NYIIGHEEGA 78 - Bibliyeeda Ghaydit

ASEETA ea buuneadaanyi

¹ Ea buuneedeanyu, ayiinya gida aanaaleagwa; ooleeysiina iit ng'asheega ghuuteanyu!

² Ak gaydajaat ghuut dargu ghwasiildeanga; ak gaydargu ng'asheega funyaat bea garayi,

³ ng'asheega ghayi siyiinyi ak geanali, ghayi rukuneasa ghweanigaasa.

⁴ Ak ea mwajeafunya aba heeda diibiga nyaawa, nea geerukusi seayga nuut jea ghwahidu gadiyoojiga deamdeameadi bea NG'UTAMIIDA, ea uurdaanyi, ea ng'asheagaaschi deamdeameadi ghayi sin.

⁵ Aba gideaba goomajeek muuwuunooda aba heeda Yakobo, ak gwasin deaweeda aba Israeli, ghayi rukusa ghweanigaasa ghoanaal diibiga nyaawa;

⁶ ak abeeda ghwanal seaygeeda jea gabassa, nea ea diibiga jea eeji, ak ghang'eat ng'eat gwarukusa diibiga nyaawa,

⁷ ak abeeda ghwayiin ghusooda nyaawa heeda ASEETA, ak ea maroosiina gadiyoojiga ASEETA, ak ea daang'waanya diigheanyeekaaschi;

⁸ ak abeeda ea mawuurji ghweaniga nyaawa, seaygeeda ng'ooweata biissa ea nisach geat, seaygeeda mandeawana bariinyeega aba gurooruunatka nyaawa, nea gurooruunatka nyaawa ea mii doobiiweadi aba heeda ASEETA.

⁹ Efraimuheeda mideawa dabita ng'ucheeda, mideawa ghuweanga, gabiikta bwadaw eaweeda ng'ucheeda.

¹⁰ Ak ea moang'waanya neajeeda ASEETA, nea ghaheawa ghoang'waay deaweedeadaanyi.

¹¹ Ak gwaroosa gadiyoojigaaschi sin; sea ng'asheagaaschi deamdeameadi ghayi ahiimsa saawa.

¹² Gwasin ng'asheega deamdeameadi aba madeeda ghweaniga nyaawa aba jeeda ng'eanyiida Misri, aba jeeda madamnyeanda Soani.

¹³ Hean ghabwaash bugusta basooda ak ghwanung' ghoaghaaw, ak ghwanung' ghamiinaadayda beega dulgwajeanda.

¹⁴ Ak ghoadoabiiwa shamooghooda askweari, nea eaweesean ghoadoabiiwa weeshinda beasta.

¹⁵ Ak gwanyarjeaweada lagheanga aba dareapcheeda, nea ghwanung' ghwali beega saang'a leabu gireangiida basooda.

¹⁶ Hean ghwanung' gwarina ghealooniga beega jeeda lagheaneeda, ak ghwanung' gaguldeayda beega gili gulda ghealooniga.

¹⁷ Hean ghoaraanya sinooda riing'eeda, damanda heaweewa saawa ASEETA mida humng'eeda aba jeeda ng'eanyiida eeshtearajeanda.

¹⁸ Ak gwasim ASEETA aba gurooruunatka nyaawa aba gasooda hamita aba geawunda gheang'da.

¹⁹ Hean gameanya ASEETA nea gwayeesha, “Neada ASEETA ghoamu gagu hamita aba dareapcheeda?

²⁰ Ng'ula, ghwalas lagheaneeda ak gwarina beega ak gagulda ghealooniga. Niny ghoamu gagu daghwarda, ghana ghoadaw fugaaschi banyeega?”

²¹ Hean iiy NG'UTAMIIDA, ghwanyareas muuchi; ak geayeat beasta aba badayda Yakobo, ak gagal nyarasta badayda Israeli.

²² Aba gideaba mamwasa ASEETA, ak ea makghusa lealeanoadaanyi.

