OBADIYA 1 - Bibliyeeda Ghaydit

¹ Gisiihiimsa Obadiya. Asi gwayi NG'UTAMIIDA aba badayda Edomu: Sinyaschi iita leabu heeda NG'UTAMIIDA, nea giijasoocheanda ea siicheagu ghwaan bugusta eemoojiga: “Ang'eatng'eada! Anung' eang'eatng'eada aba badaydaanyi ak geeng'ucheewi!”

NG'UTAMIIDA gayghwalas Edomu

² Ng'ula, aniini gaydanung' mwanang'iida aba jeeda eemoojiga, ak gajeefoolnyi muuchi.

³ Ak ea nireenganeey ghwarjeeda gurooroadaang'u, ang'iing'eeda abiita jeesinga bearuutka lagheanga, nea giibindaanyi easheagi gwanda humng'eeda, was dea balool aba jeeda gurooroadaang'u, “Gaygweanean ng'eaha ng'eanyi ea daahiidu badayda ng'eanyiida?”

⁴ Earapeadi idiyeadi ea uurjeewana rabearda, earapeadi mida ghooriidaang'u bugusta miinga, asi gaydaahiing'neey ng'eanyi, gwarugu NG'UTAMIIDA.

⁵ Gwachi ibuwa mareanghooga headaang'u, ghana ghwahidu eawa fuga areedi fih haleanjeeda– ak gidaahi gidanyarjeawdaneey!– neada ea maygwajagwat gea deay aba saawa? Ama hidu headaang'u fuga bit sabiibu, neada saawa ea mayghoabuut gheaptanga?

⁶ Gawuurji gisigasiida fuga Esawu, nea geegeanda haleanjeadaanyi adiiw!

⁷ Fugaagu sean iduupcheewi nireenganeey, ak ea nihoanyi ea hita moonghooda; nea fugaagu oobeayi hoyyoo sea saawa ea nijoarnyi; nea buweadeagaagu iduupcheewi ea nisineey ghaseeda aba hiing'eadaydaang'u– ak ea mwanala ng'asheanji aba jeadaanyi.

⁸ Neada aba eaweedida, ea maydahuyda fuga bareahi iheeni mida ng'eanyiida Edomu, gwarugu NG'UTAMIIDA, ea fuga was weaghoodiga, ea fuga nal ng'asheega aba Giijeeda Esawu?

⁹ Abeeda fugaagu mideawa uurjeenga gayghabeal, Ea agooga fuga Demani, ak abeeda giliwas ng'eedeeda leabu Giijeeda Esawu gajeasach ak geenuus.

Gida jea eelaksa Edomu

¹⁰ Ak ng'asheanda muy isisi orjeeda geamadu was Yakobo, gaynyasa baspaseega, ak gajeasachnyi damanda manda muudeanooda.

¹¹ Aba eaweedida imiinaadawiin nea gisajaadi, aba eaweeda geandeawa weajoodiga haleanjeadaanyiin, nea gwasku rabasta dooshingaaschi ak gang'alealeesa Yerusalemu, ak eara ang'iing'i guwuurjeewi siyagi aba jeenyaawa.

¹² Ak ea ading'ulayi eawoojiga orjeeda geamadu was eawoojiga habitkwajeega; ak ea adihoosani aba badayda fuga Yuda eaweeda habitkwajeega nyaawa; ak ea adiidiing'u geaw eaweeda sawanadeeda.

¹³ Ak ea adisku dooshta fugeasu aba eaweeda habitkweadaanyi; ak ea ading'ulayi gidasawaneata aba eaweeda habitkweadaanyi; nea adiireadi haleanjeadaanyi aba eaweeda habitkweadaanyi.

¹⁴ Ak ea adimiinaadi aba bearsheeda naweadinga ak ghwalach fugaaschi mang'aw; ak ea adiidaydi fugaaschi nighuh aba eaweeda sawanadeeda.

ASEETA gaygoorgweaksa Eemoojiga

¹⁵ Aba gideaba eaweeda NG'UTAMIIDA nineekiit aba badahuuka eemoojiga sean. Nea gidisindi ng'asheega, gajeesindunu eara aba headaang'u, ak ng'asheega isinayi gaygabiikseey ang'iing'i.

¹⁶ Gawuurji gidooleesheati aba uhuuda giijeedeanyu ghaydit, abeeda gayghwali eemoojiga sean neaweesa; ak gaygwaleeshi, ak gwateemban, ak gaygawuurji gilighayi mandana.

Jooriischooda Israeli

¹⁷ Nea aba uhuuda giijeeda Sayuni gaygwanda fugiga ghayi waptaan, ak gajea ghaydit; nea gheeh Yakobo gaygoombal ng'eanyiida nyaawa.

¹⁸ Nea gheeh Yakobo gayghoah beasta, nea gheeh Yosefu ghoah ng'ushapta beasta, ak ghoah gheeh Esawu mbarariida; gayghaghwarda saawa ak ea moapta sih, ak ea may gwanda dea jea ghaghu aba gheeh Esawu; aba gideaba gwarugu NG'UTAMIIDA.

¹⁹ Nea fuga mida Negebu gaygoombal giijeeda Esawu, ak giika mida Shefelaan gaygoombal ng'eanyiida Filisti; ak gaygoombal ng'eanyiida Efraimu ea ng'eanyiida Samariya nea Benjamini gaygoombal Gileyadi.

²⁰ Abeeda fuga mang'aw mida jeeda fuga Ganaani bea fuga Israeli gaygoombal Foinike ea ghwahita Sarefati; nea fuga mang'awa Yerusalemu mida ng'eanyiida Sefaradi gaygoombal mujiinajeega Negebu.

²¹ Fuga ghuh gaygaweay Giijeeda Sayuni ak goombal Giijeeda Esawu; abeeda sugoocheanduumeeda gaygaba NG'UTAMIIDA.