NYIIGHEEGA 83 - Bibliyeeda Ghaydit

Mooshta ASEETA aba badayda weajoodiga Israeli

¹ Ea ASEETA, adiidu gisiindi; Ea ASEETA, adiyeeni saw ghana siinda!

² Aba gideaba weajoodigaagu gwasin ng'ooweata; fugiga sinyiin nigatgat iheenga nyaawa.

³ Ak gwasin foolayda aba badahuuka fugaagu; nea gabaloola badahuuka fugaagu iihaaghwi.

⁴ Hean gwayi, “Beeni, “Apkaani, ealasa uhuuda ea moawa eemeeda; ak ea mudeapkaat gheawunga Israeli earahay!”

⁵ Aba gideaba gabaloola ng'asheanjagi; ak gwasin neajeeda aba badaydaang'u–

⁶ maheemajeega Edomu ea gea Shumwaheeli, ea Moabu ea gea eemeeda Hagari,

⁷ Gebali ea Amoni ea Amaleki, ea Filisti sea fuga abiita Diro;

⁸ ak gaguuyi saawa sea fuga Ashuru; hean ghaweat orjooga Lutu.

⁹ Simana gidaghayi isimi fuga Midiyani gawuurji sea Sisera ea Yabini aba eenda Gishoni,

¹⁰ ghayi silas uhuuda aba Endori, ak ghoah sururuuda aba badayda ng'eanyiida.

¹¹ Nung' gawuurji fuga nyaawa hees Orebu ea Sebu, ak gawuurji fuga nyaawa sean ambaliischi sea Seba ea Salmuna,

¹² ghayi eena, “Anung' eang'waanya ng'eanyiida ghoah deanya was ng'eanyiida ASEETA.”

¹³ Ea ASEETEANYU, nung' gawuurji sea birjeanda shaarara, gawuurji looyda aba madeeda jeameeda.

¹⁴ Gawuurji gida akiida beasta dareabeeta, gawuurji gidiisa ghwanung' ng'ushapta beasta ghwayeata giijeega,

¹⁵ nih gichea maseawda gil aba shaarareadaang'u ak ginung' ghabeal aba jeameadaang'u!

¹⁶ Nung' ghwanyiit gheamamuunatka nyaawa baspaseega, ak abeeda gagasa gheawungaagu, Ea NG'UTAMIIDA.

¹⁷ Nung' ghabwaspwas nea gwanyik damanda manda muudeanooda; nung' goosha muuchi aba baspaseega.

¹⁸ Nung' ghwanal saawa gideaba ang'iing'eeda was gheawungaagu NG'UTAMIIDA nea gibwaageaw, ang'iing'i guwoosi dea Haw mida Humng'eeda aba badayda ng'eanyiisean.