NYIIGHEEGA 86 - Bibliyeeda Ghaydit

Musooda weeta

¹ Ea NG'UTAMIIDA ghamwada iitaang'u ak gishaahi ghuuteanyu, aba gideaba aniini geawooschi bwarbwar nea meandeawani gil.

² Aghuuha eaweegeasu, aba gideaba aniini geabaday ASEETA; lealni siidaang'u bea gadiyeeda ghusnyi. Ang'iing'i guwoosi ASEETEANYU;

³ ea NG'UTAMIIDA, eaniyean bwaydanaan, aba gideaba geayeawuseey askwearda sean.

⁴ Ahoosana guroorooda siidaang'u bea gadiyeeda, aba gideaba gurooroodeanyu geagatkaseey ang'iing'i Ea NG'UTAMIIDA.

⁵ Aba gideaba ang'iing'i Ea NG'UTAMIIDA guwoosi miy nea gisamiisi fih, nea gibwariinyi muuchi fuga sean guuruuneey.

⁶ Ea NG'UTAMIIDA, aleeysiiniit mooshteanyu bea ghawooda; aleeysiiniit shookeasu aba gidaamwaashchi.

⁷ Eaweeda sawanadeedeanyu gaydaguurneey aba gideaba gayshaaha ghuuteanyu.

⁸ Manda dea uurjeeweey ang'iing'i aba jeeda aseecheeka Ea NG'UTAMIIDA, ak ea manda gadiyoojiga wassean uurji gaagu.

⁹ Eemoojiga sean ghayi iisini gayghapka madeadaang'u ak ghaghadoawanyi ang'iing'i Ea NG'UTAMIIDA, nea ghoaghaambiit gheawungaagu.

¹⁰ Aba gideaba ang'iing'i guwoosi haw nea gisinayi ng'asheega deamdeameadi, ang'iing'i guwoosi ASEETA nea gibwaageaw.

¹¹ Ea NG'UTAMIIDA, anaalaan naweadaang'u, ak geaneayeewi jeeda huumeandaang'u; adoabiiwa gurooroodeanyu ghoawal gheawungaagu.

¹² Geabadiischooweey ang'iing'i aba gurooroodeanyu sean Ea NG'UTAMIIDA was ASEETEANYU, ak gaydaaghaambiit gheawungaagu damanda manda muudeanooda.

¹³ Aba gideaba bariinyeagaagu bea huumwa aahaw aba heedeanyu; ak ea niighuuhi gurooroodeanyu shoomanda sheagi jih bea gheeda maloonghajeega.

¹⁴ Ea ASEETA, fuga ghwarjeeda nupka ng'ucheedeanyu; nea fuga bwat geat ng'weani gagasa eaweegeasu, ak ea mwayiinyi madeeda gheanyanga nyaawa.

¹⁵ Nea ang'iing'i, Ea NG'UTAMIIDA, guwoosi ASEETA mideawa baydeayda ea miyeenooda, ak ea mii asas nyaras ak gwandeawa bariinyeega huumwa ak ea doabiiwaat.

¹⁶ Agealnean geaw ak gibwaydanaan aniini; Adawa uurda siidaang'u bea gadiyeeda, lealni orjeeda hudaang'u bea gadiyeeda.

¹⁷ Ahiimnaan gwadeagooda alooheadaang'u, ak abeeda ghwadaah fugiga sidaniin ak geanung' ghabwaspwas aba gideaba ang'iing'i guwoosi NG'UTAMIIDA, niweachaan ak gigeandeawean salgheang'da.