NYIIGHEEGA 91 - Bibliyeeda Ghaydit

ASEETA haghweadoocheandeanya

¹ Dea abiita heeda funyaat bea dea Haw bea humng'eeda, abiita jirooneeda ASEETA hoauur,

² ak gaydayeesha NG'UTAMIIDA, “Niny dea eamng'awsi ak ea igeamboodeanyu; ASEETEANYU, was dea aaghuschi.”

³ Aba gideaba gayghoaghuuhaneegwa ghaseeda shageadoocheanda ea aba dawneeda eatu miyeeda;

⁴ gaygookwealnyi aba dabinigaaschi, nea hing'eadayda meang'eagaaschi gaynyasa heechea mang'awsiina; doobiiwnataanyi igeambooda gil gayghoahaaghwaneey nea gafurnyi.

⁵ Majawala haloota eaweeda, ghana geacheeda deambiiri askweari,

⁶ ghana dawneeda ng'ata aba jeeda misaneeda, ghana nyariida muy bea bugusta askwearda.

⁷ Eara goobeedeaysa fih sagalama gisheajeegaagu, ghana, Huumwa ghana sagalamnyooji damanamughuush geatindaang'u bea dugwa; ghanyea maygwaneekiiseey.

⁸ Ak gaybeacheewana ng'ulooda aba gheanyangaagu nea ging'ulayi gidasiikghuumdaayda haleanjeeda fuga munyas.

⁹ Aba gideaba ang'iing'i ninung' ghoah NG'UTAMIIDA dea jea mang'awsiina, ak ginung' ghoah dea Haw bea humng'eeda heeda jea abiidana,

¹⁰ ang'iing'i mayghwanyasnyi ng'asheega munyas, nea dawni ea maygwaneekiisa maheemajeandaang'u.

¹¹ Aba gideaba gaygoojeagu malaykajeagaaschi ghoahaaghwaneey aba jeeda naweadingaagu sean.

¹² Ak gaygagatkanyi aba geatinga nyaawa, ak abeeda ea mwalasa geeshtaang'u lagheaneeda.

¹³ Gajalaabwa ng'adiida ea ichibooda, dayeenda ng'adiida ea ichibooda gajaleapsiina ng'eanyi aba geeshta.

¹⁴ Ak gidabwariiydanaan gaydalealu; ak ghaayiinyi heetiyeada, aba gideaba ghwanal gheawungeasu.

¹⁵ Gaygaguurnean ak gaydeariip ghuutaanyi; gaydandeawa niny aba jeeda sawanadeeda, gaydalealu ak ghaadawji mureeda.

¹⁶ Aba askwearjoojiga saang'a gaydanung' gwalang'u, ak gaydeahiimsa lealeanoodeanyu.