NYIIGHEEGA 71 - Bibliyeeda Ghaydit

Gweargweeda ghamwaash ASEETA

¹ Neafaju headaang'u, Ea NG'UTAMIIDA; adaabwaspwaschi damanda manda muudeanooda.

² Aba doobiiwnataang'u lealnean ak giighuuyaan; ghamwada iitaang'u ak giileeysean iit ak gilealnean.

³ Huwa aba heedeanyu lagheaneeda jea damng'awsa was igeambooda majeek, jea ghaweadan, aba gideaba ang'iing'i guwoosi lagheaneedeanyu ea hilgweandeanyu.

⁴ Ea ASEETEANYU lealnean aba geatinda siida muy aba geatinda siida mii doabiiwaat ng'waan.

⁵ Ea NG'UTAMIIDA, ang'iing'i guwoosi dea aaghuschi, ea dea aamwaschi, Ea ASEETA ghang'eada gheareemaneanduumeedeanyu.

⁶ Naaghuscheey ang'iing'i ghang'eada dea sijiilanean; ak guwoosi dea aruunanean jeediya. Aniini ghaaghaambiicheey galeagasean.

⁷ Naahuuyi siida sigala aba heeda fuga saang'a, aba gideaba guwoosi siida majeek ahaaghwanaan.

⁸ Ghuuteanyu ghwanyiit duumsheesiindaang'u, ea giigheambiitaang'u askwearda sean.

⁹ Adijaktanean damanda gwearguumeeda; iyasha uurdeanyu ea adinung'usean heeda.

¹⁰ Aba gideaba weajoodigeasu ghwaak badaydeanyu, nea buuneeda gasa eaweegeasu gwasin badiida,

¹¹ nea gwayi, “ASEETA ninung'usa heeda niny; amaseawa ak ghoang'waanyi, aba gideaba manda siida jea ghaweat niny.”

¹² Ea ASEETA, adiisheagiidanean; Ea ASEETEANYU, eaniyean lamwajaana weadaan!

¹³ Gagasa eapwaaspwaas weajoodigeasu nea gealas uhuuda; gagasa eekwealsa nyarasta ea baspaseega fuga gasa gwasawanan.

¹⁴ Ak aniini gaydaghus galeagasean, ak gaydaduumsheeseey galeagasean.

¹⁵ Ghuuteanyu gaygwargu gadiyoojigaagu doobiiweadi, gaydargu aseeta sean gadiyoojigaagu bea lealeanooda, earapeadi mooneeda nyaawa naawa fughareedeanyu.

¹⁶ Ak gaydargu ng'asheega hees bea NG'UTAMIIDA was ASEETA, gaydarukwiida gideaba guwoosi doabiiwaat, nea gibwaageaw.

¹⁷ Ea ASEETA, niinaalaan ghang'eada gheareemaneanduumeedeanyu, ak ea gutarukwiida gadiyoojigaagu deamdeameadi.

¹⁸ Eara dawoos gweargweeda mideawa ghearashka, Ea ASEETA, adinung'usean heeda, bwak ea darukwiida uurdaang'u aba heedeaba jeacheeng'su seaniin.

¹⁹ Nea uurdaang'u ea doobiiwnataang'u, Ea ASEETA, nidiyeada ea ghwahita humng'eeda. Ang'iing'i nisini ng'asheega hees, Ea ASEETA, neada ng'eaha dea uurjeeweey?

²⁰ Ang'iing'i ninung' dadaah sawanadeeda haw ak gabiikta nung' danyas eaweega; ak gaybiikta gatkananean ng'eanyi gicha.

²¹ Inyeeda gajaheanean hawunda, ak gibiigu gicha ak ginung' dahawda.

²² Ak gaydaduumsheeseey aba gidoondooriida aba badayda doobiiwnataang'u, Ea ASEETEANYU; gaydasarman duumsheesiinda aba gidoondooriida, Ea dea Ghaydit bea Israeli.

²³ Ghuuteanyu gaygahoosan muuchi, iyeasarmasseey; nea gurooroodeanyu gayghoaghaambiinyi aba gideaba nilealnean.

²⁴ Gaydargu doobiiwnataang'u askwearda sean aba gideaba siipwaaspwaas nea geenyik fuga gasa gwasawanan.