NYIIGHEEGA 79 - Bibliyeeda Ghaydit

Mooshta ASEETA aba lealnooda Yerusalemu

¹ Ea ASEETA nupka fuga munyas jeeda ng'eanyiidaang'u; ak ea nibwara ririnnyeanda gheang'u ghaydit; nea ghwanung' ghoah mujiineeda Yerusalemu eemeega.

² Ninung'usa heeda muscheeka fugaagu bea gadiyeeda ghoah daghwarda madoonyaka humng'eeda, nea sasanuuka fugaagu ghaydidi, ghoah hamita diyeanga jarooda.

³ Ak ghoahiidaayda foojeanda nyaawa beega aba meatkwajeega sean bea Yerusalemu, ak ghanyea manda siida jea gabuy saawa.

⁴ Sihuuyi fuga siyeata ghuut aba heeda giischeewoodigaasa, shikooda ea juukooda aba heeda fuga neaweeseasa.

⁵ Ea NG'UTAMIIDA, gajeeyi bwak ea ghoah eeju? Ang'iing'i gaynyareasa damanda manda muudeanooda? Neada nyarastaang'u ghwayeata beasta?

⁶ Nyarastaang'u ahisiina eemoojiga mwanalnyi, sea sugoodiga fuga maguuruuna gheawungaagu.

⁷ Aba gideaba niyaak Yakobo, ak gwanyarja hoorgeeda giibindaanyi.

⁸ Adiipkaadi aba badahuukaasa giidiinyeanyeeka ghweanigaasa, dabean ghwahidu baydeaydaang'u ghwadeaptaneasa, aba gideaba siminighiseasa muuchi.

⁹ Ea ASEETA, lealeanoodeanya weadeasa, aba giigheambiita gheawungaagu; lealneasa, ak gisamsi riing'eegaasa aba badayda gheawungaagu!

¹⁰ Ghwasaan inyas gwayeena eemoojiga, “Gwanda yeenu ASEETA nyaawa?” Waldeayda foojeanda weay bea fugaagu bea gadiyeeda gagasa eanal aba jeeda eemoojiga aba madeeda gheanyangaasa!

¹¹ Sawanadeeda siida ghealooniga ea dahina madeadaang'u; aba giteena hawunda uurdaang'u lealni fugiga sing'oorsa miyeedean!

¹² Walda niba ispwa aba daghanuunatka fuga siischeayeewi was eemoojiga anyareasnyi Ea NG'UTAMIIDA!

¹³ Ak aseaseeda siwooschi fugaagu ea gisilga iihaaghwi, gajeebadiischooweey damanda manda muudeanooda; ghang'eada seaygeeni ea gagul seaygeeni gajeerukwiida duumsheesiindaang'u.