NYIIGHEEGA 90 - Bibliyeeda Ghaydit

GITAABOODEABA ANG'WAN (Nyiigheega 90–106 ) ASEETA ea siida

¹ Ng'utamiida, ang'iing'i guwoosi heeda giibindeanya aba seaygoojiga sean.

² Damanda miyeesina giijeega, ghana heeda mii bwadana ng'eanyiida, ang'iing'i guwoosi ASEETA ghang'eada damanda manda muudeanooda ea ghwahita damanda manda muudeanooda.

³ Iissa ang'iing'i giidealdi siida jeeda sigeeda, nea iyeeni, “Abiikni, Ea diibiga buuneeda!”

⁴ Aba gideaba gweanyeew sagalama aba madeeda gheanyangaagu gawuurji askweardeaba heeta iining'ata, ak gawuurji giing'weernoodeaba eawa.

⁵ Ak gighuuti buuneeda; gawuurji giirgweatka ak gawuurji nyeega ridu bea sakteayda.

⁶ Sakteayda iissa gwardu ak gwaheetu; nea shing'ada ghwasis ak ghaghajaamiit.

⁷ Aba gideaba ninyarjaneasa nyarastaang'u; nea aba nyarastaang'u ea ning'udeasa muuwda.

⁸ Ak ea niyiini munyasnacheakaasa madeadaang'u, nea riing'eegaasa funyaat gwanda heedeesh was madeeda gheanyangaagu.

⁹ Aba gideaba askwearjoojigaasa eesa sean ning'ata aba jeeda nyarastaang'u, ak ea niishealda jeameeda.

¹⁰ Askwearjoojiga eaweagaasa gweanyeeka ea laadam ea damanamughuush, nea iisindeawi uurda gweanyeeka ea seedam; ak ghwarjeadaanyi ea sawanadeeda gil ea nyariida; aba gideaba gaygabay ghang'ata, ak geeroodayi.

¹¹ Ghoamu ng'eaha ghwanal hawunda uurda nyarastaang'u, ak ea ng'eaha siida duuba gichea gweadu nyarastaang'u?

¹² Asi anaaleasa eamuusa eeyiita askwearjoojigaasa ak geanyaschi guroorooda weaghuumeeda.

¹³ Ea NG'UTAMIIDA! Biikni, gajeeyi bwak ea gooyang'daan? Eaniyean bwayda fugaagu bea gadiyeeda.

¹⁴ Alang'uudeasa sakteayda aba bariinyeagaagu, ak aseasa gajeeng'weela nea geehoosanyi aba jeeda askwearjoojigaasa sean.

¹⁵ Nung' eehoosana aba giteena askwearjoojiga igoonyeasa, bea sawanadeeda ak geadaayi ng'asheega munyas.

¹⁶ Nung' ghwadaah gadiyeadaang'u fugaagu bea gadiyeeda, nea ghwadaah hawunda gheambalmeadaang'u diibiga nyaawa.

¹⁷ Nea alooheeda NG'UTAMIIDA was ASEETEANYA gagasa gwanda badahuukaasa, ak giimajeegi gadiyeeda geatingaasa aba badahuukaasa, asaha, nung' gamajeegiit gadiyeeda geatingaasa.