RITEAYDA 20 - Bibliyeeda Ghaydit

Diigheanyeew damanamughuush

¹ Ak gabaloola ASEETA ng'asheesu seaniin nea gwayi,

² “Aniini geawooschi NG'UTAMIIDA was ASEATAANG'U, ghayi aruunaneey ng'eanyiida Misri, aba gheeda soomjeandumeeda.

³ “Adindeawi aseecheeka suuk geakghusan aniini.

⁴ “Adisissi geaw sanaamu, ghana gisigala gida wassean mida humng'eeda ghana gida wassean mida badayda ng'eanyiida, ghana gida wassean mida jeeda beega aba badayda ng'eanyiida

⁵ aditkuyi aba madeenyaawa, ghana gadiyeesiina saawa, aba gideaba aniini geawooschi NG'UTAMIIDA was ASEATAANG'U, ak ea ASEETA lacha ghuut haleanjeeda, ak gaygwasikteawa diibiga aba giidiinyeanyeeka ghweaniga nyaawa, ea ghwahita seaygeedeaba samwagu ea deaba ang'wan bea fuga anyareesean.

⁶ Ak ghaabwaydi fih sagalamnyooji sagalama bwariinyan, nea ghoang'waay diigheanyeekeasu.

⁷ “Adirugu mwadaagha gheawunga NG'UTAMIIDA was ASEATAANG'U, aba gideaba NG'UTAMIIDA mayghwanung' ghoah gilimandeawana ramaseanda siidida ruku gheawungaaschi mwadaaghaan.

⁸ “Apkaada eaweeda Sabaato ak giimiidu.

⁹ Gadiyeena eawooji lah, sina gadiyoojigaagu sean,

¹⁰ sighus eaweedeaba ispwa ea Sabaatoheeda NG'UTAMIIDA was ASEATAANG'U gil, eaweecheanji adisini gadiyeeda wassean ang'iing'i ghana orjeedang'u, ghana hudaang'u, ghana soomjeandaang'u, ghana hudaang'u bea gadiyeeda, ghana deadaang'u ghana rabascheandaang'u bea gheang'u

¹¹ aba gideaba NG'UTAMIIDA gagadiiy eawooji lah, ak gwasin humng'eeda ea ng'eanyiida ea basooda, ea haleanjeeda sean mida jeeda, ak gafuuf eaweedeaba ispwa, ng'ata ghoadaw NG'UTAMIIDA ghawooda eaweeda Sabaato nea ghoaghaydiit.

¹² “Sisiina mureeda gweanu ea geamadu, ak abeeda ghwasaang'ayiit eawoojigaagu aba jeeda ng'eanyiida goonyi NG'UTAMIIDA was ASEATAANG'U.

¹³ “Adinuusi siida.

¹⁴ “Adimealuuli.

¹⁵ “Adijagwadiischi.

¹⁶ “Adinapiisi ng'uyeega gischeewoocheandaang'u.

¹⁷ “Adishisi ghaang' gheeda gischeewoocheandaang'u, adishisi ghaang' gatmooda gischeewoocheandaang'u ghana soomjeandaanyi, ghana hudaanyi bea gadiyeeda, ghana deadaanyi, ghana digeadaanyi, ghana gili wassean mideawa gischeewoocheandaang'u.”

Buuneeda ghabeal

¹⁸ Hean nea ghwadaah buuneesean dadamandeeda ea gighweendandeeda, ea ghuuta durumbeateeda haw ea aroosta rinna uhuudeaba giijeedida hean daa buuneeda ng'asheesu geabeal nea geaboadan ak geamiinaada nea sheagi,

¹⁹ ak geeyeesha Musa, “Abalooleasa ang'iing'i ak gajeeleeyseey iit, sighus ASEETA adagoobalooleasa gajiidu geemeewayi.”

²⁰ Ghwalamda Musa ak gwayeesha buuneeda, “Adoabeali aba gideaba ASEETA ghwahidu gwasimeegwa nea ghwahidu madeedeang'wa gharbeadaanyi ak abeeda ea moosini riing'eeda.”

²¹ Hean ghamiinaada buuneeda nea sheagi, ak gwaneekiisa Musa misaneedida mida jeeda ASEETEAN.

Deaweedajeega aba badayda heeda wagiida

²² Ghwalamda NG'UTAMIIDA ak gwayeesha Musa, “Eeshiina fuga Israeli, ‘Agooga noadaayi gideabalooldaneegwa aba humng'eeda.

²³ Adoosinyi aseecheeka sisna lapiya jea dandeayi sea aniini, ghana adoosisi geat aseecheeka sisna dahaabu.

²⁴ Sinnean heeda wagiida sisna sheang'weeda ak giidaydi lukghumeadaang'u aba badaydaanyi ea haleanjeeda sisabwa geadi bea hoyyoo, ea gisilgaagu ea dugwaagu, hiji was sean jea dayiin giipkeata gheawungeasu gaydahidu headaang'u ak geagoonyeeyi ghawooda.

²⁵ Ak inyas gisinnean heeda wagiida aba lagheanga, abeeda ea maysinana lagheanga sishit, aba gideaba inyas gishti nea gigadiyeati dabicheandaang'u abeeda ea ning'udi ririnnyeanda.

²⁶ Ak ea mayding'deawana gidingeenda una heeda wagiideanyu, aba gideaba gayghwadaajiit dawiishnataang'u.’