NYIIGHEEGA 89 - Bibliyeeda Ghaydit

Duumda aba damanda sawanadeeda ng'eanyiida

¹ Gaydasarman duumda bariinyeega NG'UTAMIIDA, damanda manda muudeanooda; nea aba ghuuteanyu gaydarukwiida doobiiwnataang'u aba seaygoojiga sean.

² Aba gideaba bariinyeagaagu sing'eat damanda manda muudeanooda, doobiiwnataang'u ea amajeekta humng'eeda.

³ Ak giyeeni, “Aniini neasinyi neajeeda sea siideanyu aaloachi, ak ea neayeaksi habeawooda Dawdi was siideanyu bea gadiyeeda.

⁴ ‘Gaydeamajeek jeacheangaagu damanda manda muudeanooda ak gaydadeas hoorgeadaang'u aba seaygoojiga sean damanda manda muudeanooda’.”

⁵ Ea NG'UTAMIIDA, Deaghaambiida humng'eeda gadiyoojigaagu deamdeameadi, ea doobiiwnataang'u aba jeeda fuga ghaydidi bwatgeat!

⁶ Ak gajea ng'eaha aba humng'eeda jea eegala geat sea NG'UTAMIIDA? Ak ea aneeda gil dea uurjeeweey aba haleanjeeda mida humng'eeda mideawa eaweega uurji ea NG'UTAMIIDA.

⁷ ASEETA geewali muuchi aba girgweageeda fuga ghaydidi, aahaw ak geewali ea ghwalaabwa hoowa buuneesean neaweesa niny.

⁸ Ea NG'UTAMIIDA was ASEETA bea lugweega, gwandeawa ng'eaha uurda ea gawuurjeeweey, Ea NG'UTAMIIDA, nea gwaneaweeseey doobiiwnataang'u?

⁹ Ang'iing'i guwoosi dea ambal ghwarjeeda basooda; iing'eat laweajajeagaaschi, ginung' ang'iing'i ghwasiinda.

¹⁰ Ang'iing'i ging'aali Rahabu ea gawuurji musta, ak giidaardi weajoodigaagu aba geatindaang'u hoauur.

¹¹ Humng'eeda daang'u gil, ak eara ng'eanyiida ea daang'u; ng'eanyiida ea haleanjeeda sean mida jeeda, guwoosi dea ghayi bwat.

¹² Wiilooda ng'eanyiida ghayeawa ea wiilooda ng'eanyiida biyeara gisini ang'iing'i suh; Dabori ea Hermoni gahoosan nea gwaduumsheesa gheawungaagu.

¹³ Ang'iing'i gindeawi geatinda mideawa uurda; geatindaang'u gwandeawa uurda, nea geatindaang'u bea dugwa ea ghaambiidaat.

¹⁴ Doobiiwnata ea girgweageeda sindeeta hoorgeadaang'u; bariinyeega ea huumeanda gwanda madeeda gheanyangaagu.

¹⁵ Ghang'wana fugiga nal ghuuta ghweelmeedean, nea gwaneayeewa jeeda weeshinda aba madeadaang'u Ea NG'UTAMIIDA,

¹⁶ nea gahoosasa gheawungaagu askwearda sean, nea ghoaghaambiinyi aba badayda doobiiwnataang'u.

¹⁷ Aba gideaba guwoosi giigheambiita uurda nyaawa; nea aba gidigasiidi gageawiit gujaweedeanya.

¹⁸ Aba gideaba igeamboodeanya NG'UTAMIIDA gil nea sugoocheandeanya gaba dea ghaydit bea Israeli.

Neajeeda ASEETA sea Dawdi

¹⁹ Ak ghoah gidirukusiini fugaagu ghaydidi aba giirgweatka nea giyeeshi, “Naayiinyi shiipka uhuuda siida asagi mideawa uurda, naanung' ghaghaambiit siida siloat aba bugusta buuneeda.

²⁰ Naadaayi Dawdeeda was siideanyu bea gadiyeeda; naamwaarji aba nagheedeanyu ghaydit;

²¹ was dea jea gamajeegiit geatindeanyu aba badaydaanyi, ak gayghwanung' geatindeanyu ghwanyas uurda.

²² Niny manda weajoocheanda jea ghaghabwas, ghana siida muy mayghoamu ghwahiing'u niny.

²³ Ak gaydalas uhuuda weajoodigaaschi aba madeadaanyi gaydabwar fuga sit niny.

²⁴ Doobiiwnateanyu ea alooheedeanyu gaygwandeawa niny, nea aba gheawungeasu gaygageawiit gujaweadaanyi.

²⁵ Gaydayiin geatindaanyi badayda basooda nea geatindaanyi bea dugwa gayghwayiin badahuuka eeniga.

