NYIIGHEEGA 94 - Bibliyeeda Ghaydit

ASEETA dea laja girgweaguutkeaba seani

¹ Ea NG'UTAMIIDA, guwoosi ASEETA waliida mureandooda, guwoosi ASEETA waliida mureandooda, aboong'ni!

² Ng'eada, Ea dea laja girgweaguutka ng'eanyiida; ak giidawi fuga ghwarjeeda gidamiisa!

³ Ea NG'UTAMIIDA, gajeeyi bwak ea ghoah eeju, aba fuga munyas, gajeeyi bwak ea gooyang'daan gideaba gaygahoosan fuga mii doobiiweadi?

⁴ Ak gwarugu ng'asheega nyaawa bea ghwarjeeda, ak goodiing'u geat, fuga sean sina ng'asheega munyas.

⁵ Ea NG'UTAMIIDA, nisawan buuneadaang'u nea ghaminighis fuga was hearaniischoadaang'u.

⁶ Ak ghabwar masiinung'weanda ea rabascheanda, ak gwanuus bananga;

⁷ ak gwayi, “NG'UTAMIIDA mang'ula; ASEETA Yakobo mwanala.”

⁸ Ea fuga dasheahi bea jeeda buuneeda! Leekghteega, gajanyasa eeju fughareenga?

⁹ Dea iin iita hoorgeadaanyi mayghwayiiyi? Dea sin gheang'da mayghwadaahi?

¹⁰ Dea lasa eemoojiga, gajea mwalasa? Ninyeeda aneali headiga fughareeda,

¹¹ NG'UTAMIIDA ghwanal fugheerga buuneeda, gideaba marachi gil jeameeda.

¹² Ea NG'UTAMIIDA ghang'wana siida ilasi, ak giinaali diigheandaang'u.

¹³ Ak abeeda ginung' gahoosan damanyoojiga munyas, bwak ea eaghurghur shoomanda siida mii doabiiwaat.

¹⁴ Aba gideaba NG'UTAMIIDA maygwahista fugaaschi; ak ea mayghwanung'wa heeda hearaniischoadaanyi;

¹⁵ aba gideaba girgweageeda gaygabiiksa doobiiwnata, nea buuneesean doobiiweadi gurooruunat gayghwaat geeshta.

¹⁶ Ak ea ng'eaha siida jea ghamiinaada aba badaydeanyu aba badahuuka fuga munyas? Ng'eaha dea miinaada aba badaydeanyu aba fuga sina ng'asheega munyas?

¹⁷ Aba gideaba inyeeda gwachi NG'UTAMIIDA ea maweetean gwachi gurooroodeanyu gaygabay goobiida ng'eanyiida ayi saw.

¹⁸ Damanda eayeeni, “Ghwadarasha geeshteanyu,” hean goong'ooysean humng'eeda bariinyeagaagu bea huumwa, Ea NG'UTAMIIDA.

¹⁹ Nea aba seang'ayda ng'asheega mida jeeda gurooroodeanyu, ghwanung' baydeaydaang'u gahoosan gurooroodeanyu.

²⁰ Neada fuga munyas ambaliischi gajaguuyeena badooji, ak gwasina munyinda aba naweeda huumeanyeeka?

²¹ Ak iissa gang'uchi guroorooda siida doabiiwaat, ak goorgweaksiina miyeeda siida manda giidiinyeanda.

²² Ak NG'UTAMIIDA ea niiw igeambooda aba heedeanyu, ak ea ASEETEANYU gil ea lagheaneedeanyu jea damng'awsa.

²³ Ak gaygoodeelsa niny saawa munyinda nyaawa ak gayghwalas uhuuda aba munyasnacheeka nyaawa; NG'UTAMIIDA was ASEETEANYA gayghwalas uhuuda.