NYIIGHEEGA 85 - Bibliyeeda Ghaydit

Mooshta ASEETA jea ghwanyasa ng'eanyiida miyeenooda

¹ NG'UTAMIIDA ang'iing'i gibwariinyi ng'eanyiidaang'u; niighuumu giing'oonyanga Yakobo.

² Nisamsi munyasnacheeka fugaagu; ak ea nisamsi riing'eega nyaawa sean.

³ Nigeandi nyarastaang'u sean; niyamu geaw ak ginung'waadi ng'weaninda nyarastaang'u.

⁴ Ea ASEETA lealeanoodeanya aghuumneasa, reekusiina nyarastaang'u indeawi aba badahuukaasa!

⁵ Neada gaynyareekseasa damanda manda muudeanooda? Gaynung' ghwashng'u nyarastaang'u ea ghwahita seaygoojiga seani?

⁶ Migassi biikni ak abeeda gahoosan fugaagu aba headaang'u?

⁷ Ea NG'UTAMIIDA, ahiimneasa bariinyeega bea huumwa, ak gigoonyeasa lealeanoadaang'u.

⁸ Ak ghaayiinyi gichea gwarugu ASEETA was NG'UTAMIIDA, aba gideaba gaygwarukusa fugaaschi hoyyoo, heeda fugaaschi ghaydidi, heeda fuga yamsa geat niny aba gurooruunatka nyaawa.

⁹ Aba huumwa lealeanoadaanyi ea neekeewa fuga awali gheang'daanyi, ak abeeda goobiida giigheambiita jeeda ng'eanyiideanya.

¹⁰ Gaygwaroonyi bariinyeega ea doobiiwnata; ak gaygaguuyi doobiiwnata ea hoyyoo.

¹¹ Huumeanda nirdu aba jeeda ng'eanyiida, ak ghoang'wearu doobiiwnata aba humng'eeda.

¹² Huumwa NG'UTAMIIDA gaygagu gidamiy ak abeeda gaygagu ng'eanyiideanya boagaaschi.

¹³ Gaygwanda madeadaanyi doobiiwnata, ak ghwanung' ghoah geeshangaaschi naweeda.