RITEAYDA 1 - Bibliyeeda Ghaydit

Israeli geesawan aba Misri

¹ Suh gheawunga orjooga Israeli gil ghayi weay Misri nea goodeayi Yakobo, nea gaba siisi adeayi fugeaba gheanyi.

² Rubeni, ea Simeoni, ea Lawi, ea Yuda,

³ Isakari, ea Sabuloni, ea Benjamini,

⁴ ea Dani ea Naftali, Gadi ea Asheri.

⁵ Fuga sean sijiilsa gheeh Yakobo, ea laadam ea damanamughuush; abeeda Yosefu nigeawiit goobiida Misri.

⁶ Iimuchu ghami Yosefu, sea orjooga ghaamwat sean, sea seaygeedida seaniin.

⁷ Nea fuga Israeli iissa ghoahaada ea ghwasaang'ayiit muuchi; ak ghwadarda nea ghwanyas uurda; ak geeyi bwak ea gwadukuta saawa ng'eanyiida.

⁸ Iimuchu ghoang'waay sugoocheanduumeeda ng'eanyiida Misri, sugoocheanda nuut mwanala Yosefu.

⁹ Ak gwayeesha fugaaschi, “Ang'ula, fuga Israeli nisaang'ayiit muuchi, ea gaburdeaweesa uurda.

¹⁰ Eaniyean eesina fughareeda adaghoahaada fiisu, ama buseasa ng'ucheeda, ea maweayi meatkweeda weajoodigaasa ak geeng'ucheewi saawa ak gamng'aw aba ng'eang'i.”

¹¹ Ng'ata geegeanu fuga jea gamineadaysa saawa ak ghwanung' gwasin gadiyeeda hang'waay jea gwasawan; ak gwadeeksa Farao ghoorajeega mujiini was Bitomu ea Ramesesi.

¹² Earapeadi sisawaniin, ghoahaada muuchi nea gwadarsa ng'eanyiisean. Ak ghang'ut muuwda fuga Misri aba badayda fuga Israeli.

¹³ Hean geanung' gwasin fuga Israeli gadiyeeda hang'waay muuchi bwada sawanadeeda.

¹⁴ Ak ghwanung' ghang'waaniit giibinda nyaawa aba gadiyeeda hang'waay, bea roonghooda ea mwatafwaari, ea gilinyo ea gadiyeeda gil bea jeeda madamnyeanda; nea aba gadiyoojiga nyaawa sean iissa geanung' gwasin nea geesawan.

¹⁵ Ghwalamda sugoocheanda Misri ak gwayeesha deepshoodiga gadeemga Ebraniya, nea akaleala geeguura gheawungaaschi Shifra nea niirja geeguura Bua,

¹⁶ “Iyoogadiiyi nea goowooschi deepshoodiga gadeemga Ebraniya, ak ghoadaayi gideaba gaygwaji, ii orjeeda gil, abeeda goonuuschi; ak ii huda gil abeeda ghoanung'waadi adoonuuschi.”

¹⁷ Hean ghoawal deepshoodiga gheang'da ASEETA, ak ea mutgwasinda gidarukusiinda sugoocheanda Misri saawa, ak ea meenuusa diibiga was orjooga.

¹⁸ Ng'ata gaguursa sugoocheanda Misri deepshoodiga ak gwayeesha saawa, “Ghwasaan anda goosinyi ng'asheanji, ak ghoanung'waadi diibiga was orjooga nea moonuuseadani?”

¹⁹ Ghwalamda deepshoodiga ak gwayeesha Farao, “Nih gwasin gadeemga fuga Ebraniya mawuurji gadeemga Misri; saawa jeata nyaawa iissa ea asas iissa gabay gwaji nea miighwahita heeda deepshoocheanda.”

²⁰ Hean gwasissa ASEETA deepshoodigiga ng'asheega miyaas; ak ghoahaada buuneeda nea gwandeawa uurda muuchi.

²¹ Hean nea ghoawal deepshoodiga gheang'da ASEETA iidu ghoadaw ASEETA jeata.

²² Hean gwayeesha Farao fugaaschi sean, “Gilinyoo ea orjeeda gil, siji bea fuga Ebraniya ajaksiina jeedeenda Nayli, nea diibiga was haweega ghoanung'waadi adoonuuschi.”