NYIIGHEEGA 92 - Bibliyeeda Ghaydit

Duumda siduumsheesiina ASEETA

¹ Aamiy gideaba gajeebadiischeesiina NG'UTAMIIDA, nea geesarmanyi nea geeduumsheesi gheawungaagu Ea ASEETA mida humng'eeda.

² Ak gearukwiidi baydeaydaang'u sakteayda, ea doobiiwnataang'u damandeaba shing'ada,

³ aba dabicheanda was gidoondooriida, ea aba nyeashta miy bea ginaanda ea dea gureayeeka.

⁴ Aba gideaba ninung' dahoosan, NG'UTAMIIDA aba gadiyeadaang'u; aba gadiyoojiga geatindaang'u gaydasarman nea geahoosanyi.

⁵ Ea NG'UTAMIIDA, ng'ula giteenacha heesinyeeka gadiyoojigaagu! ak fughareadaang'u ea haw muuchi.

⁶ Siitasha moamu ghwanal nea rageananeeda ea moamu ghwanal ng'asheesu.

⁷ Nea fuga mii doobiiweadi ghafutaayda nyeega nea buuneesean sina ng'asheega munyas gamnyeeni, ak geebaysiina gideaba gajealas uhuuda damanda manda muudeanooda,

⁸ Nea ang'iing'i, Ea NG'UTAMIIDA, guwoosi ghaydit damanda manda muudeanooda.

⁹ Aba gideaba weajoodigaagu, Ea NG'UTAMIIDA weajoodisu ikaaguun gaygwarooda; nea fuga sean sina ng'asheega munyas gayghwadarda sean.

¹⁰ Ak gujaweedeanyu ea nigatgat dea muweasta; ak ea simwaaranaan nagheedeesh.

¹¹ Nea gheang'deanyu gang'ula weajoodigeasu nea sijoar ak iiteanyu ea niyiiy iita fuga munyas ghayi eang'ucheewi.

¹² Siida doabiiwaat gayghwaliindanda miileanda, ak gaygawuurji sea gubooyeeka Lebanoni.

¹³ Ak geehisa jeeda gheeda NG'UTAMIIDA, gayghwaliindan aba seamooniga ASEETEANYA.

¹⁴ Ak gaygwaji haghweega ea ghwahita damanda woosinda, ak gayghwanyiit mughoondooda ak gajea nyawiiri,

¹⁵ nea gaydarukwiida gideaba NG'UTAMIIDA ea doabiiwaat; niny lagheaneedeanyu ak ea manda jeadaanyi gidamiidoabiiwaat.