NYIIGHEEGA 59 - Bibliyeeda Ghaydit

Mooshta jea ghoahaaghwiida fih ASEETA

¹ Ea ASEETEANYU, aghuuhaan aba heeda weajoodigeasu, aghuuhaan aba heeda fuga eang'ucheewi,

² lealnean aba heeda fuga munyas, ak giighuuhanaan fuga bara buuneeda.

³ Aba gideaba ghamwaal eaweegeasu; fuga ng'weani nineaweesean. Ea NG'UTAMIIDA, meakna giidiinyeandeanyu ghana ramaseandeanyu, ghana riing'eedeanyu,

⁴ eara ea miidasin giidiinyeanda, gwasalda ak gwasisin geat; Ang'iing'i ng'eada, ak giwuni weeteanyu, ak gidaahi.

⁵ Nea ang'iing'i NG'UTAMIIDA, ASEETA bea lugweega, guwoosi ASEETA Israeli. Ng'eada ak gilasi eemoojiga sean; adiidu gaboos fuga munyas eara akkalealla was gea sina ng'asheega munyas.

⁶ Damandeaba shing'ada iissa gabiigu, ak ghwareakghutaayda gudajeega ak gwaneayeewa jeeda mujiini.

⁷ Ng'ula, aba ghuusiga nyaawa iissa gwarina giing'weaka, ghuusiga nyaawa gwanda ng'uta, aba gideaba– “Ng'eaha, siida jea ghwayiinyeasa?”

⁸ Ak ang'iing'i NG'UTAMIIDA, gaybareena reari; ak gayfoola eemoojiga sean mwanalnyi.

⁹ Ea uurdeanyu, gaydasarman duumda giigheambiitaang'u; aba gideaba ang'iing'i Ea ASEETA, guwoosi hilgweandeanyu majeek.

¹⁰ ASEETEANYU aba jeeda bariinyeagaaschi gayghoan heedeanyu; ASEETEANYU gayghwanung' dang'ula weajoodigeasu nea sijoar.

¹¹ Adibwari, buuneedeanyu gajiidu gwaroosa; nung' ghwadarda aba uurdaang'u ak gilasi uhuuda, Ea NG'UTAMIIDA was igeamboodeanya!

¹² Aba riing'eega ghuusiga nyaawa, ea aba ng'asheega ghuusiga nyaawa, deaghasa aba jeeda ghwarjeeda nyaawa. Aba mooshteayda ea ng'uyeega ruku,

¹³ lasa uhuuda aba nyarasta, lasa uhuuda ak ginung' gwarooda, ak ghwanal gideaba ASEETA goombal Yakobo ea ghwahita muudeanooda ng'eanyiida.

¹⁴ Iissa damandeaba shing'ada gabiigu, ak ghwareakghutaayda gudajeega ak gwaneayi aba jeeda mujiini.

¹⁵ Ak gwaneayi nea gagasa hamita, nea iimalang'u gayghoang'wearu eaweesean.

¹⁶ Ak aniini gaydasarman uurdaang'u sakteayda; gaydasarman bariinyeagaagu aba hooseaneega. Aba gideaba ang'iing'i guwoosi igeamboodeanyu ea heeda eamng'awsi damanda sawanadeedeanyu.

¹⁷ Ea uurdeanyu, gaydasarmaseey nea geahoosanyi, aba gideaba ASEETA ang'iing'i guwoosi hilgweandeanyu, was ASEETA ahiimnaan bariinyeagaaschi.