealiisa daghata ak giyiini ghunoojigiga asiyeenyean gheang'deaba shageedida siikwealiisa daghatean meadajeega duwaawi asiyeenya.

²⁴ Ak giyiin surumgiga asiyeenya bea dahaabuun jeeda ghunoojigiga asiyeenya mida gheanyanga shageeda siikwealiisa daghatean,

²⁵ ghuusigiga asiyeenya bea surumgean rasiina badayda lagheangiga meeng'meeng'i asiyeenyean ak giyiin madeeda weasta siratiisa manandean.

²⁶ Ak gisini gharin iyeenya bea dahaabu ak girasi ghuusigiga asiyeenya bea heeda hiing'aada bea shageedida siikwealiisa daghata beajihiin neekeewa weasta siratiisa manandean.

²⁷ Sina gharin iyeenya bea dahaabu, ak giyiin madeeda weeloojiga heeda hiing'aada bea hamarjoojiga asiyeenya bea weasta siratiisa manandean, ak gaygwaroonyi ghealooda shageeda siikwealiisa daghata ea dea weasta siratiisa mananda.

²⁸ Ak gajeemajeek shageedida siikwealiisa daghatean, aba ghunoojigaaschi nea geekeal heeda ghunoojiga weasta siratiisa mananda, bea oormeeda gasa gwatuudu, aba gideaba goobiida uhuuda ghealoodida bea weasta siratiisa manandean, sisin aba gearindean aba gideaba adagwaheeli shageedida siikwealiisa daghatean sea weasta siratiisa manandean.

²⁹ Hean Haruni gayghwasar gheawunga orjooga Israeli aba jeeda shageeda siikwealiisa daghata bea girgweageeda aba badayda gurooroadaanyi, iinyo gawa jeeda gheeda heeda ghaydit, ak gweada ghoah giipkeata galeagasean aba madeeda NG'UTAMIIDA.

³⁰ Ak jeedeaba shageedida siikwealiisa daghata bea girgweageedean gajiina lagheanga siguura Urimu ea Dumimu, ak gaygoobiida badayda guroorooda Haruni damanda jea ghabeawa madeeda NG'UTAMIIDA, ak Haruni gayghwasar girgweageeda fuga Israeli aba badayda gurooroadaanyi aba madeeda NG'UTAMIIDA galeagasean.

Hang'weaka suuk bea ashoohoodiga

³¹ “Sina hang'da gulng'eanyi mida badayda weasta siratiisa mananda bea oormeeda gasa gwatuuduun.

³² Ak gaygwanda seawadeeda bugusta jea eesiik uhuuda, nea seawadeedida gaygwaneaweesa ghealooda siireat uurji seawadeeda mida badayda shaateeda gharinyeanda gideaba adaghabwaasha.

³³ Weeloojigaaschi gaynapsiina geedi siguura Goomamaanga bea oormeeda gasa gwatuudu ea dea gasa ghwahareariit ea dea areara nea geeneaweesa weeloojigaaschi sean, ak gwanda gureayeeka dahaabu dang'adiga nyaawa,

³⁴ gureayeeka dahaabu ak gabassa Goomamaanga, gureayeeka dahaabu ak gabassa Goomamaanga geeneaweesa weeloojiga sean bea hang'dida gulng'eanyiin.

³⁵ Inyeesa Haruni gaygooshuup damanda jea gaweewa gadiyeeda, ak gajeayiiy ghuuta gureayeeka damanda weewa gah heeda ghaydit bea madeeda NG'UTAMIIDA, aba gideaba ileabu jarooda ea mwami.

³⁶ “Ak gaysina banajaneeda dahaabooda miyaas, ak ging'waari badayda gawuurji ng'oorda giirooraneeda, ‘Ea ghaydit bea NG'UTAMIIDA.’

³⁷ Iin banajaneedida oormeeda gasa gwatuudu, ak gaygwanda heeda ngoofajeanda nea gwanda madeeda ngoofajeanda.

³⁸ Ak banajaneedida gayghwayiin Haruni gheamamdaanyi ak Haruni gayghwasar munyinda haleanjeedida ghaydidi jea ghoamiidu fuga Israeliin, aba giimuusta nyaawa ghaydidiin, ak gaygoobiita gheamamdaanyi galeagasean, ak abeeda eamwas aba madeeda NG'UTAMIIDA.

³⁹ “Sina shaateeda gadiyeeda bea suulga aba hang'da bumbuni miy, ak gisini ngoofajeanda aba hang'da bumbuni miy, ak gisisi ghealooda mananda sin gearnoocheanda.

⁴⁰ “Ak gaysisiina orjooga Haruni shaatajeega ea ghealooda mananda, ea ngoofajeega, ak gaysisiina saawa gea gheambiideadi nea miy.

⁴¹ Ak gishuubi orjeeda geamadu was Haruni, sea orjoagaaschi sea niny ak gimwaari saawa ak giyiini saawa jeeda gadiyeeda, ak gisaji saawa aba gadiyeeda ak gaygagadiyeesean ghoah ashoohoodiga.

⁴² Ak gaysisiina saawa suruwaalajeega hang'weaka bumbuni miyaas, jea gwadukuteawa dawiishnata nyaawa, ghang'eada mananuunatka ea gagul ng'eanyi,

⁴³ inyeesa gaygooshuup Haruni ea orjoagaaschi, damanda jea gaweewa jeeda maheemajeanda siroondooscheesa, ghana ibuwa gwaneekiisa heeda ghaydit bea wagiida aba gadiyeeda, aba gideaba gwadeepa ea mwasara giidiinyeanda ak gameewa. Nih gayghoah diigheanda damanyoojiga sean, ghang'eada niny ea ghoah jeacheangaaschi.