NYIIGHEEGA 7 - Bibliyeeda Ghaydit

Mooshta ASEETA bea siida siireat haleanjeeda

¹ NG'UTAMIIDA was ASEETEANYU, geafachsi headaang'u, lealnean aba heeda buuneesean eatu geeshteanyu, ak giighuuyaan.

² Ghana gawuurji ng'adiida gayghwasareandanaan, ghwaadan heeda moamu sih ghoaghuuhan.

³ NG'UTAMIIDA was ASEETEANYU, iineasinyi ng'asheanji, ghana gwanda geatingeasu gidamuy,

⁴ ghana iineasimi gidamuy siida eaduupcheewi, ghana dang'eesa weajoocheandeanyu ak ghaabwarji mwadaagha,

⁵ asi deana weajoocheanda geeshteanyu ak ghoang'waanyan; ak ghoalaapta ng'eanyi eaweegeasu, ak ghwanung' gwalil gurooroodeanyu aba jeeda birjeanda.

⁶ Ng'eada, Ea NG'UTAMIIDA aba nyarastaang'u, ak gigatkadi geaw aba badayda nyarasta weajoodigeasu; Ea ASEETEANYU ng'eaha; aba gideaba gigasayi gwasa gitoabiiw.

⁷ Nung' ghabwat geat eemoojiga neaweeseey, ak giihaaghwi nea gindi humng'eeda.

⁸ NG'UTAMIIDA gaygoorgweaksa eemoojiga; Ea NG'UTAMIIDA, argweaksean, aba giteena doobiiwnateanyu aba giteena alooheeda eandeawi.

⁹ Nung' goosha munyasnacheeka fuga mii doobiiweadi, ak giimajeegi siida doabiiwaat. Aba gideaba dea sima fugheerga ea gurooruunatka ASEETA doabiiwaadi.

¹⁰ Igeamboodeanyu gwanda heeda ASEETA, was dea lealu fuga miyaasiin gurooruunat.

¹¹ ASEETA dea laja girgweaguutka doobiiweadi, ak ASEETA iissa gwanyareeksa fuga munyas galeaga sean.

¹² Siida iimaduukuunana, gayghwashit ASEETA ng'utaanyi; niradu ghuweang'daanyi ak ea hidaat;

¹³ ak ea nisin dabitaanyi ng'weani jea ghabwara buuneeda, ak geatkaaschi ghoah gea beasta.

¹⁴ Ng'ula, siida muy iissa gagweayiit munyinda, nea gweayuumeadaanyi gaba munyinda, ak gwaji ng'uyeega.

¹⁵ Ak ghaghurghur shoomanda, ak ea nighurghur muuchi, ak gang'adeesa jeeda shoomanda ghurghur niny.

¹⁶ Nea munyindaanyi gaygabiiksa uhuudaanyi niny, ak niny gaygoobeedeaysa munyindaanyi nea gaba geaw.

¹⁷ Gaydabadiischeesa NG'UTAMIIDA aba giteena doobiiwnataanyi, ak gaydasarmasa gheawunga NG'UTAMIIDA, mida humng'eeda.