²³ Ak gwarukusa shamooghuutka mida humng'eeda, ak ghwajaat gidaghuudajeega humng'eeda;

²⁴ ak ghwanung' gwaroobassa hamita siguura maana nea ghwaanda roopta ak ghwaak, ak ghoadaw booga humng'eeda.

²⁵ Ak ghwaak siida hamita malaykajeega; hean ghoadaw hamita jea goolang'u.

²⁶ Ng'ata googeal humng'eeda jeameeda ghayeawa nea aba uurdaanyi ghoadoabiiw jeameeda wiilooda ng'eanyiida biyeara;

²⁷ ak ghwanung' gwaroobassa banyeega gawuurji birjeanda, sea dariidaka mideawa meang'eega deena iseaskweanda basooda;

²⁸ ak ghwanung' goobitpisa bugusta museasooda nyaawa, aba meadajeega nyaawa sean.

²⁹ Hean gweagiischi ea gwalang'u muuchi, aba gideaba ghoadaw haleanjeeda gasa.

³⁰ Nea heeda mii goosheala dooghooda nyaawa, nea gudugwanda hamita ghuusiga nyaawa,

³¹ hean ghwahidu nyarasta ASEETA badahuuka nyaawa ak ghabwar fuga mideawa uurjeenga aba jeenyaawa, ak ghabwaanyaada gheareemanga Israeli.

³² Ak eara gwasa ghoaraanya sinooda riing'eeda; nea ghanyea mamwasa gadiyoojigaaschi deamdeameadi.

³³ Ak ghwanung' gooshealda askwearjoojiga nyaawa jeameeda, ea gweanyeeka nyaawa aba habitkweeda sham.

³⁴ Hean nea geabwar gabiisa ghoang'eat gasoadaanyi; ng'ata gabiigu ak gagasa ASEETA nea gamanya.

³⁵ Ak ghoapkaata gideaba ASEETA lagheaneeda nyaawa, nea ASEETA mida humng'eeda ea lealnoocheanda nyaawa.

³⁶ Hean gwareengani niny aba ghuusiga nyaawa; ak gwarugu ng'uyeega aba ng'ushapkeaka nyaawa.

³⁷ Aba gideaba gurooruunatka nyaawa mii majeek aba headaanyi; ak ea masina ng'asheega huumwa aba neajeadaanyi.

³⁸ Iidu niny aba gideaba gwandeawa baydeayda, gwasamsa munyasnacheeka nyaawa, ak ea mwalasa uhuuda nyaawa; nea iissa ghwasach nyarastaanyi galeaga sean, ak ea mwanung' ghwayeat nyarastaanyi sean.

³⁹ Hean ghoapkaat gideaba saawa buuneeda gil ak ghwahit, was jeameeda ng'ata ak ea mabiikna gicha.

⁴⁰ Saawa ninung'usa heeda niny niba hada aba dareapcheeda, ak ghoanyareas niny aba eeshtearajeanda!

⁴¹ Ng'ata gabiikta bwadaw ak gwasim ASEETA, ak ghoanyareas dea asagi Ghaydit bea Israeli.

⁴² Ak ea moapkaada uurdaanyi, ghana eaweeda aghuuha aba heeda weajoodiga nyaawa;

⁴³ gawuurji gida iinda gwadeagwajeagaaschi ng'eanyiida Misri, ea deamdeamangaaschi jeeda madamnyeanda Soani.

⁴⁴ Ak ghwayam eenigiga ghoah foojeanda ak ea mwanyasa fuga Misri beega jea ghwali.

⁴⁵ Gweasa ghasheang'anga ak ghwaak ea udagheambagajeamajeega, ak ghwalas uhuuda nyaawa.

⁴⁶ Ghwanung' ghapka sapsabiida ak ghwaak booga nyaawa, ak ghwaak haghweega geatinga nyaawa deashamga.

⁴⁷ Ak ghwalas uhuuda sabiibooda nyaawa aba roopta lagheanga, ea meaghayga nyaawa aba jeameeda ng'waan.

⁴⁸ Hean ghwanung'waada dugwa nyaawa ghabwar gooroogeeda ak ghabwar gisilga nyaawa aba diyeayda humng'eeda.

