NYIIGHEEGA 72 - Bibliyeeda Ghaydit

Mooshta ASEETA aba badayda sugoocheanda

¹ Ea ASEETA adawa sugoocheanda doobiiwnataang'u, ak giidawi orjeeda sugoocheanda doobiiwnataang'u.

² Gaylacha girgweaguutka buuneadaang'u nea giidoabiiwi, ea fugaagu sisawan ak giirgweaksi.

³ Gagasa gweasa giijeega buuneeda miyeenooda, nea ghwanyiit heayeeniga alooheeda!

⁴ Sugoocheanda gagasa ghaweat fuga ng'arng'ari mida jeeda buuneeda, ak ghaweat diibiga fuga barbari ak ghwalas uhuuda fuga munyas.

⁵ Gagasa gabateey fugaagu damanda duu gwandeewa ASEETA humng'eeda, ea damanda duu gwandeewa sheeda humng'eeda, ea ghoah jeacheenga jea ghwahidu.

⁶ Gaygwashuubeanda roopta roobassa nyeega gajeami, gawuurji shishiyjeanda roobassa ng'eanyiida!

⁷ Askwearjoojigaaschi siida doabiiwaat gaygabaruur ak gaba seayu muuchi ea goosha sheeda.

⁸ Ak ea deambaliischi ghang'eada basooda ea gagul basooda, ak ghang'eada eenda ea ghwahita muudeanooda ng'eanyiida!

⁹ Fuga was weajoodigaaschi abiita dareapcheeda datkunya aba madeadaanyi, nea fuga ng'aleali ea dameasha sigeeda.

¹⁰ Sugoodiga Darshishi ea gea darooraka neaweesa beega deasiina niny gwaadi, sugoodiga Sheba ea Seba dagu haleanjeeda duupcheeda!

¹¹ Asi datkunya sugoodiga sean aba madeadaanyi, ak ea dagadiyeesiina eemoojiga sean niny.

¹² Aba gideaba gaygwalealu siida bwarbwar ayeawusa, ea siida sisawan manda siida jea ghaweat.

¹³ Gayghabwayda siida ng'arng'ar ak ghoaghu eaweega fuga mandeawana gil.

¹⁴ Ak gaygwalealna eaweega nyaawa jeeda sawanadeeda ea ghabasta, nea foojeanda nyaawa gaba sheayeeda haw aba madeadaanyi.

¹⁵ Asi gagasa goobiida ng'eanyiida ea gageawiit, ak ea deatawa dahaabooda Sheba! Ak ea damusiischeesiina galeaga sean, ak ghoah ghawooda askwearda sean.

¹⁶ Nea dasaang'ayiida booga aba ng'eanyiida, nea iheenga heayeeniga ea danyiida haghweega gawuurji Lebanoni; nea fuga mujiini ea dasaang'ayiita nyeega dareabeeta!

¹⁷ Gheawungaaschi deabiidana damanda manda muudeanooda, weeshindaanyi deaboong'na ea gawuurji aseeta. Aba niny gayghwanyas eemoojiga sean ghawooda, ak gaguura eemoojiga sean dea sibadiischeesa!

¹⁸ Asi deakghaambiida NG'UTAMIIDA, was ASEETA, ASEETA Israeli, was dea sina ng'asheega deamdeameadi nea gaba geaw.

¹⁹ Gheawungaaschi ghaydit deakghaambiida damanda manda muudeanooda; ng'eanyiisean danyiida giigheambiitaanyi! Amina, Amina!

²⁰ Mooshta ghawooda Dawdi orjeeda Yese, gamuudean.