NYIIGHEEGA 68 - Bibliyeeda Ghaydit

Duumda jooriischooda

¹ ASEETA ghang'eat ak ghwadarda weajoodigaaschi; nea fuga sit niny gamng'aw aba madeadaanyi.

² Gawuurji gidasiguutiideayda aroosta, nih gida ighuutaaydi saawa; gawuurji gidanyariida hideeda aba madeeda beasta, nih gida jea gooshealda fuga munyas aba madeeda ASEETA!

³ Nea fuga doobiiweadi gaygahoosan; ak ea dahoosana aba madeeda ASEETA; ak ea deajuura aba hooseaneega.

⁴ Asarmasiina ASEETA, oakghaambiida gheawungaaschi; asina naweadaanyi ninyeeda laabwa hoowa shamooghuutka gheawungaaschi NG'UTAMIIDA, ahoosana aba madeadaanyi!

⁵ Ghweanda bananga gil ea dea ahaaghwa masinung'weega niny ASEETA abiita giibindaanyi ghaydit gil.

⁶ ASEETA goodawi fuga barbari hoorgeeda giibinda; ak gooruudu fuga ghealooniga goobiitpiit nea gamnyeeni; nea fuga sadeadi gaygoobiida ng'eanyiida ghajaam.

⁷ Ea ASEETA damanda ibeawi madeeda fugaagu, damanda ilaji bugusta dareapcheeda,

⁸ hean gwasim geaw ng'eanyiida, ak gabeang'u humng'eeda roopta, aba madeeda ASEETA, was ASEETA Israeli.

⁹ Ea ASEETA, ginung' ghwaroabwan roopta haw bea miyeenooda, ak ginung' ghahawda ng'eanyiidaang'u damanda waasiida;

¹⁰ ak ghwanyas eemeadaang'u giibinda aba jeeda; Ea ASEETA, aba alooheadaang'u, giidawi fuga barbari gidagasa

¹¹ Ng'utamiida gagu diigheanda; nea gadeemga ghoadayda iita saang'a.

¹² “Sugoodiga lugweega, gamng'aw, ak ghwadarda!” Ak gwalaja gadeemga easanga aba ghoah,

¹³ earapeadi abiita muhealuutka gisilga– nea meang'eega ghariibajeanda gwadukuta lapiya, nea ghawaar dabinigaaschi dahaabu nyawiish.

¹⁴ Damanda adaardaawa ASEETA sugoodiga aba hoowa abeeda gwadukuta gapkeanda giijeeda Salmoni.

¹⁵ Ea giijeeda geaw, giijeeda Bashani; Ea giijeeda mideawa iheenga saang'a, giijeeda Bashani!

¹⁶ Ghwasaan inyas ging'ulayi nea gishisi ghaang', giijeeda loat ASEETA goobiida uhuuda? Gaygoobiida ASEETA uhuuda damanda manda muudeanooda.

¹⁷ Nea gwandeawa mutukwajeega ng'ucheeda, sagalamnyoojiga ea sagalamnyoojiga saang'a, NG'UTAMIIDA ghwaan headaang'u ghaydit nea gwaleabu Sinayi.

¹⁸ Ang'iing'i nischeang'di humng'eeda nea giyaadi rabadanga, nea ghwanyas haleanjeeda adaw buuneeda niny, ak eara jeeda fuga ng'ooweata abeeda goobiida NG'UTAMIIDA was ASEETA jeenyaawa.

¹⁹ Eakghaambiida Ng'utamiida, was dea eada sareendeanya; niny ASEETA was lealeanoodeanya.

²⁰ ASEETEANYA niny ASEETA lealu fihi; nea naweadinga riteawa jeeda miyeeda gwanda heeda ASEETA was NG'UTAMIIDA.

²¹ Ak ASEETA gayghabwaash uhuuda weajoodigaaschi, iheenga buudeega fuga aat naweeda muy.

²² Gwayi NG'UTAMIIDA, “Aniini gaydaaghuumu saawa gabiikna Bashani, aniini gaydaaghuumu saawa gabiikna jeeda basooda sheagi jih,

²³ ak ging'udi geeshtaang'u jeeda foojeanda weajoodigaagu, ak ghwanyas ng'ushapkeaka gudajeagaagu foojeanda jea ghwaak.”

²⁴ Ea ASEETA, beacheengaagu bea jooriischooda sidaah, beacheenga ASEETEANYU, was Sugoocheanda, ea ghwahita headaanyi ghaydit–

²⁵ Goosheeda fuga sarman, nea gahuuydean fuga bara ginaandajeega, nea bugusta nyaawa gwanda haweega bara gidoondoorajeega.

²⁶ “Oakghaambiida ASEETA aba bugusta buuneeda, NG'UTAMIIDA, ea agoogeeda oowooschi jeata Israeli.”

²⁷ Gwanda Benjamineeda mwanang' ak gabassa Yuda ea mughuusheanda fugaaschi, sea fuga hees bea Sabuloni, ea fuga hees bea Naftali.

²⁸ Ea ASEETA, nung' ghwahidu uurdaang'u haw; Ea ASEETA, ahiimni uurdaang'u aba badahuukaasa.

²⁹ Ghang'eada gheang'u sibateeweey aba Yerusalemu gaygweaneey sugoodiga haleanjeeda guskuseega.

³⁰ Ajuursiina diyeangiga abiita jeesinga muudaygean, ea hawanda heewga ea muhooga. Ak abeeda gwasineey eemoojiga mureeda ak gagoonyi gwaadi; adaarda fuga bwariiy ng'ucheeda.

³¹ Nung'waada eeyeana lagheanga oomng'i Misri; nung'waada Gushi gooheaksa geatingaaschi ASEETA ghoadaw haleanjeeda nyaawa.

³² Ea sugoodiga ng'eanyiida, asarmasiina ASEETA; oakghaambiida ASEETA aba sarmeeda,

³³ asarmasiina ninyeeda sik bugusta humng'eeda, humng'eedeaba ghayi ea ghayi; ak ghwanya ghuutaanyi, ghuuta mideawa uurda.

³⁴ Anala uurda haw bea ASEETA, ninyeeda ambal Israeli, gheambalmeadaanyi ghwahita humng'eeda.

³⁵ ASEETA ea haloat aba heeda abiita ghaydit, niny ASEETA Israeli, niny goodawi fugaaschi uurda ea giimuusta. Gagasa eakghaambiit ASEETA!