NYIIGHEEGA 74 - Bibliyeeda Ghaydit

Mooshta ASEETA bea lealnooda eemeeda.

¹ Ea ASEETA anda nihistaneasa damanda manda muudeanooda? ghwasaan anda nyarastaang'u ghwajoakghta aroosta aba badayda gisilga iihaaghwi?

² Apkaada mughuusheanda fugaagu, was gea ghayi inyaksi geaw, eemeeda ghayi ilealu ghoah hearaniischoadaang'u. Apkaada Giijeeda Sayuni, inung' ghoah giibindaang'u.

³ Nung' ghwala geeshangaagu badahuukeaba gealsu nyareadiin; ninyarjeaweada weajoocheanda haleanjeeda sean bea heeda ghaydit!

⁴ Weajoodigaagu niimuum aba jeedeaba gheang'u ghaydit; gayghwayiin hiji beendeerajeega nyaawa ghoah giirooraneeda.

⁵ Iising'ula gawuurji fuga gatkat joomajeega jea ghabwar geediga dareabeeta.

⁶ Ak gwanyarjeaweada gidaghuudajeega gheeda sibata ASEETA, aba joomajeega ea yundajeega nyaawa.

⁷ Ak ghang'uda beasta gheang'u ghaydit; nea goong'eawi hoorgeeda sisiniisiinaneey mureedean.

⁸ Nea gwayeeniisa geat, “Asi ealasa uhuuda goosha”; ak ghaghwarda hiji wassean siroondooscheesa sibatiisa ASEETA aba jeeda ng'eanyiida.

⁹ Ak ea meadaahi giirooranga ASEETA; ak ghamneawa ea mudugwanda sibaneeda, nea aba jeedeanya ea manda siida nal gichea gooyang'da damanda.

¹⁰ Ea ASEETA weajoocheanda gaygabareeweey reari ea ghoah eeju? Weajoocheanda gaygafool gheawungaagu ea ghoah damanda manda muudeanooda?

¹¹ Ghwasaan anda giidealdi geatindaang'u, ghwasaan inyas giideelsi geatindaang'u bea dugwa daghataang'u?

¹² Nea ASEETA ea sugoocheandeanyu ghang'eada garayi, sina ng'asheega lealeanooda aba jeeda ng'eanyiida.

¹³ Ang'iing'i gibwaashi bugusta basooda aba uurdaang'u, ak ginyarjeaweadi iheenga ichipkeega aba badayda beega.

¹⁴ Ang'iing'i ginyarjeaweadi iheenga ichipkeega Lewiatani ghoah hamita diyeanga dareapcheeda.

¹⁵ Ang'iing'i gisini gheanyanga eeniga ea ghealooniga; ang'iing'i giighajaami eeniga mida beega galeaga sean.

¹⁶ Askwearda daang'u gil, ak eara eaweeda ea daang'u; ak guwoosi dea sin weeshinda ea aseeta.

¹⁷ Ang'iing'i gisini moonghajeega sean bea ng'eanyiida; ak gisini geayda ea muweeda.

¹⁸ Ea NG'UTAMIIDA, apkaada ng'asheesu aba gida shikiidanean weajoocheandeanyu, nea fuga dasheahi ea nifool gheawungaagu.

¹⁹ Adihisi diyeanga ng'weani guroorooda siida ibwariinyi; adiidu gwarooseey eaweega siidaang'u bwarbwar damanda manda muudeanooda.

²⁰ Apkaada neajeadaang'u; aba gideaba heeda mida misaneeda aba jeeda ng'eanyiida heeda nyiit giibinda fuga ng'ooweata.

²¹ Adinung'waadi fuga sighabwas eapwaaspwaas; nung' ghoaghaambiit gheawungaagu fuga barbari ea gea mandeawana gil.

²² Ea ASEETA, ng'eada ak giweadi geaw; apkaada gida ang'eawiidaneey siitasha askwearda sean!

²³ Adagwarooseey ghuusiga weajoodigaagu, nea nyeashta galeaga sean bea weajoodigaagu iimiisean gooheadiisachi.