⁴⁹ Ak ghwanung'waada nyarastaanyi ng'waan ghwayeat aba badahuuka nyaawa, nyarasta ea sicheeda, ea sawanadeeda, was lugooda malaykajeega saang'a lasa uhuudeaba fih.

⁵⁰ Hean gwasissa nyarasta naweadaanyi; ak ea moanghuuhana gurooruunatka nyaawa miyeeda, gwasiksa dawni ak ghwalas uhuuda.

⁵¹ Ak ghabwar duweachajeega sean bea ng'eanyiida Misri, damealeanda mideawa uurda aba museasooda Hamu.

⁵² Ng'ata ghoadoabiiwda buuneadaanyi gisilga, ak ghoahaaghwiita gisilga aba dareapcheeda.

⁵³ Hean ghoadoabiiw nea gaba seayu, nea saawa ea mabeala; ak ghwaak basooda weajoodiga nyaawa.

⁵⁴ Ak ghwaat saawa ng'eanyiida ghaydit, was giijeeda ghayi geanda aba geatindaanyi bea dugwa mideawa uurda.

⁵⁵ Hean ghahoan eemoojiga aba madeanyaawa, ak gageanu ng'eanyiida nyaawa gwalakiisa ak Israeli ghoah daanyaawa, ak ghwanung' goobiida eemoojiga Israeli jeesinga maheemajeega nyaawa.

⁵⁶ Ak gwasim ASEETA Haw bea Humng'eeda, ak ghwanung'wa heeda ak ea moang'waanya ng'asheagaaschi muuwu,

⁵⁷ ng'ata gabiikta bwadaw ak ghwayam geat ak gwasin ng'asheega munyas gawuurji ghweaniga nyaawa; ak gwayama geaw gawuurji ghuweang'da mii majeek.

⁵⁸ Ghoanyareas niny aba heeda nyaawa diyeada, ak ghwasasat gwashissa ghaang' sanaamajeega nyaawa sisin.

⁵⁹ Ak ghwayiiy ASEETA, ak ghwanyareas, ak ghaheawa muuchi fuga Israeli.

⁶⁰ Ng'ata gwanung'usa heeda giibindaanyi aba Shilo, was giibindaanyi abiita aba bugusta buuneeda.

⁶¹ Hean ghwanung'waada gwadeagooda uurdaanyi eegeanda, ak geayiin giigheambiitaanyi geatinga weajoodiga.

⁶² Ak gooruuta buuneadaanyi eabwar aba ng'uta, ak gwanyareeksa hearaniischoadaanyi.

⁶³ Hean ghwaak beasta gheareemanga nyaawa, nea haweega nyaawa ea mayghwanyas gheareemanga jea ghaghi.

⁶⁴ Ashoohoodiga nyaawa gameewa aba ng'uta, ak masiinung'weega nyaawa ea meayeawda.

⁶⁵ Hean ghang'eata NG'UTAMIIDA gili ng'eada ruweanga, gawuurji siida mideawa uurda ajuur aba difaayi.

⁶⁶ Ak ghabwar weajoodigaaschi ak ghwanung' gabiikta bwadaw; ak ghwanung' ghabwaspwas damanda manda muudeanooda.

⁶⁷ Ak ghaheawa maheemajeanda Yosefu, nea mwaloada eemeeda Efraimu;

⁶⁸ ng'ata ghwaloat eemeeda Yuda, Giijeeda Sayuni, was dea bwariiy.

⁶⁹ Ak ghwadeas headaanyi ghaydit uurji humng'eeda sheagi, gawuurji ng'eanyiida, ghayi bwat damanda manda muudeanooda.

⁷⁰ Ghwaloat Dawdi was siidaanyi bea gadiyeeda, ak gageandeawa jeeda hilgweanda gisilga;

⁷¹ ak gageandeawa geeshta gisilga mideawa dayeega ak ghoahaaghwa fugaaschi was Yakobo, ea Israeli was hearaniischoadaanyi.

⁷² Ak ghoahaaghwa saawa aba gurooroadaanyi miy, ak ghoadoabiiw aba geatindaanyi ea aba fughareeda.