RITEAYDA 24 - Bibliyeeda Ghaydit

Neajeeda siimajeek

¹ Ng'ata ghwalamda ak gwayeesha Musa, “Ascheeng'ni apkaana heeda NG'UTAMIIDA, ang'iing'i ea Haruni, Nadabu ea Habihu, ea gwearu laadam ea damanamughuush bea Israeli.

² Ak gaygwaneekiisa Musa NG'UTAMIIDA, nea gabwageaw nea buuneesuurja ea mayghapka gwaneekiit, nea eara buuneeda ea mayghwascheang'da sea niny.”

³ Ghwahita Musa ak gwarukusa buuneeda ng'asheega sean bea NG'UTAMIIDA ea deaweedajeagaaschi sean, hean ghwasha buuneeda aba ghuudagi nea gwayi, “Ng'asheega sean rugu NG'UTAMIIDA gajeesina.”

⁴ Hean ghang'oar Musa ng'asheega sean bea NG'UTAMIIDA. Ak ghang'eat nea gudea sakteayda duw gil, ak ghwadeas heeda wagiida aba geeshta giijeeda, ak ghamiinda daranaji damaniyeenya, gwadeena mooneeda dooshinga fuga Israeli.

⁵ Ak goojeakta gheareemanga fuga Israeli, jea ghoadayda haleanjeeda sisabwa geadi bea ghadooweeda sighwarda, ea heewga hoyyoo sisabwa geadi bea NG'UTAMIIDA.

⁶ Ng'ata gageanu Musa foojeanda mwaatkwa ak ghwayiin jeesinga dabita, iidu foojeanda mwaatkwa ghwayiin heeda wagiida.

⁷ Hean gageanu gitaaboodida sing'oorsa neajeedean ak ghoasoamwa aba ghuuta haw nea ghoaleaydiit buuneeda, ng'ata gwayi buuneeda, “Ng'asheega sean rugu NG'UTAMIIDA gajeesina, nea geesisi mureeda.”

⁸ Ak gageanu Musa foojeanda ak gwasaksa buuneeda nea gwayeesha, “Ng'ula, suh foojeanda neajeeda sin NG'UTAMIIDA gil sea agooga aba jeeda ng'asheega seaniin.”

⁹ Hean ghwascheang'da Musa ea Haruni, Nadabu, ea Habihu, ea gweargwa Israeli was laadam ea damanamughuush,

¹⁰ ak geadaah ASEETA Israeli, nea geeshangaaschi nea gwanda giduurji lagheaneeda gaseaduw oar humng'eeda aba alooheadaanyi.

¹¹ Ak niny ea miighwayiin geatindaanyi uhuuda gweargwa fuga Israeli, ak geadaah ASEETA ak geeyeagiischi nea geeleeshi.

Musa aba uhuuda giijeeda Sinayi

¹² Ghwalamda NG'UTAMIIDA ak gwayeesha Musa, “Diyeana beeni heedeanyu aba uhuuda giijeeda, ak giibiidi hiji, ak gaydagoonyi lagheaneeda sing'oorsa deaweeda ea diigheanda, aang'oarji jea ghoanaaleagwa.”

¹³ Hean ghang'eat Musa sea Yoshuwa was siidaanyi weat aba gadiyeeda ak gwadiyeada Musa gawa uhuuda giijeeda ASEETA.

¹⁴ Ak gwayeesha Musa gweargwa, “Oomukghuneasa aba hiji ea eebiikna, ng'ula goondeawi Haruni ea Huri iyoondeawi ng'ashaan gooweesi saawa.”

¹⁵ Hean gwadiyeada Musa gawa uhuuda giijeeda, ak gwadukuta giijeeda shamooghooda.

¹⁶ Ak gwadukuta giijeeda Sinayi giigheambiita NG'UTAMIIDA, nea gwadukuta shamooghooda giijeeda eawooji lah, ak eaweedeaba ispwa gaguursa NG'UTAMIIDA Musa aba bugusta shamooghooda.

¹⁷ Nea deakta giigheambiita NG'UTAMIIDA gawuurji beasta yeat aba uhuuda giijeeda ak ea daachi aba madeeda fuga Israeli.

¹⁸ Ak iidu gawa Musa jeeda shamooghoodida, ak gwadiyeada gawa uhuuda giijeeda. Musa goobiida uhuuda giijeeda eawooji haradam eawa ea askweari.