²⁶ Niny gaygwayi, ‘Ang'iing'i guwoosi Bwaabwa, ASEETEANYU ea igeambooda lealeanoodeanyu’.

²⁷ Ak gaydanung' ghoah duweacheedeanyu, ak goobiida humng'eeda sheagi muuchi ea ghoadaraam sugoodiga ng'eanyiida.

²⁸ Ak gaydaadaw bariinyeegeasu damanda manda muudeanooda, nea neajeedeanyu gaygamajeegiit aba headaanyi.

²⁹ Ak gaydeamajeek jeataanyi damanda manda muudeanooda nea hoorgeadaanyi bea gheambalmeeda gaygawuurji askwearjoojiga humng'eeda.

³⁰ Diibigaaschi iinung'waada deaweedeedeanyu ak ea masiga naweeda girgweaguutkeasu,

³¹ nea ghwadatas huumeanyeekeasu ak ea moang'waanya diigheanyeekeasu,

³² abeeda gaydalas giidiinyeanyeeka nyaawa aba bileangida munyasnacheeka nyaawa aba bayiiga;

³³ ak bariinyeegeasu ea maydageanda aba headaanyi, ak ea maydanung' ghoah doobiiwnateanyu ng'uyeega.

³⁴ Aniini maydadatas neajeedeanyu, ak ea maydayam ng'asheanda nirina ghuuteanyu

³⁵ Ng'asheanjagi neayeaksi habeawooda aba ghaydidandeanyu; maydanapiisa ng'uyeega Dawdi.

³⁶ Jeataanyi gayghwashng'u damanda manda muudeanooda, nea hoorgeadaanyi gaygawuurji aseeta aba madeedeanyu.

³⁷ Gaygamajeegiita sheeda damanda manda muudeanooda; gayghamiinaada nea majeek gawuurji gidareariideayda sheeda aba humng'eeda.”

Gutuunooda heareega aba joorda sugoocheanda

³⁸ Ak ghamneawa ang'iing'i ea nijakti ak giheawi, ak gindeawi nyarasta haw aba badayda siidaang'u imwaari.

³⁹ Ang'iing'i niheawi neajeeda siidaang'u bea gadiyeeda; ak ea nibwari ririnnyeanda shiipkaaschi ak gijaksi ng'eanyi.

⁴⁰ Ninyarjeaweadi ghamardaanyi sean; ak ea ninung' ghoah gealgaaschi majeekcheewi eemeega.

⁴¹ Nea fuga sean ng'ata aba naweeda ghwaas haleanjeadaanyi; ak ea niiw gidarearga aba heeda giischeewdaanyi.

⁴² Ak ea nighwar geatinda dugwa bea weajoodigaaschi ninung' gahoosan buuneesean was weajoodigaaschi.

⁴³ Nea ang'iing'i ea niidealdi bwadaw ghuuta ng'utaanyi, ak ea minung' ghamiinaada niny aba ng'ucheeda.

⁴⁴ Ak ea nigeandi bileangida mida geatindaanyi, nea hoorgeadaanyi bea gheambalmeeda gijaksi ng'eanyi.

⁴⁵ Ak ea nisuunyi askwearjoojiga gheareemaneanduumeadaanyi; ak ea niikwealsi niny baspaseega.

Mooshta ASEETA bea giighuumnooda

⁴⁶ Ea NG'UTAMIIDA, ak gafunya geaw ea ghoah eeju ea ghoah damanda manda muudeanooda? Gayghwayeata nyarastaang'u beasta ea ghoah eeju?

⁴⁷ Ea NG'UTAMIIDA, apkaada gidanuwaasta eaweegeasu, aba gideaba buuneesean iisini iissa goobiida ng'eanyiida gili nuwaas!

⁴⁸ Nih gajea ana ng'eadaat gil jea goobiida ng'eanyiida ak ea mwadaaha miyeeda? Gaygwalealu ng'eaha gurooroadaanyi aba uurda gheeda maloonghajeega?

⁴⁹ Ng'utamiida, gwandeenu bariinyeagaagu bea ghayi, ak giyeaksi habeawooda Dawdi aba doobiiwnataang'u?

⁵⁰ Ea NG'UTAMIIDA, apkaada, gidasiyaakta badayda siidaang'u bea gadiyeeda; gida aayaati aba daghateanyu nea ghaamilikghti giing'weaka buuneeda,

⁵¹ ng'ula shikooda nyaawa, Ea NG'UTAMIIDA, ak gwajuuga siidaang'u imwaari aba heeda weah sean.

⁵² Eakghaambiida NG'UTAMIIDA damanda manda muudeanooda Amin ea Amin.