NYIIGHEEGA 96 - Bibliyeeda Ghaydit

ASEETA sugoocheanda hawi

¹ Asarmasiina NG'UTAMIIDA duumdeesh; asarmasiina NG'UTAMIIDA, ng'eanyiisean!

² Asarmasiina NG'UTAMIIDA, abadiischeesiina gheawungaaschi, arukwiida lealeanoadaanyi giliwas askwearja.

³ Arukwiisiina eemoojiga iita giigheambiitaanyi, ea buuneesean iita ng'asheagaaschi deamdeameadi!

⁴ Aba gideaba NG'UTAMIIDA aahaw nea geakghaambiit muuchi; ak geewali gheang'da ea ghang'al aseecheeka sean.

⁵ Aba gideaba aseecheeka sean bea buuneeda mii gili; amaduuku NG'UTAMIIDA ea dea sin humng'eeda.

⁶ Mureeda ea hawunda gwanda madeadaanyi; uurda ea alooheeda gwanda headaanyi ghaydit.

⁷ Oatawa NG'UTAMIIDA, ea fuga mida ng'eanyiida oatawa NG'UTAMIIDA giigheambiita ea uurda!

⁸ Oatawa NG'UTAMIIDA giigheambiita gheawungaaschi; ayeani haleanjeeda ghadooweeda, ak gooweayi seamoadaanyi.

⁹ Abwada NG'UTAMIIDA aba alooheeda ea ghaydidanda aboadana aba madeadaanyi, ng'eanyiisean!

¹⁰ Ayeena aba jeeda eemoojiga, “NG'UTAMIIDA goombaliischi! Huumwa, ng'eanyiida siimajeek, ak ea majeamu easach; gaygoorgweaksa buuneeda nea ghoadoabiiw.”

¹¹ Dahoosana humng'eeda, ak ea dang'weela ng'eanyiida; deajuura basooda sea haleanjeeda sean nyiit jeeda;

¹² Dang'weela madameega, sea haleanjeeda sean mida jeeda! Ak abeeda gaygwasarman geediga sean bea dareabeeta aba hooseaneega,

¹³ aba madeeda NG'UTAMIIDA, aba gideaba ghwaan, ghwaan goorgweaksa ng'eanyiida. Gaygoorgweaksa ng'eanyiida aba doobiiwnata, ea eemoojiga aba doobiiwnataanyi.