NYIIGHEEGA 9 - Bibliyeeda Ghaydit

Badiischeesiinda ASEETA aba doobiiwnataanyi

¹ Gaydabadiischeesa NG'UTAMIIDA aba gurooroodeanyu sean; gaydarukwiida ng'asheagaagu ea gadiyoojigaagu sean deamdeameadi.

² Gaydahoosan nea geang'weelayi, aba headaang'u, gaydasarmasa gheawungaagu, NG'UTAMIIDA mida humng'eeda.

³ Nibiikta weajoodigeasu bwadaw iihidu; ak goobeedeaysa ng'eanyi ak gameewa aba madeadaang'u.

⁴ Aba gideaba nisinnean girgweageeda doabiiw; ang'iing'i niipteadi aba uhuuda hoorgeeda gheambalmeeda ak gilaji girgweageeda nea giidoabiiwi.

⁵ Ak ea nireekusi eemoojiga, ang'iing'i nilasi uhuuda fuga munyas; ak ea nigeandi gheawunga nyaawa damanda manda muudeanooda.

⁶ Weajoodiga niisha damanda manda muudeanooda, ak ea niloaloati mujiinajeega nyaawa; ak eara giipkeata nyaawa ea niroat.

⁷ Ak NG'UTAMIIDA gaygoombaliischi damanda manda muudeanooda, nidiiwdiiw hoorgeadaanyi bea girgweageeda; jea goorgweaksa;

⁸ Ak goorgweaksa ng'eanyiida aba doobiiwnata, nea gooheeldooschi buuneeda aba weaghuumeeda.

⁹ NG'UTAMIIDA heeda mang'awiisa fuga sisawani, heeda simng'awiisa damanda sawanadeeda.

¹⁰ Nea fuga nal gheawungaagu ghwayiin ghusooda nyaawa badaydaang'u, aba gideaba ang'iing'i, Ea NG'UTAMIIDA, mii nung'usiina heeda fugiga gaseadayeeyiin.

¹¹ Asarmasiina NG'UTAMIIDA abiita Sayuni! Arukwiida gadiyoojigaaschi aba jeeda buuneeda!

¹² Aba gideaba dea smureandooda foojeanda ghoapkaadeagwa, mii gwaroosa shooka fuga ng'arng'ari.

¹³ Ea NG'UTAMIIDA, bwaydanaan! Ng'ula sawanadeedeanyu aba heeda fuga sidan, ang'iing'eeda iissa gagatkadan aba gidaghuudajeega miyeeda,

¹⁴ ak abeeda gearuku giigheambiitaang'u sean, aba gidaghuudajeega haweega Sayuni ak gaydahoosasa gideaba nilealnean.

¹⁵ Eemoojiga niibita jeeda shoomanda ghayi sin; nea aba gheareedanga ghayi fuy ea nighas geeshanga nyaawa.

¹⁶ NG'UTAMIIDA niihiimu geaw, ak ghwalach girgweageeda; nighas siida muy aba gadiyoojiga geatingaaschi.

¹⁷ Fuga munyas gaygaweay gheeda maloonghajeega, eemooji sean roosa ASEETA.

¹⁸ Aba gideaba siida gasa gil maygwaroosa fih galeagasean, nea gidagasa jeeda siida manda uurda ea mayghwaroat damanda manda muudeanooda.

¹⁹ Ea NG'UTAMIIDA! Ng'eada, adaghwanyas siida uurda, nung' eergweaksa eemoojiga aba madeadaang'u!

²⁰ Ea NG'UTAMIIDA, eaniyean nung' ghang'ut muuwda, eemoojiga danala gideaba saawa buuneeda gil.