NYIIGHEEGA 51 - Bibliyeeda Ghaydit

Musooda samsiinda aba heeda ASEETA

¹ Ea ASEETA, eaniyean bwaydanaan, aba giteena hawunda bariinyeagaagu bea huumwa; aba giteena hawunda baydeaydaang'u geanda riing'eegeasu.

² Ahuunean muuchi aba munyindeanyu, ak giimiinaan aba riing'eegeasu!

³ Aba gideaba aniini naanali giidiinyeandeanyu, nea riing'eedeanyu gwanda madeedeanyu galeaga sean.

⁴ Neasineeyi riing'eeda, ang'iing'i nea gibea geaw, ak geasinyi ng'asheega munyas aba madeeda gheanyangaagu, gidigasayi ang'iing'i ghwadoabiiw nea girgweageadaang'u ea mwajeamwachmwach.

⁵ Ng'ula, aniini geejiilsean jeeda munyinda, ak aniini geejiilan nea geabay daba riing'a ak ghwarat iyya aba jeeda riing'eeda.

⁶ Ng'ula, ang'iing'i gibwariinyi huumeanda mida jeeda guroorooda; ak ang'iing'i gayrukunean fughareeda aba makcheameeda mida gurooroodeanyu.

⁷ Ahuunean aba hisoopo, ak gaydamiidu; ahuunean, ak gaydaweeshiit ea dang'al gapkeanda.

⁸ Anyiidaan hooseaneega ea ng'weelooda; nung' gahoosan geaka ghayi ihirjeawayi.

⁹ Funya gheanyangaagu ading'ulayi riing'eegeasu, ak giibuusi munyindeanyu sean.

¹⁰ Ea ASEETA, sinnean guroorooda miy, ak ginung' gaweeshiit guroorooda mida jeedeanyu.

¹¹ Adisajanaan madeeda gheanyangaagu, ak ea adigeandeawean gurooroadaang'u ghaydit.

¹² Adeelnean hooseaneega lealeanoadaang'u, ak ginung' damiinaada aba guroorooda mideawa mureeda.

¹³ Gaydaanaal fuga adiiy naweadingaagu, ak gaygabiigu fuga riing'eega headaang'u.

¹⁴ Ea ASEETA, aghuuhanaan giihiideayda foojeanda buuneeda, ak ang'iing'i guwoosi ASEETA lealeanoodeanyu, ak gaygwasarman ghuuteanyu duumda nea geajuurji aba lealeanoadaang'u.

¹⁵ Ea NG'UTAMIIDA, eaniyean jaada ghuuteanyu, ak gaygwargu ghuuteanyu giigheambiitaang'u.

¹⁶ Aba gideaba ang'iing'i mibwariinyi lukghumajeega; gwachi gaydagu lukghumajeega sighwarda, ang'iing'i migassi lukghumajeega sighwarda.

¹⁷ Lukghumajeega gasa ASEETA guroorooda doabiiwaadi; ea ASEETA, ang'iing'i mayfoola guroorooda doabiiwaat bea mureeda.

¹⁸ Sisiina ng'asheega miyaasiin Sayuni aba alooheadaang'u; biikta deasa ghamarda Yerusalemu,

¹⁹ Abeeda gayhoosasiina lukghumajeega huumwa, sea haleanjeedeanya sean bea ghadooweeda sighwarda, abeeda gayghoadayda heewga aba headaang'u bea wagiida.